ಎರಡೂ ಸರ್ಕಾರಗಳು ಒಮ್ಮನಸ್ಸಿನಿಂದ ಕಾರ್ಯನಿರ್ವಹಿಸಿದರೆ ಇಂಥ ಸವಾಲುಗಳನ್ನು ಎದುರಿಸಿ ಯೋಜನೆಯ ಕಾರ್ಯಗತಕ್ಕೆ ಅನುಕೂಲವಾಗುತ್ತದೆ. ಮೆಟ್ರೋ ಮಾತ್ರವಲ್ಲ, ಇತರ ರೈಲ್ವೆ ಯೋಜನೆಗಳಿಗೂ ಪರಸ್ಪರ ಸಹಕಾರ ಅಗತ್ಯ. ಕರ್ನಾಟಕ ಸರ್ಕಾರ ಭೂಮಿ ಮತ್ತು ವೆಚ್ಚ ಹಂಚಿಕೆಯಲ್ಲಿ ವಿಫಲವಾದ ಕಾರಣ ಶಿವಮೊಗ್ಗ-ಹರಿಹರ ರೈಲ್ವೆ ಯೋಜನೆ ಸ್ಥಗಿತಗೊಂಡಿದೆ ಎಂದು ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಈಚೆಗೆ ಲೋಕಸಭೆಯಲ್ಲಿ ತಿಳಿಸಿದ್ದು ಇದಕ್ಕೊಂದು ನಿದರ್ಶನ. ರಾಜ್ಯದಲ್ಲಿ ರೈಲ್ವೆ ಯೋಜನೆಗಳಿಗೆ ಅಗತ್ಯವಿರುವ 8,969 ಹೆಕ್ಟೇರ್ ಭೂಮಿಯಲ್ಲಿ 5,657 ಹೆಕ್ಟೇರ್ ಸ್ವಾಧೀನಪಡಿಸಿಕೊಳ್ಳಲಾಗಿದೆ. ಹಾಗಂತ ರಾಜ್ಯ ಸರ್ಕಾರಕ್ಕೂ ಸಮಸ್ಯೆ ಇಲ್ಲವೆಂದಲ್ಲ. ರೈಲ್ವೆ ಯೋಜನೆಗಳ ಪೂರ್ಣಗೊಳಿಸುವಿಕೆ ರಾಜ್ಯ ಸರ್ಕಾರದ ತ್ವರಿತ ಭೂಸ್ವಾಧೀನ, ಅರಣ್ಯ ತೆರವು, ಶಾಸನಬದ್ಧ ಅನುಮತಿಗಳು ಇತ್ಯಾದಿ ಮೇಲೆ ಅವಲಂಬಿತವಾಗಿದೆ ಎಂದು ರೈಲ್ವೆ ಸಚಿವರು ಹೇಳಿರುವುದು ಸಹಕಾರ ಹಾಗೂ ಸಮನ್ವಯದ ಅಗತ್ಯವನ್ನು ಸಾರುತ್ತದೆ. ಅಭಿವೃದ್ಧಿ ವಿಚಾರದಲ್ಲಿ ಇಂಥ ಮನೋಭಾವ ಅಪೇಕ್ಷಣೀಯ.
