754 ಕೋಟಿ ರೂ. ಬ್ಯಾಂಕ್ ಹಗರಣದಲ್ಲಿ ಮಾಜಿ ಶಾಸಕನ ಬಂಧನ! bank loan fraud case

ಉತ್ತರಪ್ರದೇಶ: (bank loan fraud case ) ಮಾಜಿ ಶಾಸಕ ಮತ್ತು ಪೂರ್ವಾಂಚಲ್ ಮುಖ್ಯಸ್ಥ ವಿನಯ್ ಶಂಕರ್ ತಿವಾರಿ ಅವರನ್ನು ಜಾರಿ ನಿರ್ದೇಶನಾಲಯ (ED) ಬಂಧಿಸಿದೆ.

ಬ್ಯಾಂಕುಗಳು ಸುಮಾರು  754 ಕೋಟಿ ರೂಪಾಯಿ ನಷ್ಟ ಉಂಟುಮಾಡಿದ ಪ್ರಮುಖ ಬ್ಯಾಂಕ್ ಹಗರಣಕ್ಕೆ ಸಂಬಂಧಿಸಿದ ಪ್ರಕರಣದ ತನಿಖೆ ನಡೆಸುತ್ತಿರುವ ಇಡಿ, ಅವರನ್ನು ವಶಕ್ಕೆ ಪಡೆದಿರುವುದಾಗಿ ತಿಳಿಸಿದೆ.

ವಿನಯ್ ಶಂಕರ್ ತಿವಾರಿಯವರನ್ನು ಲಕ್ನೋದಲ್ಲಿರುವ ಅವರ ಮನೆಯಲ್ಲಿ ಇಡಿ ಬಂಧಿಸಿದೆ. ಮಾಜಿ ಶಾಸಕರಲ್ಲದೆ ಗಂಗೋತ್ರಿ ಎಂಟರ್‌ಪ್ರೈಸಸ್‌ನ ಜನರಲ್ ಮ್ಯಾನೇಜರ್ ಅಜಿತ್ ಪಾಂಡೆಯವರನ್ನೂ ಜಾರಿ ನಿರ್ದೇಶನಾಲಯದ ಅಧಿಕಾರಿಗಳು ಬಂಧಿಸಿದ್ದಾರೆ. ಸೋಮವಾರ ತಿವಾರಿಯವರ ಗೋರಖ್‌ಪುರ, ಲಕ್ನೋ, ದೆಹಲಿ, ಮುಂಬೈ ಸೇರಿದಂತೆ 10ಕ್ಕೂ ಹೆಚ್ಚು ಸ್ಥಳಗಳಲ್ಲಿ ಇಡಿ ದಾಳಿ ನಡೆಸಿತ್ತು. ತಡರಾತ್ರಿಯವರೆಗೆ ನಡೆದ ಕಾರ್ಯಾಚರಣೆಯ ನಂತರ ಅವರನ್ನು ಬಂಧಿಸಲಾಗಿದೆ. ಇಡಿಯವರು ವಿನಯ್ ಶಂಕರ್ ತಿವಾರಿಯವರ ಸಂಬಂಧಿ ಮಹಾರಾಜಗಂಜ್‌ನ ಜಿಲ್ಲಾ ಪಂಚಾಯತ್ ಸದಸ್ಯ ದೀಪಕ್ ಪಾಂಡೆಯವರ ಮನೆ ಮೇಲೂ ದಾಳಿ ನಡೆಸಿದೆ.

 ತಿವಾರಿ ಕುಟುಂಬದ ಗಂಗೋತ್ರಿ ಎಂಟರ್‌ಪ್ರೈಸಸ್‌ನ ಸುಮಾರು 30.86 ಕೋಟಿ ರೂಪಾಯಿ ಮೌಲ್ಯದ 12 ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಂಡಿದ್ದಾರೆ. ಗಂಗೋತ್ರಿ ಎಂಟರ್‌ಪ್ರೈಸ್ ತಿವಾರಿ ಕುಟುಂಬಕ್ಕೆ ಸೇರಿದ ಕಂಪನಿಯಾಗಿದೆ. ಕಳೆದ ವರ್ಷ ಮಾರ್ಚ್ 18, 2024 ರಂದು ಇಡಿ  ಕ್ರಮ     ಕೈಗೊಂಡಿತ್ತು. ಗಂಗೋತ್ರಿ ಎಂಟರ್‌ಪ್ರೈಸಸ್ ಬ್ಯಾಂಕ್ ಆಫ್ ಇಂಡಿಯಾ ಕ್ಲಸ್ಟರ್‌ನಿಂದ 754 ಕೋಟಿ ರೂಪಾಯಿಗಳ ವಂಚನೆ ಮಾಡಿದ್ದಾರೆ ಎಂಬ ಆರೋಪವಿದೆ. ಈ ಪ್ರಕರಣದಲ್ಲಿ ಜಾರಿ ನಿರ್ದೇಶನಾಲಯವು ರೀತಾ ತಿವಾರಿಯವರನ್ನು ಮುಖ್ಯ ಆರೋಪಿಯನ್ನಾಗಿ ಮಾಡಿದೆ. ರೀತಾ ತಿವಾರಿ ಮಾಜಿ ಶಾಸಕ ವಿನಯ್ ಶಂಕರ್ ತಿವಾರಿಯವರ ಪತ್ನಿ. ಇದರ ಜೊತೆಗೆ ಅಜಿತ್ ಪಾಂಡೆ, ಕಂಪನಿಯ ಪ್ರವರ್ತಕರು, ನಿರ್ದೇಶಕರು,  ರಾಯಲ್ ಎಂಪೈರ್ ಮಾರ್ಕೆಟಿಂಗ್ ಪ್ರೈವೇಟ್ ಲಿಮಿಟೆಡ್, ಕಂದರ್ಪ್ ಕನ್‌ಸ್ಟ್ರಕ್ಷನ್ ಪ್ರೈವೇಟ್ ಲಿಮಿಟೆಡ್ ವಿರುದ್ಧವೂ ಪ್ರಕರಣ ದಾಖಲಿಸಲಾಗಿದೆ.

ಗಂಗೋತ್ರಿ ಎಂಟರ್‌ಪ್ರೈಸಸ್‌ನ ನಿರ್ದೇಶಕರು, ಪ್ರವರ್ತಕರು ಮತ್ತು ಖಾತರಿದಾರರು ಶಾಮೀಲಾಗಿ ಬ್ಯಾಂಕುಗಳಿಂದ ಪಡೆದ 754 ಕೋಟಿ ರೂಪಾಯಿಗಳ ನಗದು ಸಾಲದ  ವಂಚನೆ ನಡದಿದೆ ಎಂದು ಇಡಿ  ಆರೋಪಿಸಿದೆ. ಬ್ಯಾಂಕ್ ಆಫ್ ಇಂಡಿಯಾದ 7 ಕನ್ಸೋರ್ಟಿಯಂನಿಂದ ಕಂಪನಿಯು 1129.44 ಕೋಟಿ ರೂಪಾಯಿಗಳ ನಗದು ಸಾಲದ ಮಿತಿಯನ್ನು ಪಡೆದುಕೊಂಡಿದೆ ಎಂದು ಇಡಿ ಹೇಳಿದೆ. ಈ ನಗದು ಮಿತಿಯನ್ನು ಸಹವರ್ತಿ ಕಂಪನಿಗಳಿಗೆ ವರ್ಗಾಯಿಸಿ ಖಾಸಗಿ ಆಸ್ತಿಗಳನ್ನು ಖರೀದಿಸಲಾಗಿದೆ. ಇದರಲ್ಲಿ ಮಾಜಿ ಶಾಸಕ ವಿನಯ್ ಶಂಕರ್, ರೀತಾ ತಿವಾರಿ ಮತ್ತು ಅಜಿತ್ ಪಾಂಡೆ ಮುಖ್ಯ ಆರೋಪಿಗಳಾಗಿದ್ದಾರೆ. ಬ್ಯಾಂಕುಗಳ ದೂರಿನ ಆಧಾರದ ಮೇಲೆ ಸಿಬಿಐ ಪ್ರಕರಣ ದಾಖಲಿಸಿತ್ತು. ಸಿಬಿಐನ ಎಫ್‌ಐಆರ್ ಆಧಾರದ ಮೇಲೆ ಇಡಿಯವರು ಮನಿ ಲಾಂಡರಿಂಗ್ ಪ್ರಕರಣವನ್ನು ದಾಖಲಿಸಿದ್ದರು. ಇಡಿಯವರು ಈವರೆಗೆ ಈ ಪ್ರಕರಣದಲ್ಲಿ 103 ಕೋಟಿ ರೂಪಾಯಿ ಮೌಲ್ಯದ ಆಸ್ತಿಯನ್ನು ಮುಟ್ಟುಗೋಲು ಹಾಕಿಕೊಂಡಿದ್ದಾರೆ.

ಗಂಗೋತ್ರಿ ಎಂಟರ್‌ಪ್ರೈಸಸ್ ಲಿಮಿಟೆಡ್‌ಗೆ ಸಂಬಂಧಿಸಿದ ದಾಖಲೆಗಳು ಮತ್ತು ಬ್ಯಾಂಕ್ ದಾಖಲೆಗಳನ್ನು ಪರಿಶೀಲಿಸಿದ ನಂತರ, ಸಾಲವನ್ನು ದುರುಪಯೋಗಪಡಿಸಿಕೊಳ್ಳಲಾಗಿದೆ ಮತ್ತು ಕಂಪನಿಗಳ ನಡುವೆ ಹಣವನ್ನು ವರ್ಗಾಯಿಸುವ ಮೂಲಕ ವಂಚನೆ ಮಾಡಲಾಗಿದೆ ಎಂದು ED ಕಂಡುಹಿಡಿದಿದೆ. ಈ ಪ್ರಕರಣದ ತನಿಖೆಯ ಭಾಗವಾಗಿ, ಸೋಮವಾರ (ಏಪ್ರಿಲ್ 7) ಮಾಜಿ ಶಾಸಕ ವಿನಯ್ ಶಂಕರ್ ತಿವಾರಿ ಅವರಿಗೆ ಸೇರಿದ ಹಲವಾರು ಸ್ಥಳಗಳಲ್ಲಿ ಇಡಿ ದಾಳಿ ನಡೆಸಿತು.  ಇಡಿ ತಂಡವು ಸುದೀರ್ಘ ತನಿಖೆಯ ನಂತರ ವಿನಯ್ ಶಂಕರ್ ತಿವಾರಿ ಅವರನ್ನು ಬಂಧಿಸಿತು.

ವಿನಯ್ ಶಂಕರ್ ತಿವಾರಿ ಮಾಜಿ ಸಚಿವ ಮತ್ತು ಪ್ರಮುಖ ಪೂರ್ವಾಂಚಲ್ ನಾಯಕ ಹರಿಶಂಕರ್ ತಿವಾರಿ ಅವರ ಪುತ್ರ. ತಿವಾರಿ ಕುಟುಂಬದ ಹೆಸರು ಬಹಳ ಹಿಂದಿನಿಂದಲೂ ಪೂರ್ವಾಂಚಲ್‌ನಲ್ಲಿ ರಾಜಕೀಯ ಮತ್ತು ಅಧಿಕಾರದ ಕೇಂದ್ರವಾಗಿದೆ. ವಿನಯ್ ಶಂಕರ್ ಅವರು ಗೋರಖ್‌ಪುರ ಜಿಲ್ಲೆಯ ಚಿಲ್ಲುಪರ್ ಕ್ಷೇತ್ರವನ್ನು ಶಾಸಕರಾಗಿ ಪ್ರತಿನಿಧಿಸಿದ್ದರು. ಅದು ಸಮಾಜವಾದಿ ಪಕ್ಷ ಮತ್ತು ಬಹುಜನ ಸಮಾಜ ಪಕ್ಷದೊಂದಿಗೆ ಸಂಬಂಧ ಹೊಂದಿದೆ.