ಕರೊನಾ ನೆರವಿನ ಹೆಸರಲ್ಲೇ ವಾಟ್ಸ್ಆಪ್, ಮೇಸೆಂಜರ್, ಇ-ಮೇಲ್ಗಳ ಮೂಲಕ ಬರುತ್ತಿರುವ ಲಿಂಕ್ಗಳಿಗಂತೂ ಲೆಕ್ಕವೇ ಇಲ್ಲ. ಈ ಲಿಂಕ್ ಕ್ಲಿಕ್ ಮಾಡಿದರೆ ಬ್ಯಾಂಕ್ ಖಾತೆ ವಿವರ, ಮೊಬೈಲ್ ನಂಬರ್ ಇತ್ಯಾದಿಗಳಿಗೆ ಉತ್ತರಿಸುವಂತೆ ಕೇಳಲಾಗುತ್ತದೆ. ನಿಜವೆಂದು ಭಾವಿಸಿ ವಿವರ ತುಂಬಿದರೆ ಖಾತೆಯನ್ನೇ ಹ್ಯಾಕ್ ಮಾಡಿ, ಹಣ ಲಪಟಾಯಿಸಲಾಗುತ್ತಿದೆ. ವಂಚಕರಿಗೆ ಇದು ಸುಲಭಮಾರ್ಗವಾಗಿ ಪರಿಣಮಿಸಿದೆ.ಹೊಸರೂಪದ ವಂಚನೆಯೊಂದು ಬೆಳಕಿಗೆ ಬಂದಿರುವುದು ಪರಿಸ್ಥಿತಿಯ ಗಂಭೀರತೆಗೆ ಸಾಕ್ಷಿ. ಅದೇನೆಂದರೆ, ಕರೊನಾ ಸೋಂಕಿಗೆ ಚಿಕಿತ್ಸೆ ನೀಡುತ್ತಿರುವ ಪ್ರಮುಖ, ಪ್ರತಿಷ್ಠಿತ ಆಸ್ಪತ್ರೆಗಳನ್ನೇ ಗುರಿಯಾಗಿಸಿ, ಅಲ್ಲಿನ ರೋಗಿಗಳ ಚಿಕಿತ್ಸಾ ವಿವರ, ಅಂಕಿಅಂಶಗಳನ್ನು ಒಳಗೊಂಡ ಕಂಪ್ಯುಟರ್ಗಳನ್ನು ಹ್ಯಾಕ್ ಮಾಡಿ, ‘ಡಿಜಿಟಲ್ ಲಾಕ್’ ಹಾಕುತ್ತಿದ್ದಾರೆ ವಂಚಕರು. ಬಳಿಕ, ಆಸ್ಪತ್ರೆಗಳಿಗೆ ಫೋನ್ ಮಾಡಿ ದೊಡ್ಡ ಮೊತ್ತಕ್ಕೆ ಬೇಡಿಕೆ ಇಟ್ಟು, ಹಣ ಪಾವತಿಸಿದರಷ್ಟೇ, ನಿಮ್ಮ ಮಾಹಿತಿಗಳು ವಾಪಸ್ ಸಿಗುತ್ತವೆ ಎಂದು ಬೆದರಿಕೆ ಹಾಕುತ್ತಿದ್ದಾರೆ. ರೋಗಿಗಳ ವಿವರ, ಚಿಕಿತ್ಸಾಮಾಹಿತಿಯನ್ನು ಇದು ಒಳಗೊಂಡಿರುವುದರಿಂದ ವೈದ್ಯರಿಗೆ, ಆಸ್ಪತ್ರೆಗಳಿಗೆ ಈ ಸಂಗತಿಗಳು ಮುಖ್ಯವಾಗುತ್ತವೆ. ಮುಂದಿನ ಚಿಕಿತ್ಸೆ ಮುಂದುವರಿಸಲು ತುಂಬ ಕಷ್ಟ. ಹಾಗಾಗಿ, ಇಂಥ ವಂಚಕರ ಬೆದರಿಕೆಗೆ ಮಣಿದು, ದುಡ್ಡು ನೀಡಿ, ಕಂಪ್ಯೂಟರ್ ಹ್ಯಾಕಿನಿಂದ ಮುಕ್ತಿ ಪಡೆಯುವ ಅನಿವಾರ್ಯತೆ ಸೃಷ್ಟಿಯಾಗುತ್ತದೆ. ಹಲವು ದೇಶಗಳಲ್ಲಿ ಇಂಥ ಪ್ರಕರಣಗಳು ವರದಿ ಆಗಿರುವ ಹಿನ್ನೆಲೆಯಲ್ಲಿ ಆಸ್ಪತ್ರೆಗಳಿಗೆ ಜಾಗ್ರತೆ ವಹಿಸುವಂತೆ ಸೂಚಿಸಲಾಗಿದೆ. ಕರೊನಾ ಸಂಕಷ್ಟವನ್ನು ನಿವಾರಿಸುವ ಭರದಲ್ಲಿ ಇಂಥ ವಿಷಯಗಳು ಗೌಣವಾದರೆ, ವಂಚಕರಿಗೆ ಮತ್ತಷ್ಟು ಲಾಭ. ಹಾಗಾಗದಿರಲಿ. ಸೈಬರ್ ಸುರಕ್ಷತೆ ಹೆಚ್ಚಿಸಲು ಸಂಬಂಧಪಟ್ಟ ಇಲಾಖೆ ಮತ್ತು ಅಧಿಕಾರಿಗಳು ಸೂಕ್ತ ಕ್ರಮಕ್ಕೆ ಮುಂದಾಗಲಿ.
