ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು 2023-24ನೇ ಆರ್ಥಿಕ ಸಾಲಿನ ಮುಂಗಡಪತ್ರವನ್ನು ಬುಧವಾರ ಮಂಡಿಸಿದ್ದು, ಯಾವ ವಲಯಕ್ಕೆ ಏನು ದಕ್ಕಿದೆ, ಒಟ್ಟಾರೆ ಸ್ವರೂಪವೇನು ಎಂಬೆಲ್ಲ ಚರ್ಚೆ, ವಿಶ್ಲೇಷಣೆಗಳು ನಡೆಯುತ್ತಿವೆ. ಈ ವರ್ಷ ನಡೆಯಲಿರುವ ಒಂಬತ್ತು ರಾಜ್ಯಗಳ ವಿಧಾನಸಭಾ ಚುನಾವಣೆಗಳು ಮತ್ತು 2024ರಲ್ಲಿ ನಡೆಯುವ ಲೋಕಸಭಾ ಚುನಾವಣೆ ಹಿನ್ನೆಲೆಯಲ್ಲಿ, ಈ ಸಲ ಜನಪ್ರಿಯ ಬಜೆಟ್ ಮಂಡನೆಯಾಗಬಹುದು ಎಂದು ಬಹುತೇಕವಾಗಿ ಭಾವಿಸಲಾಗಿತ್ತು. ಕರ್ನಾಟಕಕ್ಕೂ ವಿಶೇಷ ಕೊಡುಗೆ ದಕ್ಕಬಹುದು ಎಂದು ಊಹಿಸಲಾಗಿತ್ತು. ಆದರೆ, ಈ ಅಂದಾಜಿಗೆ ವ್ಯತಿರಿಕ್ತವಾಗಿ ಮುಂಗಡಪತ್ರ ರೂಪುಗೊಂಡಿದೆ ಎಂದರೆ ತಪ್ಪಲ್ಲ. ಮತಬುಟ್ಟಿ ತುಂಬಿಸುತ್ತದೆ ಎಂದು ಭಾವಿಸಲಾದ ಉಚಿತ ಕೊಡಗೆಗಳ ಘೋಷಣೆ ಅಥವಾ ಜನಪ್ರಿಯ ಯೋಜನೆಗಳ ಗೊಡವೆಗೆ ಹೋಗದ ಹಣಕಾಸು ಸಚಿವರು, ವರ್ತಮಾನದ ಸನ್ನಿವೇಶದಲ್ಲಿ ಉತ್ತಮವಾದುದನ್ನು ನೀಡಲು ಶ್ರಮಿಸಿರುವುದು ಮೇಲ್ನೋಟಕ್ಕೆ ಗೋಚರಿಸುತ್ತದೆ.
