ಜನಪ್ರಿಯ ಮೊಬೈಲ್​ ಅಪ್ಲಿಕೇಷನ್ ವಾಟ್ಸ್​ಆ್ಯಪ್ ಬಳಕೆದಾರರ ಸಂಖ್ಯೆ 200 ಕೋಟಿ!

ಸ್ಯಾನ್​ಫ್ರಾನ್ಸಿಸ್ಕೋ: ಸಂದೇಶ ರವಾನೆ, ವಿಡಿಯೋ ಕರೆ, ಧ್ವನಿ ಕರೆಗಳನ್ನು ಸುಲಭಗೊಳಿಸಿದ ವಾಟ್ಸ್​ಆ್ಯಪ್​ ಬಳಕೆದಾರರ ಸಂಖ್ಯೆ 200 ಕೋಟಿ ತಲುಪಿದೆ ಎಂದು ಫೇಸ್​ಬುಕ್​ ಬುಧವಾರ ತಿಳಿಸಿದೆ.

ವಾಟ್ಸ್​ಆ್ಯಪ್​ ಈ ಬಗ್ಗೆ ಬ್ಲಾಗ್​ ಪೋಸ್ಟ್ ಮಾಡಿದ್ದು, ಅದರಲ್ಲಿ ಅನೇಕ ವಿಚಾರಗಳನ್ನು ಹಂಚಿಕೊಂಡಿದೆ. ಖಾಸಗಿ ಸಂವಹನ ಕೇವಲ ಮುಖತಃ ಭೇಟಿಯಿಂದ ಸಾಧ್ಯ ಎಂಬ ಸನ್ನಿವೇಶವನ್ನು ಬದಲಾಯಿಸಿದ್ದು ವಾಟ್ಸ್​ಆ್ಯಪ್. ಈಗ ಜಗತ್ತಿನ ಯಾವ ಮೂಲೆಯಲ್ಲಿ ಯಾರೇ ಇದ್ದರೂ ತಮ್ಮ ಆಪ್ತರ ಜತೆಗೆ ಅಥವಾ ವ್ಯವಹಾರದ ವಿಚಾರವಾದರೂ ಸಂಬಂಧಿಸಿದ ವ್ಯಕ್ತಿಯ ಜತೆಗೆ ಖಾಸಗಿ ಮಾತುಕತೆ, ಸಂವಹನಕ್ಕೆ ವಿಡಿಯೋ ಕರೆ, ಇನ್​ಸ್ಟಂಟ್ ಸಂದೇಶ ರವಾನೆಯಂತಹ ಸೌಲಭ್ಯಗಳನ್ನು ಒದಗಿಸುವ ಮೂಲಕ ಈ ಆ್ಯಪ್ ಅವಕಾಶ ಮಾಡಿಕೊಟ್ಟಿದೆ.

ಆಧುನಿಕ ಬದುಕಿನ ಅಗತ್ಯಕ್ಕೆ ತಕ್ಕಂತೆ ಮಾತುಕತೆಯ ಅಂಶ ಸೋರಿಕೆಯಾಗದಂತೆ ಅಥವಾ ಪ್ರೈವೆಸಿಗೆ ಧಕ್ಕೆಯಾಗದಂತೆ ಆ್ಯಪನ್ನು ಅಭಿವೃದ್ಧಿ ಪಡಿಸಲಾಗಿದೆ. ನಾವು ಪ್ರತಿಯೊಬ್ಬರ ಸಂವಹನದ ಸುರಕ್ಷತೆಯನ್ನು ಕಾಪಾಡುತ್ತೇವೆ ಎಂಬಿತ್ಯಾದಿ ವಿಷಯಗಳನ್ನು ವಾಟ್ಸ್​ಆ್ಯಪ್ ತನ್ನ ಬ್ಲಾಗ್​ನಲ್ಲಿ ಹಂಚಿಕೊಂಡಿದೆ.

ವಾಟ್ಸ್​ಆ್ಯಪನ್ನು 2014ರಲ್ಲಿ ಫೇಸ್​ಬುಕ್​ ಖರೀದಿಸಿದ್ದು, ಅಲ್ಲಿಂದೀಚೆಗೆ ಆ್ಯಪ್​ನಲ್ಲಿ ಹಲವು ಪರಿಷ್ಕರಣೆಗಳಾಗಿದ್ದು, ವಿವಿಧ ರೀತಿಯ ಸೌಲಭ್ಯಗಳು ಬಳಕೆದಾರರಿಗೆ ಸಿಕ್ಕಿದೆ. 2009 ರಲ್ಲಿ ಲೋಕಾರ್ಪಣೆಗೊಂಡಿರುವ ವಾಟ್ಸ್​ಆ್ಯಪ್ ಬಳಕೆದಾರರ ಸಂಖ್ಯೆ 2018ರ ಫೆಬ್ರವರಿ ಹೊತ್ತಿಗೆ 150 ಕೋಟಿ ಆಗಿತ್ತು. (ಏಜೆನ್ಸೀಸ್)