ಎಚ್​ಐವಿ ಸೋಂಕಿತ ಯುವಕನ 'ಆಕಾಶ'ದೆತ್ತರದ ಸಾಧನೆ; ಇಡೀ ಯುರೋಪ್​ನಲ್ಲೇ ಮೊದಲು ಇದು...

ಲಂಡನ್​: ಆತ 31ವರ್ಷದ ಯುವಕ. ಎಚ್​ಐವಿ ಸೋಂಕಿತ. ಆದರೆ ಕೊರಗುತ್ತ ಕುಳಿತುಕೊಳ್ಳದೆ ಹೊಸ ದಾಖಲೆಯೊಂದನ್ನು ನಿರ್ಮಿಸಿದ್ದಾರೆ.

ಇನ್ನು ಕೆಲವೇ ದಿನಗಳಲ್ಲಿ ಲೊಗಾನೈರ್​ ಸ್ಕಾಟಿಷ್​​ ಏರ್​ಲೈನ್​ನಲ್ಲಿ ಕಮರ್ಷಿಯಲ್​ ಪೈಲಟ್​ ಆಗಿ ಕೆಲಸ ಮಾಡಲು ಸಜ್ಜಾಗಿದ್ದಾರೆ.

ಈ ಮೂಲಕ ಯುರೋಪ್​ನ ಮೊದಲ ಎಚ್​ಐವಿ ಪೀಡಿತ ಕಮರ್ಷಿಯಲ್ ಪೈಲಟ್​ ಎನಿಸಿಕೊಳ್ಳಲಿದ್ದಾರೆ. ಇದೊಂದು ಹೆಮ್ಮೆಯೇ ಅಲ್ಲವೇ?

ಎಚ್​ಐವಿ ಎಂದರೇ ಭಯಾನಕ. ಅದೆಷ್ಟೋ ಜನರು ಈ ರೋಗದ ಹೆಸರು ಕೇಳುತ್ತಲೇ ಆತಂಕ್ಕೆ ಒಳಗಾಗುತ್ತಾರೆ. ಕುಗ್ಗಿ ಹೋಗುತ್ತಾರೆ. ಅಂಥದ್ದರಲ್ಲಿ ಯುವಕ ತನ್ನ ಆರೋಗ್ಯ ಹಾಳಾಗುತ್ತಿದ್ದರೂ ಲೆಕ್ಕಿಸದೆ, ಕೊರಗದೆ ಪೈಲಟ್​ ಆಗಿದ್ದು...!

ಇಂಗ್ಲೆಂಡ್​ನ ಸ್ಟೋಕ್​ ಆನ್​ ಟ್ರೆಂಟ್​ನ ಜೇಮ್ಸ್​ ಬುಶೆ ಎಂಬ ಯುವಕನೇ ಈ ಸಾಧನೆ ಮಾಡಿದ್ದು. ಪೈಲಟ್ ಆಗಲು ಅಗತ್ಯವಿದ್ದ ತರಬೇತಿಗಳು ಮುಕ್ತಾಯವಾಗಿದ್ದು ಶೀಘ್ರದಲ್ಲೇ ಗ್ಲ್ಯಾಸ್ಗೋ ಏರ್​ಪೋರ್ಟ್​ನಿಂದ ಸಂಚಾರ ಮಾಡುವ ಲೊಗಾನೈರ್​ ವಿಮಾನಗಳಲ್ಲಿ ಕರ್ತವ್ಯ ನಿರ್ವಹಿಸಲಿದ್ದಾರೆ.

ಎಚ್​ಐವಿ ಸೋಂಕು ತಗುಲಿರುವ ಈ ಯುವಕನನನ್ನು ಪೈಲಟ್​ ಆಗಿ ನೇಮಕ ಮಾಡಿಕೊಳ್ಳಲು ನಾಗರಿಕ ವಿಮಾನಯಾನ ಪ್ರಾಧಿಕಾರ ಮೊದಲು ಹಿಂದೇಟು ಹಾಕಿತು. ಆದರೆ ಬಳಿಕ ಈ ಯುವಕನಿಗಾಗಿ ತನ್ನ ನಿಯಮಗಳನ್ನೇ ಬದಲಿಸಿಕೊಂಡು, ಒಪ್ಪಿಗೆ ಸೂಚಿಸಿದೆ.

ಬುಶೆ ಅವರು ತಮ್ಮ ಬಗ್ಗೆ ಟ್ವಿಟರ್​ನಲ್ಲಿ ಹೇಳಿಕೊಂಡಿದ್ದಾರೆ. ಪೈಲಟ್​ ಅಂಥೋನಿ ಎಂಬ ಹೆಸರಿನಲ್ಲಿರುವ ತಮ್ಮ ಟ್ವಿಟರ್​ ಖಾತೆಯಲ್ಲಿ ಸಂಪೂರ್ಣವಾಗಿ ವಿವರಣೆ ಬರೆದಿದ್ದಾರೆ.

ನಾನು ಲೊಗಾನೈರ್​ಗೆ ಸದಾ ಕೃತಜ್ಞನಾಗಿರುತ್ತೇನೆ. ಏನು ಹೇಳಬೇಕು ಗೊತ್ತಾಗದಷ್ಟು ಭಾವಪರವಶನಾಗಿದ್ದೇನೆ. ನನ್ನ ಪಾಲಿಗೆ ಇದು ಹೆಮ್ಮೆಯ ಕ್ಷಣ ಎಂದು ಸಂತೋಷ ವ್ಯಕ್ತಪಡಿಸಿದ್ದಾರೆ.
ಬರೀ ನಾನೊಬ್ಬನಲ್ಲ, ನನ್ನಂತೆ ಅದೆಷ್ಟೋ ಜನ ಎಚ್​ಐವಿ ಸೋಂಕಿಗೆ ಒಳಗಾದವರು ಇದ್ದಾರೆ. ಅವರೆಲ್ಲರೂ ತಮ್ಮ ಕನಸುಗಳನ್ನು ನನಸಾಗಿಸಿಕೊಳ್ಳಲು ಮುಂದಾಗಬೇಕು. ತಮ್ಮ ಪರಿಸ್ಥಿತಿಯಿಂದ ನಿಯಂತ್ರಣಕ್ಕೆ ಒಳಗಾದವರು ಅದನ್ನು ಮೀರಲು ಸಿದ್ಧರಾಗಬೇಕು ಎಂದು ಉತ್ಸಾಹ ತುಂಬುವ ವಾಕ್ಯಗಳನ್ನು ಬರೆದಿದ್ದಾರೆ.

ಬುಶೆ ಅವರಿಗೆ ಕಳೆದ 5 ವರ್ಷಗಳ ಹಿಂದೆ ಎಚ್​ಐವಿ ಸೋಂಕು ಇರುವುದು ಗೊತ್ತಾಯಿತು. ಆದರೆ ಅವರು ತಮ್ಮ 15ನೇ ವರ್ಷದಿಂದಲೇ ಸಣ್ಣ ಏರ್​ಕ್ರಾಫ್ಟ್​ಗಳಲ್ಲಿ ಹಾರಾಟ ನಡೆಸುವುದನ್ನು ಕಲಿಯುತ್ತಿದ್ದರು. ಯಾಕೆಂದರೆ ಪೈಲಟ್ ಆಗಬೇಕು ಎನ್ನುವುದು ಅವರ ಬಾಲ್ಯದ ಕನಸಾಗಿತ್ತು.

ಆದರೆ ಅವರು ಎಚ್​ಐವಿ ಪೀಡಿತರಾಗಿದ್ದಾರೆ ಎಂದು ವೈದ್ಯಕೀಯ ವರದಿಯಲ್ಲಿ ನೋಡಿದ ನಾಗರಿಕ ವಿಮಾನಯಾನ ಪ್ರಾಧಿಕಾರ ಬುಶೆ ಅವರಿಗೆ ತರಬೇತಿ ನೀಡಲೂ ನಿರಾಕರಿಸಿತ್ತು. ಯುರೋಪಿಯನ್​ ವಿಮಾನಯಾನ ಸುರಕ್ಷತಾ ಪ್ರಾಧಿಕಾರದ ನಿಯಮದ ಅನ್ವಯ ಇದು ಸಾಧ್ಯವಿಲ್ಲ ಎಂದು ಹೇಳಿತ್ತು. ಆದರೆ ಬಳಿಕ ತನ್ನ ಯುಕೆದಲ್ಲಿ ತನ್ನ ನಿಯಮಗಳನ್ನು ಸಡಿಲಿಸಿಕೊಂಡು ಅವಕಾಶ ಕೊಟ್ಟಿದೆ. ನವೆಂಬರ್​ನಿಂದಲೂ ಬುಶೆ ಅವರು ಟ್ರೇನಿಂಗ್​ ಪಡೆಯುತ್ತಿದ್ದು ಈಗ ಪೈಲಟ್​ ಆಗಲು ಅರ್ಹತೆ ಪಡೆದಿದ್ದಾರೆ.

ನಾನು ಈ ರೋಗವನ್ನು ಮರೆಯಬೇಕು. ನನ್ನ ಜೀವನಕ್ಕಾಗಲೀ, ಆರೋಗ್ಯಕ್ಕಾಗಿ ಎಚ್​ಐವಿ ಸೋಂಕಿನಿಂದ ಯಾವುದೇ ತೊಂದರೆಯಾಗುವುದಿಲ್ಲ ಎಂದು ಬುಶೆ ಅವರು ಆತ್ಮವಿಶ್ವಾಸದಿಂದ ಹೇಳಿದ್ದಾರೆ. ಹಾಗೂ ಕೆಲಸಕ್ಕೆ ಸೇರಲು ಉತ್ಸುಕರಾಗಿದ್ದಾರೆ.(ಏಜೆನ್ಸೀಸ್)