ಅಭಿವ್ಯಕ್ತಿ ಎಂದರೆ ಇತರರ ಬಗೆಗಿನ ನಮ್ಮ ಅನಿಸಿಕೆಗಳನ್ನು ಅಭಿಪ್ರಾಯಗಳನ್ನು ಭಾವನೆಗಳನ್ನು ಪ್ರಕಟಪಡಿಸುವುದು ಇಲ್ಲವೇ ವ್ಯಕ್ತಪಡಿಸುವುದು ಎಂದರ್ಥ. ಅದರಲ್ಲೂ ಇತರರು ಪ್ರಶಂಸನೀಯ, ಗಣನೀಯ ಕೆಲಸಗಳನ್ನು ಮಾಡಿದಾಗ ಇಲ್ಲವೇ ಸಾಧನೆಗೈದಾಗ ಒಂದಿಷ್ಟು ಮೆಚ್ಚುಗೆ ಮಾತುಗಳನ್ನು ಸಕಾಲದಲ್ಲಿ ಸಂತೋಷದಿಂದ ಸಮ ಪ್ರಮಾಣದಲ್ಲಿ ವ್ಯಕ್ತಪಡಿಸದಿದ್ದರೆ ಅದೊಂದು ಲೋಪವೆಂದೆನಿಸುತ್ತದೆ. ಮಾನವೀಯ ಸಂಬಂಧಗಳು ಹಸನಾಗಿರಬೇಕಾದರೆ, ಹಸಿರಾಗಿರಬೇಕಾದರೆ ಪರಸ್ಪರರ ನಡುವೆ ಸದ್ಭಾವನೆಗಳು, ಸದಭಿಪ್ರಾಯಗಳು, ಪ್ರೀತಿ-ವಿಶ್ವಾಸಗಳು ಸೃಷ್ಟಿಯಾಗಿ ವೃದ್ಧಿಯಾಗುತ್ತಿರಬೇಕು. ಹೀಗಾಗಲು ವ್ಯಕ್ತಿಗಳಲ್ಲಿನ ಒಳಿತನ್ನು, ಗುಣವಿಶೇಷಗಳನ್ನು, ಸದ್ಗುಣಗಳನ್ನು, ಸಾಧನೆಗಳನ್ನು ಬರೀ ಗುರುತಿಸಿದರೆ ಸಾಲದು. ಅವನ್ನು ಸೂಕ್ತ ಸಮಯದಲ್ಲಿ ಸೂಕ್ತ ರೀತಿಯಲ್ಲಿ ಮನಸಾರೆ ಅಭಿವ್ಯಕ್ತಿಗೊಳಿಸುವುದು ಕೂಡ ಅಷ್ಟೇ ಮುಖ್ಯ. ಅಭಿವ್ಯಕ್ತಿಯಿಂದ ಮಾತ್ರ ಭಾವನೆಗಳು, ಸದಭಿಪ್ರಾಯಗಳು, ಮೆಚ್ಚುಗೆಗಳು ಇನ್ನೊಬ್ಬರಿಗೆ ತಿಳಿಯಲು ಸಾಧ್ಯ.
