ಭಾರತ ಮತ್ತು ಅಮೆರಿಕದ ರಾಜತಾಂತ್ರಿಕ ಸಂಬಂಧ ಕಳೆದ ಕೆಲ ವರ್ಷಗಳಲ್ಲಿ ಹೊಸ ಎತ್ತರಕ್ಕೆ ತಲುಪಿದೆ ಎಂಬುದರಲ್ಲಿ ಅನುಮಾನವಿಲ್ಲ. ಎಲ್ಲ ರಂಗಗಳಲ್ಲಿ ವರ್ಧಿಸುತ್ತಿರುವ ಭಾರತದ ವರ್ಚಸ್ಸು, ಅಂತಾರಾಷ್ಟ್ರೀಯ ಶಕ್ತಿಯಾಗಿ ಮನ್ನಣೆ ಪಡೆಯುತ್ತಿರುವ ಬಗೆ ಇದೆಲ್ಲವನ್ನೂ ಅಮೆರಿಕ ಗಮನಿಸಿಯೇ, ಸ್ನೇಹಹಸ್ತವನ್ನು ಚಾಚಿದೆ. ಪ್ರಧಾನಿ ನರೇಂದ್ರ ಮೋದಿ ಮತ್ತು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ರ ಗೆಳೆತನದ ಬೆಸುಗೆಗೆ ಜಾಗತಿಕ ರಂಗವೂ ಅಚ್ಚರಿಗೊಂಡಿದೆ. ಕಳೆದ ವರ್ಷ ಮೋದಿ ಅಮೆರಿಕಕ್ಕೆ ಭೇಟಿ ನೀಡಿ, ಅನಿವಾಸಿ ಭಾರತೀಯರು ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಾಗ ಟ್ರಂಪ್ ವೇದಿಕೆ ಹಂಚಿಕೊಂಡಿದ್ದಲ್ಲದೆ, ಭಾರತದ ಬಗೆಗೆ ಮೆಚ್ಚುಗೆಯ ಮಾತುಗಳನ್ನು ಆಡಿದ್ದರು. ಈ ವರ್ಷದ ಫೆಬ್ರವರಿಯಲ್ಲಿ ಟ್ರಂಪ್ ಭಾರತಕ್ಕೆ ಬಂದಾಗ ಇಲ್ಲಿ ದೊರೆತ ಆತ್ಮೀಯತೆ ಮತ್ತು ಸ್ವಾಗತದಿಂದ ಬಹು ಹರ್ಷಗೊಂಡು, ಆ ಅನುಭವವನ್ನು ಹಲವು ವೇದಿಕೆಗಳಲ್ಲಿ ಹಂಚಿಕೊಂಡರು. ಹಾಗಂತ ಇದೇನು ತೋರಿಕೆಯ ‘ಬಾಂಧವ್ಯವೃದ್ಧಿ’ ಅಲ್ಲ. ಭಯೋತ್ಪಾದನೆ ವಿರೋಧಿ ಹೋರಾಟದಲ್ಲಿ ಭಾರತದ ನಿಲುವು, ಕ್ರಮಗಳನ್ನು ಅಮೆರಿಕ ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಸಮರ್ಥಿಸಿಕೊಂಡು ಬಂದಿದೆ.
