ಪರಿಸ್ಥಿತಿ ಗಂಭೀರ: ವರದಿಯ ಕೆಲವು ಮಾಹಿತಿ ವಿಜಯವಾಣಿಗೆ ಲಭ್ಯವಾಗಿದೆ. ಅಧ್ಯಯನ ಉದ್ದೇಶಕ್ಕೆ ಪರಿಗಣಿಸಿದ ಸರಾಸರಿ ನೂರು ಕಾಮಗಾರಿಗಳ ಪೈಕಿ ಶೇ.75ಕ್ಕಿಂತ ಹೆಚ್ಚು ಕಾಮಗಾರಿಗಳಲ್ಲಿ ಎಸ್ಕಲೇಷನ್ ಮಾಡಲಾಗಿದೆ. ಸಾಕಷ್ಟು ಕಾಮಗಾರಿಗಳಲ್ಲಿ ಅಂದಾಜು ವೆಚ್ಚ ಶೇ.100 ಹೆಚ್ಚುವರಿಯಾಗಿದ್ದೂ ಇದೆ. ಆ ಮೂಲಕ ತಾಳಮೇಳ ತಪ್ಪಿಸುವುದು ಸ್ಪಷ್ಟವಾಗಿದೆ. ಹೇಗೆ ನಡೆಯುತ್ತದೆ ಭ್ರಷ್ಟಾಚಾರ?: ಸಾಮಾನ್ಯವಾಗಿ ಯಾವುದೇ ಇಲಾಖೆಯ ಸಿವಿಲ್ ಕಾಮಗಾರಿ ಮುನ್ನ ತಜ್ಞರ ನೆರವಿನಿಂದ ಅಂದಾಜು ಪಟ್ಟಿ ತಯಾರಿಸಲಾಗುತ್ತದೆ. ಕಾಮಗಾರಿಗೆ ಎಷ್ಟು ವೆಚ್ಚ ಆಗಲಿದೆ ಎಂದು ಅಂದಾಜಿಸಿ ಅದರ ಆಧಾರದ ಮೇಲೆ ಸರ್ಕಾರ ಅನುದಾನ ಹಂಚಿಕೆ ಮಾಡುತ್ತದೆ. ಇದಕ್ಕಾಗಿ ಟೆಂಡರ್ ಕರೆಯಲಾಗುತ್ತದೆ. ಆದರೆ, ಕಾಮಗಾರಿ ಮುಗಿಯುವ ಹಂತಕ್ಕೆ ಎಸ್ಕಲೇಷನ್ ಪ್ರಸ್ತಾಪ ಮಾಡಿ ಹೆಚ್ಚುವರಿ ಅನುದಾನಕ್ಕೆ ಬೇಡಿಕೆ ಇಡುವ ಪರಿಪಾಠ ನಡೆದಿದೆ. ಕೆಲವು ಪ್ರಕರಣಗಳಲ್ಲಿ ಎಸ್ಕಲೇಷನ್ ನೈಜ ಉದ್ದೇಶವೂ ಇರಬಹುದು, ಹೆಚ್ಚು ಪ್ರಕರಣಗಳಲ್ಲಿ ಕೈಚಳಕ ಆಗಿರಬಹುದು, ರಾಜಕೀಯ ನಾಯಕರ ಪ್ರಭಾವವೂ ಇರಬಹುದು. ಮೇಲ್ನೋಟಕ್ಕೆ ಸ್ಥಳೀಯ ಜನಪ್ರತಿನಿಧಿಗಳ ಒತ್ತಡಕ್ಕೆ ಸಿಲುಕಿ ಎಸ್ಕಲೇಷನ್ ಅಸ್ತ್ರ ಬಳಸಲಾಗುತ್ತಿದೆ ಎಂಬುದೀಗ ಗುಟ್ಟಾಗೇನು ಉಳಿದಿಲ್ಲ. ಒಟ್ಟಾರೆ ಭ್ರಷ್ಟಾಚಾರಕ್ಕೆ ಅವಕಾಶ ಮಾಡಿಕೊಡುವ ಜತೆಗೆ ಸರ್ಕಾರದ ಬೊಕ್ಕಸದ ಮೇಲೂ ಪರಿಣಾಮ ಬೀರುತ್ತಿದೆ.
