ಎಲೆಕ್ಟ್ರಿಕ್ ವಾಹನ ಮಾರಾಟ ಹೆಚ್ಚಳ

ನವದೆಹಲಿ: ಎಲೆಕ್ಟ್ರಿಕ್ ಪ್ಯಾಸೆಂಜರ್ ವಾಹನಗಳ ಚಿಲ್ಲರೆ ಮಾರಾಟ ಜುಲೈನಲ್ಲಿ ಶೇ. 93ರಷ್ಟು ಏರಿಕೆಯಾಗಿದೆ ಎಂದು ಫೆಡರೇಶನ್ ಆಫ್ ಆಟೋಮೊಬೈಲ್ ಡೀಲರ್ಸ್ ಅಸೋಸಿಯೇಷನ್ಸ್ (ಫಾಡಾ) ಶುಕ್ರವಾರ ತಿಳಿಸಿದೆ. ಕಳೆದ ತಿಂಗಳು ಒಟ್ಟು ಎಲೆಕ್ಟ್ರಿಕ್ ಪ್ಯಾಸೆಂಜರ್ ವಾಹನ ನೋಂದಣಿ 15,528 ಯೂನಿಟ್​ಗಳಿಗೆ ಏರಿಕೆಯಾಗಿದೆೆ. ಹಿಂದಿನ ವರ್ಷದ ಇದೇ ಅವಧಿಯಲ್ಲಿ ಇದು 8,037 ಯೂನಿಟ್ ಇತ್ತು. ಟಾಟಾ ಮೋಟಾರ್ಸ್ 6,047 ಯೂನಿಟ್​ಗಳ ಮಾರಾಟದೊಂದಿಗೆ ಮುಂಚೂಣಿಯಲ್ಲಿದೆ. ಕಳೆದ ವರ್ಷ ಜುಲೈನ 5,100 ಯೂನಿಟ್​ಗಳಿಗೆ ಹೋಲಿಸಿದರೆ ಇದು ಶೇ. 19ರಷ್ಟು ಏರಿಕೆ. ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳು ಜುಲೈನಲ್ಲಿ 1,02,973 ಮಾರಾಟ. ಕಳೆದ ವರ್ಷದ ಇದೇ ತಿಂಗಳಲ್ಲಿ 1,07,655 ಇ-ಬೈಕ್ ಮಾರಾಟವಾಗಿದ್ದವು.

ಅದಕ್ಕೆ ಹೋಲಿಸಿದರೆ ಇದು ಶೇ. 4ರ ಕುಸಿತವಾಗಿದೆ. ಟಿವಿಎಸ್ ಮೋಟಾರ್ ಕಂಪನಿಯ 22,256 ಯೂನಿಟ್​ಗಳ ನೋಂದಣಿ ಆಗಿದೆ. 2024ರ ಜುಲೈನಲ್ಲಿನ 19,655 ಯೂನಿಟ್ ಮಾರಾಟಕ್ಕೆ ಹೋಲಿಸಿದರೆ ಶೇ. 13ರಷ್ಟು ಏರಿಕೆ. ಎಲೆಕ್ಟ್ರಿಕ್ ತ್ರಿಚಕ್ರವಾಹನ ವಿಭಾಗ ಶೇ. 9ರಷ್ಟು ಬೆಳವಣಿಗೆಯಾಗಿದೆ. ಕಳೆದ ವರ್ಷದ ಜುಲೈನಲ್ಲಿ 63,675 ಯೂನಿಟ್ ಮಾರಾಟವಾಗಿದ್ದರೆ, ಈ ಜುಲೈನಲ್ಲಿ 69,146 ಯೂನಿಟ್ ಮಾರಾಟವಾಗಿವೆ. ಮಹೀಂದ್ರಾ ಗ್ರೂಪ್ 9,766 ಯೂನಿಟ್​ಗಳ ನೋಂದಣಿಯೊಂದಿಗೆ ಶೇ.40ರಷ್ಟು ಏರಿಕೆ ದಾಖಲು. ಎಲೆಕ್ಟ್ರಿಕ್ ವಾಣಿಜ್ಯ ವಾಹನ ಚಿಲ್ಲರೆ ಮಾರಾಟ ಜುಲೈನಲ್ಲಿ ಶೇ. 52ರ ಏರಿಕೆಯೊಂದಿಗೆ 1,244 ಯೂನಿಟ್​ಗಳಿಗೆ ತಲುಪಿದೆ. ಟಾಟಾ ಮೋಟಾರ್ಸ್ 333 ಯೂನಿಟ್​ಗಳ ನೋಂದಣಿಯೊಂದಿಗೆ ಈ ವಿಭಾಗದಲ್ಲಿ ಮುಂಚೂಣಿಯಲ್ಲಿದೆ ಎಂದು ಫಾಡಾ ಅಧ್ಯಕ್ಷ ಸಿ.ಎಸ್. ವಿಘ್ನೇಶ್ವರ್ ತಿಳಿಸಿದ್ದಾರೆ.

ಭಾರಿ ವಾಹನಗಳಿಗೆ ಪಿಎಂ ಇ-ಡ್ರೖೆವ್ 2 ವರ್ಷ ವಿಸ್ತರಣೆ: ಎಲೆಕ್ಟ್ರಿಕ್ ಬಸ್, ಇ-ಆಂಬುಲೆನ್ಸ್, ಇ-ಟ್ರಕ್​ಗಳಂತಹ ವಾಹನಗಳಿಗೆ 10,900 ಕೋಟಿ ರೂ. ಮೌಲ್ಯದ ಪಿಎಂ ಇ-ಡ್ರೖೆವ್ ಯೋಜನೆಯ ಪ್ರಯೋಜನವನ್ನು ಇನ್ನೂ 2 ವರ್ಷಗಳವರೆಗೆ ಕೇಂದ್ರ ಸರ್ಕಾರ ವಿಸ್ತರಿಸಿದೆ. ಪಿಎಂ ಎಲೆಕ್ಟ್ರಿಕ್ ಡ್ರೖೆವ್ ರೆವಲ್ಯೂಷನ್ ಇನ್ ಇನೊವೇಟಿವ್ ವೆಹಿಕಲ್ ಎನ್ಹಾನ್ಸ್​ಮೆಂಟ್ (ಪಿಎಂ ಇ-ಡ್ರೖೆವ್) ಯೋಜನೆಯ ಗೆಜೆಟ್ ಅಧಿಸೂಚನೆ ಪ್ರಕಾರ, ಯೋಜನೆಯ ನಿಬಂಧನೆಗಳು ಈಗ 2026ರ ಮಾರ್ಚ್ ಬದಲಿಗೆ 2028ರ ಮಾರ್ಚ್​ವರೆಗೆ ಜಾರಿಯಲ್ಲಿರುತ್ತವೆ. ಆದರೆ ನೋಂದಾಯಿತ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ, ಇ-ರಿಕ್ಷಾ, ಇ-ಕಾರ್ಟ್, ತ್ರಿಚಕ್ರ ವಾಹನಗಳಿಗೆ 2026ರ ಮಾರ್ಚ್ 31 ಅಂತಿಮ ದಿನಾಂಕವಾಗಿರುತ್ತದೆ.