ಮಾಹಿತಿ-ತಂತ್ರಜ್ಞಾನ ತುಂಬ ವೇಗವಾಗಿ ಬೆಳೆದು, ಅದರ ಪರಿಣಾಮ ಎಲ್ಲ ಕ್ಷೇತ್ರಗಳ ಮೇಲೂ ಆಗಿದೆ. ಸೇವೆಗಳ ತ್ವರಿತ ಲಭ್ಯತೆ, ಗುಣಮಟ್ಟ ಕಾಯ್ದುಕೊಳ್ಳುವಿಕೆ, ಪಾರದರ್ಶಕತೆ, ಸೂಕ್ತ ನಿಗಾ ವ್ಯವಸ್ಥೆ ಸೇರಿದಂತೆ ಹಲವು ಅನುಕೂಲಗಳಿಗೆ ಇದು ದಾರಿ ಮಾಡಿಕೊಟ್ಟಿದೆ. ಖಾಸಗಿ ರಂಗವಂತೂ ಐಟಿಯನ್ನು ಸರಿಯಾಗಿ ಅಳವಡಿಸಿಕೊಂಡು, ಹೊಸ ಸುಧಾರಣೆಗಳಿಗೆ ನಾಂದಿಹಾಡುತ್ತಿದೆ. ಅದರಂತೆ ಸರ್ಕಾರದ ಇಲಾಖೆಗಳು ಕೂಡ ಹೊಸತನ ಅಳವಡಿಸಿಕೊಳ್ಳುವ ಮೂಲಕ ಕಾಲಕ್ಕೆ ತಕ್ಕಂತೆ ಬದಲಾಗುವುದು ಅಗತ್ಯ, ಅನಿವಾರ್ಯ. ಅದರಲ್ಲೂ ಕರ್ನಾಟಕ ಮಾಹಿತಿ-ತಂತ್ರಜ್ಞಾನ ರಂಗದಲ್ಲಿ ಜಾಗತಿಕ ಛಾಪು ಮೂಡಿಸಿದ್ದು, ಇಲ್ಲಿನ ಎಲ್ಲ ವಲಯಗಳಲ್ಲೂ ಅದರ ಪರಿಣಾಮಕಾರಿ ಜಾರಿ ಅವಶ್ಯ. ಸರ್ಕಾರದ ವಿವಿಧ ವಿಭಾಗಗಳು ತಮ್ಮ ಸೇವೆಯನ್ನು ತಂತ್ರಜ್ಞಾನ ಆಧಾರಿತವಾಗಿ ನೀಡುತ್ತಿವೆಯಾದರೂ, ಅದರಿಂದ ಅನುಕೂಲಕ್ಕಿಂತ ಹೆಚ್ಚು ಸಮಸ್ಯೆಗಳೇ ಸೃಷ್ಟಿಯಾಗುತ್ತಿರುವುದು ವಿಪರ್ಯಾಸ. ಇಂಥ ಬೆಳವಣಿಗೆಗಳು ಯೋಜನೆಯ ಮೂಲೋದ್ದೇಶಕ್ಕೇ ಧಕ್ಕೆ ತರುತ್ತವೆ.
