ಏನಿದು ಎಲ್ ನಿನೋ?: ಎಲ್ ನಿನೋ ಹವಾಮಾನದ ಮೇಲೆ ಪರಿಣಾಮ ಬೀರುವ ಒಂದು ‘ವಾಯುಗುಣ ಚಕ್ರ’ವಾಗಿದೆ. ಪೆಸಿಫಿಕ್ ಮಹಾಸಾಗರದ ಉಷ್ಣವಲಯದ ಪಶ್ಚಿಮ ಭಾಗದಲ್ಲಿನ ಬಿಸಿ ನೀರು ಭೂ ಮಧ್ಯ ರೇಖೆಯ ಉದ್ದಕ್ಕೂ ಸಾಗಿ ದಕ್ಷಿಣ ಅಮೆರಿಕ ಕರಾವಳಿಯತ್ತ ಪೂರ್ವಾಭಿಮುಖವಾಗಿ ಸಾಗುತ್ತದೆ. ಈ ಮೂಲಕ ಎಲ್ ನಿನೋ ಹವಾಗುಣ ಚಕ್ರ ಆರಂಭವಾಗುತ್ತದೆ. ಸಾಗರದ ಬಿಸಿ ನೀರು ಸಾಮಾನ್ಯವಾಗಿ ಇಂಡೋನೇಷ್ಯಾ ಮತ್ತು ಫಿಲಿಪ್ಪೀನ್ಸ್ ಬಳಿ ಸಾಗಿ ಬರುತ್ತದೆ. ಆಗ ಏಷ್ಯಾಖಂಡ ಮತ್ತು ಭಾರತದ ಮೇಲೆ ಅದರ ಪರಿಣಾಮ ತಟ್ಟುತ್ತದೆ. ಭಾರತ ಮಾತ್ರವಲ್ಲದೆ ದಕ್ಷಿಣ ಅಮೆರಿಕ, ಇಂಡೋನೇಷ್ಯಾ ಮತ್ತು ಆಸ್ಟ್ರೇಲಿಯಾದಲ್ಲಿ ಕೂಡ ಎಲ್ ನಿನೋ ಪರಿಣಾಮ ಇರುತ್ತದೆ. ಕಾಡ್ಗಿಚ್ಚು, ಚಂಡಮಾರುತ ಮತ್ತು ಸುದೀರ್ಘ ಬರಗಾಲಗಳಿಗೆ ಕೂಡ ಅದು ಕಾರಣವಾಗುತ್ತದೆ. ಈ ಹವಾಮಾನ ವೈಪರೀತ್ಯ ಈಗಾಗಲೇ ಜಗತ್ತಿನ ಬಹುತೇಕ ಭಾಗದಲ್ಲಿ ಅನಾಹುತಗಳನ್ನು ಸೃಷ್ಟಿಸುತ್ತಿದೆ.
