ಭಾರತೀಯ ರೈಲ್ವೆಯನ್ನು ಸಂಪೂರ್ಣ ವಿದ್ಯುದೀಕರಣಗೊಳಿಸಲು ಇನ್ನೂ ನಾಲ್ಕು ವರ್ಷಗಳ ಗುರಿ ಇಟ್ಟುಕೊಳ್ಳಲಾಗಿದೆ. ಮಂಗಳೂರು - ಬೆಂಗಳೂರು ಮಾರ್ಗವೂ ವಿದ್ಯುದೀಕರಣಕ್ಕೆ ಒಳಗಾಗಲಿದೆ. ಸರಕು ಸಾಗಣೆ ರೈಲು ಮಾರ್ಗಕ್ಕೆ (ಡೆಡಿಕೇಟೆಡ್ ಗೂಡ್ಸ್ ಟ್ರೇನ್) ಉತ್ತೇಜನ ದೊರೆತಂತಾಗಿದೆ. ಇದರ ಫಲವಾಗಿ ಮಂಗಳೂರು ಬಂದರು ಮತ್ತು ಬೆಂಗಳೂರು-ಚೆನ್ನೈ ನಡುವೆ ಡೆಡಿಕೇಟೆಡ್ ಗೂಡ್ಸ್ ಕಾರಿಡಾರ್ ನಿರ್ವಣವಾದರೆ ಉದ್ಯಮ ಬೆಳವಣಿಗೆಯ ದೃಷ್ಟಿಯಿಂದ ಉತ್ತೇಜನ ಸಿಕ್ಕಂತಾಗುತ್ತದೆ. ಇನ್ನು, ಕಲಬುರಗಿ ಮತ್ತು ಮಂಗಳೂರು ವಿಭಾಗದ ಬೇಡಿಕೆಯಲ್ಲಿ ಕಲಬುರಗಿ ವಿಭಾಗದ ಬಹು ವರ್ಷಗಳ ಕನಸು ನನಸಾಗುವಂತೆ ಕಾಣಿಸುತ್ತಿದೆ. ಆದರೆ ಇದಕ್ಕಾಗಿ ಮೀಸಲಿಟ್ಟ ಹಣದ ವಿವರಗಳನ್ನು ಗಮನಿಸಬೇಕಾಗಿದೆ. ರೈಲು ಮಾರ್ಗಗಳ ಪಕ್ಕದ ಖಾಲಿ ಜಾಗಕ್ಕೆ ಸೋಲಾರ್ ಅಳವಡಿಕೆಯ ಘೊಷಣೆಯಾಗಿದೆ. ಇದು ವಿದ್ಯುತ್ ಕೊರತೆಯನ್ನು ನೀಗಿಸುವಲ್ಲಿ ಪ್ರಮುಖ ಪಾತ್ರ ವಹಿಸಲಿದೆ. ಇದರಿಂದ ರಾಜ್ಯದ ಬಯಲು ಸೀಮೆಯ ಹಳಿಗಳಿರುವಲ್ಲಿ ವಿದ್ಯುತ್ ಉತ್ಪಾದನೆ ಹೆಚ್ಚಾಗಲಿದೆ. ಸ್ಥಳೀಯ ವಿದ್ಯುತ್ ಬೇಡಿಕೆಯೂ ಪೂರೈಸುವಂತಾದರೆ ಉತ್ತಮ.
