ನಮ್ಮ ಅಹಂಕಾರವೇ ನಮಗೆ ಅತ್ಯಂತ ಪ್ರಿಯವಾಗಿರುವುದು. ಆದ್ದರಿಂದ ನಮ್ಮ ಅಹಂಕಾರಕ್ಕೆ ಯಾರೇ ನೋವನ್ನುಂಟು ಮಾಡಲಿ, ಆಗ ನಾವು ನಮ್ಮ ಮನಸಿನ ಮೇಲಿನ ಹಿಡಿತವನ್ನು ಕಳೆದುಕೊಳ್ಳುತ್ತೇವೆ. ಆಗ ನಮ್ಮ ಮಾತುಗಳು ನಮ್ಮ ಕರ್ಮಗಳು ಎಲ್ಲವೂ ಕಠೋರವಾಗಿರುತ್ತವೆ. ಯಾರು ತನ್ನ ಅಹಂಕಾರವನ್ನು ನಾಶಪಡಿಸಿಕೊಂಡಿರುವನೋ ಅವನನ್ನೇ ಜ್ಞಾನಿ ಎಂದು ಕರೆಯುವುದು. ಅವನ ಇಂದ್ರಿಯ, ಮನಸು, ಬುದ್ಧಿಗಳು ಅವನ ಹಿಡಿತದಲ್ಲಿರುತ್ತವೆ. ಅವನು ಎಂದೂ ಮನಸಿನ ಉದ್ವೇಗಕ್ಕೆ ಒಳಗಾಗದೆ ಇನ್ನೊಬ್ಬರಿಗೆ ನೋವಾಗುವಂತಹ ಕರ್ಮಗಳನ್ನಾಗಲಿ, ಮಾತುಗಳನ್ನಾಗಲಿ ಆಡುವುದಿಲ್ಲ. ಆದ್ದರಿಂದಲೇ ಸುಭಾಷಿತಕಾರ ಇಂತಹವನನ್ನು ಸಾಧುಗಳಲ್ಲಿಯೇ ಅತ್ಯುತ್ತಮ ಎಂದು ಹೇಳಿದ್ದಾನೆ.
