ದೇಶದಾದ್ಯಂತ ಐದು ವರ್ಷಗಳಿಗೆ ಒಮ್ಮೆ ಮಾತ್ರ ಚುನಾವಣೆ ನಡೆಯುವುದರಿಂದ ಸರ್ಕಾರದ ಬೊಕ್ಕಸಕ್ಕೆ ಆರ್ಥಿಕ ಹೊರೆ ಕಡಿಮೆಯಾಗುತ್ತದೆ. ಮತದಾರರೂ ಲೋಕಸಭೆಗೆ ಒಮ್ಮೆ, ವಿಧಾನಸಭೆಗೆ ಇನ್ನೊಮ್ಮೆ ಹೀಗೆ ಹಲವು ಬಾರಿ ಮತದಾನ ಮಾಡುವುದು ತಪ್ಪುತ್ತದೆ. ಐದು ವರ್ಷಗಳ ಕಾಲ ಸರ್ಕಾರದ ನೀತಿಗಳಲ್ಲಿ ಯಾವುದೇ ಮಹತ್ತರ ಬದಲಾವಣೆಗಳು ಆಗುವುದಿಲ್ಲವಾದ್ದರಿಂದ ಕೈಗಾರಿಕೆಗಳು ಮತ್ತು ಔದ್ಯಮಿಕ ವಲಯ ಕೂಡ ತಮ್ಮ ವಹಿವಾಟನ್ನು ಯಾವುದೇ ಆತಂಕವಿಲ್ಲದೆ ನಿರ್ವಹಿಸಬಹುದು. ಮತದಾನಕ್ಕಾಗಿ ಪದೇಪದೆ ಜನರಿಗೆ ರಜೆ ನೀಡುವುದು ತಪ್ಪುತ್ತದೆ. ಅಧಿಕಾರಿಗಳು, ಶಿಕ್ಷಕರು ಸೇರಿದಂತೆ ಸರ್ಕಾರಿ ಯಂತ್ರವನ್ನು ಪದೇಪದೆ ಚುನಾವಣಾ ಕಾರ್ಯಕ್ಕಾಗಿ ಬಳಸಿಕೊಳ್ಳುವ ಅನಿವಾರ್ಯತೆ ನಿವಾರಣೆಯಾಗುತ್ತದೆ. ಇವು ಮೇಲ್ನೋಟಕ್ಕೆ ಕಂಡುಬರುವ ಪ್ರಯೋಜನಗಳು ಮಾತ್ರ. ಇವುಗಳಲ್ಲದೆ ಇನ್ನೂ ಹತ್ತು ಹಲವು ರೀತಿಯ ಲಾಭಗಳು ಈ ಯೋಜನೆಯ ಅನುಷ್ಠಾನದಿಂದ ಆಗಲಿವೆ. ಹಾಗಾಗಿಯೇ ಈ ಪರಿಕಲ್ಪನೆಗೆ ಸುಪ್ರೀಂಕೋರ್ಟ್, ಹೈಕೋರ್ಟ್ಗಳ ನ್ಯಾಯಮೂರ್ತಿಗಳು, ನ್ಯಾಯಾಂಗದ ಪ್ರಮುಖರು ಕೂಡ ಬೆಂಬಲ ಸೂಚಿಸಿದ್ದಾರೆ.
