ಸಮಾಧಾನ ತಂದ ಸಡಿಲಿಕೆ; ಜನಜೀವನ ಸಹಜಸ್ಥಿತಿಗೆ ತರಲು ವಿನಾಯಿತಿಗಳ ಸರಣಿ

ಬೆಂಗಳೂರು: ಲಾಕ್​ಡೌನ್​ನಿಂದ ಸಂಕಷ್ಟಕ್ಕೆ ಸಿಲುಕಿದ್ದ ಜನಜೀವನವನ್ನು ಸಹಜ ಸ್ಥಿತಿಗೆ ತರುವ ನಿಟ್ಟಿನಲ್ಲಿ ಶುರುವಾಗಿರುವ ವಿನಾಯಿತಿ ಸರಣಿ ನೆರವಾಗಿದೆ. ಕರೊನಾತಂಕದ ನಡುವೆ ಆದ್ಯತೆಗೆ ಅನುಸಾರವಾಗಿ ನಿರ್ಬಂಧಗಳ ಗಂಟುಗಳನ್ನು ಬಿಚ್ಚುತ್ತಿರುವುದು ಜನ-ಸಾಮಾನ್ಯರಿಗೆ ಸಮಾಧಾನ ಕೊಂಚ ತಂದಿದೆ. ಲಾಕ್​ಡೌನ್​ನಿಂದಾಗಿ ಸಮರೋಪಾದಿ ಪರಿಹಾರ ಕ್ರಮಗಳನ್ನು ಕೈಗೊಳ್ಳಲು ಅನುಕೂಲವಾಗಿದೆ. ಪ್ರತಿದಿನ ಪ್ರಕರಣಗಳ ಸಂಖ್ಯೆ ಸೇರ್ಪಡೆಗೆ ಆತಂಕ ಅನಗತ್ಯ. ಇದು, ತಪಾಸಣೆ, ಪರೀಕ್ಷೆ ಹಾಗೂ ಪತ್ತೆ ಸಾಮರ್ಥ್ಯ ವೃದ್ಧಿಗೆ ಸಾಕ್ಷಿಯಾಗಿದೆ.

ಆಡಳಿತಯಂತ್ರ ಚುರುಕು, ಆರ್ಥಿಕತೆ ಚೇತರಿಕೆ: ಮುಂಚೂಣಿ ಕರೊನಾ ಯೋಧರ ಹೆಗಲಿಗೆ ಎಲ್ಲ ಭಾರ ಬಿದ್ದಿದೆ. ದೀರ್ಘಾವಧಿಗೆ ಮುಂದುವರಿದರೆ ಸೇವಾ ನಿರತ ಸೇನಾನಿಗಳಲ್ಲಿ ಸುಸ್ತು, ಬೇಸರ ಹುಟ್ಟಿಕೊಳ್ಳುತ್ತದೆ. ಅಲ್ಲದೆ, ಇನ್ನುಳಿದ ಇಲಾಖೆಗಳ ಅಧಿಕಾರಿಗಳು ಮತ್ತು ಸಿಬ್ಬಂದಿಗೆ ಕೆಲಸವಿಲ್ಲದೆ ಜಡಗಟ್ಟಿದ ಮನಸ್ಥಿತಿ ಏರ್ಪಡುತ್ತದೆ. ಆಡಳಿತ ಯಂತ್ರದ ಕಾರ್ಯಭಾರ ಸಮತೋಲನಗೊಳಿಸಿ ಚುರುಕು ಮೂಡಿಸುವುದಕ್ಕೂ ವಿನಾಯಿತಿ ಆಸರೆಯಾಗಲಿದೆ. ತುರ್ತು ಕೆಲಸಗಳ ಜತೆಗೆ ಅಗತ್ಯವಾದ ಅಭಿವೃದ್ಧಿ ಕಾಮಗಾರಿಗಳು ಮತ್ತು ಕಾರ್ಯಕ್ರಮಗಳು ಅನುಷ್ಠಾನಕ್ಕೆ ಅನುಕೂಲವಾಗಿದೆ ಎಂದು ಉನ್ನತ ಮೂಲಗಳು ತಿಳಿಸಿವೆ.

ರಾಜ್ಯದ ಬೊಕ್ಕಸಕ್ಕೆ ಆದಾಯ ಹರಿವಿನ ಪ್ರಮಾಣ ಒಂದೇ ಬಾರಿಗೆ ಹೆಚ್ಚುವುದಿಲ್ಲ. ಆದರೂ ಶೂನ್ಯ ಸ್ಥಿತಿಯಿಂದ ಮೇಲೇಳಲು ಊರುಗೋಲಾಗುತ್ತದೆ.  ಕೇಂದ್ರದ ಪಾಲು ಯಾವಾಗ ? ಎಷ್ಟು ? ಸಿಗುತ್ತದೆ ಎಂದು ಸದ್ಯಕ್ಕೆ ಹೇಳಲಾಗದು. ಹೀಗಾಗಿ ನೇರ ಆದಾಯೋತ್ಪನ್ನದ ಮೂಲಗಳಲ್ಲಿ ಸುಧಾರಣೆಯಾಗಿ ಸಂಬಳ, ಇನ್ನಿತರ ನಿರ್ವಹಣಾ ವೆಚ್ಚಗಳನ್ನು ಸರಿದೂಗಿಸುವ ಲೆಕ್ಕಾಚಾರವಿದೆ.

ಅವಲೋಕನಕ್ಕೂ ಅವಕಾಶ

ನಿಯಂತ್ರಿತ ಹಾಗೂ ತೀವ್ರ ಬಾಧಿತ ಕ್ಷೇತ್ರ ಹೊರತುಪಡಿಸಿ ವಿವಿಧ ಕ್ಷೇತ್ರಗಳಿಗೆ ನೀಡಿದ ವಿನಾಯಿತಿ ಪರಿಸ್ಥಿತಿ ಅವಲೋಕಿಸಿ ಅಗತ್ಯ ಕ್ರಮವಹಿಸಲು ಅವಕಾಶ ಮಾಡಿಕೊಡಲಿದೆ. ಭೌತಿಕ ಅಂತರ, ಮಾಸ್ಕ್ ಕಡ್ಡಾಯ ಇತ್ಯಾದಿ ಅಗತ್ಯ ಸುರಕ್ಷತಾ ಕ್ರಮಗಳ ಪಾಲನೆ ಮೇಲೆ ನಿಗಾವಹಿಸಲು ಸಾಧ್ಯವಾಗಲಿದೆ. ಮೇ 3ರ ಬಳಿಕ ಲಾಕ್ ಡೌನ್ ಮುಗಿದರೂ ಕೈಗೊಳ್ಳಬೇಕಾದ ಕಟ್ಟುನಿಟ್ಟಿನ ಮುನ್ನೆಚ್ಚರಿಕೆ ಕ್ರಮಗಳ ಕುರಿತಾಗಿ ಸರ್ಕಾರಕ್ಕೆ ಸ್ಪಷ್ಟ ಹಿಮ್ಮಾಹಿತಿ (ಫೀಡ್​ಬ್ಯಾಕ್) ಸಿಗುತ್ತದೆ ಎಂದು ಹೆಸರು ಹೇಳಲಿಚ್ಚಿಸದ ಹಿರಿಯ ಅಧಿಕಾರಿಯೊಬ್ಬರು ಹೇಳಿದರು.

https://www.vijayavani.net/coronavirus-covid-19-health-dept-b-g-prakash-kumar-phone-in-pragram-vijayavani/