‘ರಸ್ತೆ, ಜಲಮೂಲ, ರೈಲು ಹಳಿಗಳಂತಹ ಯಾವುದೇ ಸಾರ್ವಜನಿಕ ಸ್ಥಳಗಳನ್ನು ಅತಿಕ್ರಮಿಸಿ ಧಾರ್ವಿುಕ ಕಟ್ಟಡ ಕಟ್ಟಿದ್ದಲ್ಲಿ ಅದನ್ನು ನೆಲಸಮಗೊಳಿಸಲೇಬೇಕು. ಅಂತಿಮವಾಗಿ ಸಾರ್ವಜನಿಕ ಸುರಕ್ಷತೆಯೇ ಮುಖ್ಯ’ ಎಂದು ಸುಪ್ರೀಂಕೋರ್ಟ್ ಮಂಗಳವಾರ ಮಹತ್ವದ ಆದೇಶ ನೀಡಿದೆ. ಈ ಮೂಲಕ ರಸ್ತೆ, ಪಾರ್ಕ್ ಸೇರಿದಂತೆ ಸಾರ್ವಜನಿಕ ಸ್ಥಳದಲ್ಲಿರುವ ದೇಗುಲ, ದರ್ಗಾ, ಮಸೀದಿಗಳನ್ನು ತೆರವುಗೊಳಿಸುವಂತೆ ಸೂಚಿಸಿದ್ದು, ರಸ್ತೆ ಮಧ್ಯೆ ಕಟ್ಟಿದ್ದರೆ ಅದು ಅತಿಕ್ರಮಣವೇ ಎಂದು ಸ್ಪಷ್ಟಪಡಿಸಿದೆ. ದೇಶಾದ್ಯಂತ ಆಗಾಗ ಚರ್ಚೆಯಾಗುವ, ಸಂಘರ್ಷಕ್ಕೂ ಕಾರಣವಾಗುವ ಅತಿಕ್ರಮಣ ಪಿಡುಗಿನ ವಿರುದ್ಧ ಸುಪ್ರೀಂ ಕೋರ್ಟ್ ಕಠಿಣ ನಿಲುವು ತಳೆದಿರುವುದು ಉತ್ತಮ ಬೆಳವಣಿಗೆಯೇ ಹೌದು. ಸಾರ್ವಜನಿಕ ಸ್ಥಳಗಳ ಅತಿಕ್ರಮಣ ತುಂಬ ಹಳೆಯ ಸಮಸ್ಯೆಯಾಗಿದ್ದರೂ, ಈವರೆಗೆ ಸೂಕ್ತ ಪರಿಹಾರ ಕಂಡುಕೊಳ್ಳಲು ಮಾತ್ರ ಆಗಿಲ್ಲ. ಅಲ್ಲದೆ, ನ್ಯಾಯಾಲಯದಿಂದಲೂ ಈ ರೀತಿಯ ಆದೇಶ ಇದೇ ಮೊದಲಲ್ಲ. ಹಿಂದೆಯೂ ಈ ರೀತಿಯ ಆದೇಶ ಹೊರಬಿದ್ದಿತ್ತು. ಆಗೆಲ್ಲ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ತೆರವು ಕಾರ್ಯಾಚರಣೆಗೂ ಮುಂದಾಗಿದ್ದವು. ಆದರೆ ಆ ಕಾರ್ಯಾಚರಣೆ ಪೂರ್ಣ ಪ್ರಮಾಣದಲ್ಲಿ ಕಾರ್ಯಗತವಾಗಲಿಲ್ಲ ಎಂಬುದು ಗಮನಾರ್ಹ.
