Sequels Craze - ಸೀಕ್ವೆಲ್​ಗಳ ಸಂಭ್ರಮ, ಮುಂದುವರಿದ ಕಥೆಗಳಿಗೆ ಮುಂದುವರಿದ ಕ್ರೇಜ್​

Sequels Craze -

ಒಂದು ಚಿತ್ರದ ಬಳಿಕ ಹೊಸ ಹೊಸ ಶೀರ್ಷಿಕೆ ಹುಡುಕಿ, ಕಂಟೆಂಟ್​ ಬಗ್ಗೆ ಪ್ರಚಾರ ಮಾಡಿ, ಜನರನ್ನು ಸೆಳೆಯುವುದು ಕಷ್ಟದ ಕೆಲಸ. ಇನ್ನು ಪ್ರತಿ ಬಾರಿ ಹೊಸ ಕಥೆ, ಶೀರ್ಷಿಕೆ, ತಾರಾಗಣ, ತಂತ್ರಜ್ಞರನ್ನು ಸೇರಿಸಿ ಸಿನಿಮಾ ಮಾಡುವುದು ಸವಾಲೇ ಸರಿ. ಆದರೆ, ಒಂದು ಸಿನಿಮಾ ಹಿಟ್​ ಆದ ಬಳಿಕ, ಅದೇ ಟೈಟಲ್​ನಲ್ಲಿ ಇನ್ನೊಂದು ಸಿನಿಮಾ ಮಾಡಿದರೆ, ಚಿತ್ರತಂಡಕ್ಕೆ ಸ್ವಲ್ಪ ಒತ್ತಡ ಕಡಿಮೆಯಾಗುತ್ತದೆ. ಹೀಗಾಗಿಯೇ ಇತ್ತೀಚಿನ ವರ್ಷಗಳಲ್ಲಿ ಸೀಕ್ವೆಲ್​ಗಳು ಹೆಚ್ಚಾಗಿವೆ. ಕೆಲವರು ಮೊದಲೇ ಕಥೆಯನ್ನು ಎರಡು, ಮೂರು ಭಾಗಗಳಲ್ಲಿ ಪ್ಲಾ$್ಯನ್​ ಮಾಡಿಕೊಂಡಿದ್ದರೆ, ಕೆಲವರು ಎರಡು, ಮೂರು ಕಥೆಗಳನ್ನು ಒಂದೆಡೆ ಸೇರಿಸಿ ಯೂನಿವರ್ಸ್​ ಸೃಷ್ಟಿಸುವ ಸಾಹಸದಲ್ಲಿದ್ದಾರೆ. ಇನ್ನು ಕೆಲವರು ಹಳೆಯ ಶೀರ್ಷಿಕೆಗೇ 1, 2, 3 ಎಂದು ಭಾಗಗಳನ್ನು ಸೇರಿಸುತ್ತಾ, ಹೊಸ ಹೊಸ ಕಥೆಗಳನ್ನು ಹೇಳುತ್ತಾ ಸಾಗಿದ್ದಾರೆ. ಅಂದಹಾಗೆ, ಈ ಪ್ಲ್ಯಾನ್​ ಬಾಲಿವುಡ್​ನಲ್ಲಿ ದೊಡ್ಡ ಮಟ್ಟದಲ್ಲಿ ವರ್ಕೌಟ್​ ಆಗುತ್ತಿದೆ.

ಈ ವರ್ಷ ಇದುವರೆಗೆ 70 ಹಿಂದಿ ಸಿನಿಮಾಗಳು ತೆರೆಗೆ ಬಂದಿವೆ. ಅವುಗಳಲ್ಲಿ "ಧುರಂಧರ್​ 2 & ದ ರಿವೆಂಜ್​' ಬಾಕ್ಸಾಫಿಸಿನಲ್ಲಿ ಹೊಸ ದಾಖಲೆ ನಿರ್ಮಿಸಿದ್ದು, "ಬಾರ್ಡರ್​ 2', "ಮರ್ದಾನಿ 3', "ಪತಿ ಪತ್ನಿ ಔರ್​ ವೋಹ್​ ದೋ', "ದ ಕೇರಳ ಸ್ಟೋರಿ 2' 2026ರ ಟಾಪ್​ 10 ಚಿತ್ರಗಳಲ್ಲಿ ಸ್ಥಾನ ಪಡೆದಿವೆ. ಅರ್ಥಾತ್​ ಇದುವರೆಗೆ ಅತಿ ಹೆಚ್ಚು ಗಳಿಕೆ ಮಾಡಿಕೊಂಡ ಶೇಕಡ 50ರಷ್ಟು ಸಿನಿಮಾಗಳು ಸೀಕ್ವೆಲ್​ಗಳು ಎಂಬುದು ವಿಶೇಷ. ಅಲ್ಲದೇ "ವಧ್​ 2', "ಗಿನ್ನಿ ವೆಡ್ಸ್​ ಸನ್ನಿ 2', "ಹಾಂಟೆಡ್​ 3ಡಿ - ಎಕೋಸ್​ ಆಫ್​ ದ ಪಾಸ್ಟ್​' ಕೂಡ ಈಗಾಗಲೇ ಬಿಡುಗಡೆಯಾಗಿರುವ ಇತರೆ ಸೀಕ್ವೆಲ್​ಗಳು. ಇನ್ನು ನಾಳೆ ಶಾಹಿದ್​ ಕಪೂರ್​, ರಶ್ಮಿಕಾ ಮಂದಣ್ಣ ಮತ್ತು ಕೃತಿ ಸನನ್​ ನಟಿಸಿರುವ "ಕಾಕ್​ಟೇಲ್​ 2' ತೆರೆಗೆ ಬರಲಿದ್ದು, "ವೆಲ್ಕಮ್​ ಟು ದ ಜಂಗಲ್​', "ಧಮಾಲ್​ 4', "ಆವಾರಾಪನ್​ 2', "ಖೋಸ್ಲಾ ಕಾ ಘೋಸ್ಲಾ 2', "ದೃಶ್ಯಂ 3', "ಲಕಡ್​ಬಗ್ಗಾ 2 & ದ ಮಂಕಿ ಬಿಜಿನೆಸ್​' ಕೂಡ ಇನ್ನು ಆರು ತಿಂಗಳಲ್ಲಿ ತೆರೆಗೆ ಬರಲಿವೆ. ಅಲ್ಲಿಗೆ ಈ ವರ್ಷ ಬರೋಬ್ಬರಿ 18 ಸೀಕ್ವೆಲ್​ಗಳು ರಿಲೀಸ್​ ಆಗಲಿವೆ ಎನ್ನಲಾಗಿದೆ.

ಇತ್ತೀಚಿನ ವರ್ಷಗಳಲ್ಲಿ ಸೀಕ್ವೆಲ್​ಗಳ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಗಣನೀಯವಾಗಿ ಏರಿಕೆ ಕಂಡಿದೆ. 2023ರ ಟಾಪ್​ 10 ಚಿತ್ರಗಳಲ್ಲಿ "ಗದರ್​ 2', "ಟೈಗರ್​ 3', "ಓ ಮೈ ಗಾಡ್​ 2' ಸ್ಥಾನ ಗಳಿಸಿದ್ದವು. 2024ರಲ್ಲಿ ಅತಿಹೆಚ್ಚು ಗಳಿಕೆ ಮಾಡಿಕೊಂಡ ಟಾಪ್​ ಮೂರು ಸಿನಿಮಾಗಳು "ಸ್ತ್ರೀ 2', "ಭೂಲ್​ ಭುಲಯ್ಯಾ 3' ಹಾಗೂ "ಸಿಂಂ ಅಗೇನ್​' ಸೀಕ್ವೆಲ್​ಗಳಾಗಿದ್ದವು. ಹಾಗೇ ಆ ವರ್ಷ ರಿಲೀಸ್​ ಆದ ಎಂಟು ಸೀಕ್ವೆಲ್​ಗಳ ಪೈಕಿ ನಾಲ್ಕು ಟಾಪ್​ ಹತ್ತು ಗಳಿಕೆ ಮಾಡಿಕೊಂಡ ಚಿತ್ರಗಳ ಸಾಲಿನಲ್ಲಿದ್ದವು. ಹೀಗಾಗಿ 2025ರಲ್ಲಿ ಮತ್ತಷ್ಟು ಸೀಕ್ವೆಲ್​ಗಳು ತೆರೆಗೆ ಬಂದವು. "ವಾರ್​ 2', "ರೇಡ್​ 2' ಮತ್ತು "ಹೌಸ್​ುಲ್​ 5' ಹೀಗೆ ಮೂರು ಸೀಕ್ವೆಲ್​ಗಳು 2025ರ ಟಾಪ್​ 10 ಸಿನಿಮಾಗಳಲ್ಲಿ ಸ್ಥಾನ ಪಡೆದಿದ್ದವು. ಹಾಗೇ ಕಳೆದ ವರ್ಷ ರಿಲೀಸ್​ ಆದ 135 ಚಿತ್ರಗಳ ಪೈಕಿ "ಛೋರಿ 2', "ಕೇಸರಿ 2', "ರೋಮಿಯೋ 3', "ಮೆಟ್ರೋ ಇನ್​ ದಿನೋ', "ಧಡಕ್​ 2', "ಸನ್​ ಆ್​ ಸರ್ದಾರ್​ 2', "ಅಂದಾಜ್​ 2', "ಬಾಘೀ 4', "ಜಾಲಿ ಎಲ್​ಎಲ್​ಬಿ 3', "ದೇ ದೇ ಪ್ಯಾರ್​ ದೇ 2', "ನಿಶಾಂಚಿ 2', "ಮಸ್ತೀ 4', "ಕಿಸ್​ ಕಿಸ್​ ಕೋ ಪ್ಯಾರ್​ ಕರೂ 2'... ಹೀಗೆ 16 ಸೀಕ್ವೆಲ್​ಗಳಾಗಿದ್ದವು. ಅರ್ಥಾತ್​ ಶೇಕಡಾ 12ರಷ್ಟು ಸಿನಿಮಾಗಳು ಮುಂದುವರಿದ ಭಾಗವಾಗಿದ್ದವು.

ಕನ್ನಡದಲ್ಲೂ "ಕೆಜಿಎ್​', "ಕಾಂತಾರ' ಸರಣಿಗಳು ದಾಖಲೆ ಗಳಿಕೆ ಮಾಡಿಕೊಂಡಿವೆ. ಆ ಚಿತ್ರಗಳಿಗೆ ಹೋಲಿಸಿದರೆ ಕಡಿಮೆ ಬಜೆಟ್​ನಲ್ಲಿ ಮೂಡಿಬಂದಿದ್ದರೂ "ಲವ್​ ಮಾಕ್ಟೇಲ್​' ಸರಣಿಯ ಮೂರು ಚಿತ್ರಗಳು ಬಾಕ್ಸಾಫಿಸಿನಲ್ಲಿ ಗೆದ್ದು ಬೀಗಿವೆ. ಈ ವರ್ಷ "ಲವ್​ ಮಾಕ್ಟೇಲ್​ 3', "ಸೆಕೆಂಡ್​ ಕೇಸ್​ ಆಫ್​ ಸೀತಾರಾಮ್​' ಗೆಲುವಿನ ನಗೆ ಬೀರಿದ್ದು, ಜತೆಗೆ "ಮೆಜೆಸ್ಟಿಕ್​ 2', "ಶ್ರೀ ಜಗನ್ನಾಥ ದಾಸರು 2' ಕೂಡ ರಿಲೀಸ್​ ಆಗಿವೆ.