Hyderabad Counterfeit Currency: ಹೈದರಾಬಾದ್‌ನಲ್ಲಿ ಬೃಹತ್ ಕಳ್ಳನೋಟು ದಂಧೆಯನ್ನು ಪೊಲೀಸರು ಭೇದಿಸಿದ್ದಾರೆ. ಸುಮಾರು 6.78 ಕೋಟಿ ರೂ. ಮುಖಬೆಲೆಯ ನಕಲಿ 500 ರೂಪಾಯಿ ನೋಟುಗಳನ್ನು ಜಪ್ತಿ ಮಾಡಲಾಗಿದ್ದು, ಘಟನೆಗೆ ಸಂಬಂಧಿಸಿದಂತೆ 4 ಜನ ಆರೋಪಿಗಳನ್ನು ಬಂಧಿಸಲಾಗಿದೆ.
ಅಬ್ದುಲ್ಲಾಪುರಮೇಟ್ ಪೊಲೀಸ್ ಹಾಗೂ ಶಾದ್‌ನಗರ ಎಸ್‌ಒಟಿ ಜಂಟಿ ದಾಳಿಯಲ್ಲಿ ಈ ಜಾಲ ಧ್ವಂಸಗೊಂಡಿದೆ ಎಂದು ಕಮಿಷನರ್ ಡಾ. ತರುಣ್ ಜೋಶಿ ಹೇಳಿದ್ದಾರೆ. ನವೆಂಬರ್ 1 ರಂದು ರಾ.ಹೆ.-65 ರಾಮೋಜಿ ಫಿಲ್ಮ್ ಸಿಟಿ ಬಳಿ ಕಾರು ತಡೆದ ಪೊಲೀಸರು ಮಡುಪೋಜು ಕರುಣಾಕರ್, ಚಿನ್ನೊಲ್ಲ ಮಾಣಿಕ್ಯ ರೆಡ್ಡಿ, ಚೆರುಕುಪೆಲ್ಲಿ ರತ್ನಾಕರ್ ರೆಡ್ಡಿ ಮತ್ತು ಕರಣಂ ಅಜಯ್ ಕುಮಾರ್‌ನನ್ನು ಬಂಧಿಸಿದ್ದಾರೆ.
ಬಾಡಿಗೆ ಮನೆಯಲ್ಲಿ ಪ್ರಿಂಟಿಂಗ್ ಯೂನಿಟ್
ಬಂಧಿತರ ನೀಡಿದ ಮಾಹಿತಿ ಮೇರೆಗೆ ಕುಂಟ್ಲೂರ್‌ನ ಬಾಡಿಗೆ ಮನೆಯೊಂದರಲ್ಲಿದ್ದ ನಕಲಿ ನೋಟು ಮುದ್ರಣ ಘಟಕದ ಮೇಲೆ ದಾಳಿ ನಡೆಸಿದ ಪೊಲೀಸರು, ನೋಟು ಮುದ್ರಣಕ್ಕೆ ಬಳಸುತ್ತಿದ್ದ ಪ್ರಿಂಟರ್‌ಗಳು, ಲ್ಯಾಪ್‌ಟಾಪ್ ಹಾಗೂ ನೋಟು ಕಟಿಂಗ್ ಯಂತ್ರಗಳನ್ನು ವಶಪಡಿಸಿಕೊಂಡಿದ್ದಾರೆ.
