ತಮ್ಮ ಲೈಂಗಿಕ ತೃಷೆಯನ್ನು ತೀರಿಸಿದರೆ ಮಾತ್ರ ನಟಿಯರಿಗೆ ಚಲನಚಿತ್ರಗಳಲ್ಲಿ ಅವಕಾಶ ಕಲ್ಪಿಸುವ ಕೆಟ್ಟ ಸಂಪ್ರದಾಯ ಮಲಯಾಳಿ ಚಿತ್ರರಂಗದಲ್ಲಿ ಬೇರೂರಿರುವುದನ್ನು ಕೇರಳ ಸರ್ಕಾರ ನೇಮಕ ಮಾಡಿದ್ದ ನ್ಯಾಯಮೂರ್ತಿ ಕೆ. ಹೇಮಾ ನೇತೃತ್ವದ ವಿಚಾರಣಾ ಆಯೋಗ ಖಚಿತಪಡಿಸಿದೆ. ಆಯೋಗದ ವರದಿ ತಡವಾಗಿ ಸಾರ್ವಜನಿಕಗೊಂಡಿದ್ದು, ತಲ್ಲಣ ಮೂಡಿಸಿದೆ. ಅನೇಕ ಆಘಾತಕಾರಿ ವಿವರಗಳನ್ನು ಇದು ಒಳಗೊಂಡಿದ್ದು, ಮಲಯಾಳಿ ಬೆಳ್ಳಿಪರದೆಯ ಹಿಂದಿರುವ ಕರಾಳ ವಾಸ್ತವಗಳನ್ನು ಅನಾವರಣಗೊಳಿಸಿದೆ. ತೀರಾ ಅಪಮಾನಿಕಾರಿಯಾದ, ಮಹಿಳಾ ದ್ವೇಷದ ಮತ್ತು ಕ್ರಿಮಿನಲ್ ವರ್ತನೆಗಳು ಅಲ್ಲಿ ಸಹಜ ಎಂದು ವರದಿ ಬೊಟ್ಟು ಮಾಡಿದೆ. ಸಮಿತಿಯ ವರದಿಯು ನಟಿಯರು ಹಾಗೂ ಇತರರು ನೀಡಿದ ಹೇಳಿಕೆ ಹಾಗೂ ಅನುಭವಗಳನ್ನು ಒಳಗೊಂಡಿದೆ. 2017ರ ಫೆಬ್ರವರಿ ತಿಂಗಳಿನಲ್ಲಿ ಕೊಚ್ಚಿಯಲ್ಲಿ ನಟಿಯೊಬ್ಬರನ್ನು ಅಪಹರಿಸಿ, ಅವರ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದ ಪ್ರಕರಣದ ನಂತರ ಈ ಸಮಿತಿಯನ್ನು ರಚಿಸಲಾಗಿತ್ತು. ಈ ಲೈಂಗಿಕ ದೌರ್ಜನ್ಯ ಪ್ರಕರಣದ ನಂತರದಲ್ಲಿ ಮಲಯಾಳಿ ಸಿನಿಮಾ ಉದ್ಯಮದಲ್ಲಿ ತೊಡಗಿಸಿಕೊಂಡಿರುವ ಮಹಿಳೆಯರ ‘ವಿಮೆನ್ ಇನ್ ಸಿನಿಮಾ ಕಲೆಕ್ಟಿವ್’ ಎಂಬ ಸಂಘಟನೆ ಜನ್ಮತಳೆದಿದೆ. ನ್ಯಾಯಮೂರ್ತಿ ಕೆ.ಹೇಮಾ ನೇತೃತ್ವದ ಸಮಿತಿಯ ವರದಿ ಬಂದ ತಕ್ಷಣವೇ ಕ್ರಮ ಕೈಗೊಳ್ಳಬೇಕಾಗಿದ್ದ ಕೇರಳ ಸರ್ಕಾರ ಈ ವಿಷಯದಲ್ಲಿ ಎಡವಿರುವುದು ಸ್ಪಷ್ಟ. 2019ರಲ್ಲಿಯೇ ಕೇರಳ ಸರ್ಕಾರಕ್ಕೆ ಈ ವರದಿ ಸಲ್ಲಿಕೆಯಾಗಿದ್ದರೂ, ಅದು ಬಹಿರಂಗಗೊಂಡಿರುವುದು 2024ರ ಆಗಸ್ಟ್ 19ರಂದು ಎಂಬುದು ಇನ್ನೂ ಆಘಾತಕಾರಿ ವಿಚಾರ. ಸರ್ಕಾರ ಯಾರನ್ನು ರಕ್ಷಿಸಲು ಹೊರಟಿದೆ, ಮಹಿಳೆಯರ ಸುರಕ್ಷೆಯ ಬಗ್ಗೆ ಇಷ್ಟೊಂದು ನಿರ್ಲಕ್ಷ್ಯವೇಕೆ ಎಂಬ ಅನೇಕ ಪ್ರಶ್ನೆಗಳನ್ನು ಇದು ಹುಟ್ಟುಹಾಕಿದ್ದು, ಸರ್ಕಾರ ಸಮರ್ಪಕವಾಗಿ ಉತ್ತರಿಸಿ ಜನರ ಸಂದೇಹಗಳನ್ನು ಬಗೆಹರಿಸಬೇಕಿದೆ.
