ಕೇಂದ್ರ ಸರ್ಕಾರ ಹಾಗೂ ಎಲ್ಲ ರಾಜ್ಯ ಸರ್ಕಾರಗಳಿಗೆ ಅಪಾರ ಆರ್ಥಿಕ ನಷ್ಟವಾಗಿದ್ದು, ಅದನ್ನು ತುಂಬಿಕೊಳ್ಳುವತ್ತ ಕ್ರಮಗಳನ್ನು ಕೈಗೊಳ್ಳಬೇಕಿದೆ. ಅದೇ ಸಂದರ್ಭದಲ್ಲಿ, ಕೋಟ್ಯಂತರ ಉದ್ಯೋಗಹಾನಿಯೂ ಆಗಿದೆ. ಆದ್ದರಿಂದ, ಕರೊನಾ ಇರುವಂತೆಯೇ ಮತ್ತೆ ಪ್ರಗತಿಯ ಹಳಿಗೆ ಏರುವುದರ ಬಗ್ಗೆ ಈಗ ಸರ್ಕಾರಗಳು ಮತ್ತು ಜನರ ಚಿತ್ತ ಹರಿಯಬೇಕಾಗಿದೆ. ವಿಶೇಷವಾಗಿ ಸರ್ಕಾರಗಳು ಅಗತ್ಯ ನೀತಿನಿರೂಪಣೆ ವಿಷಯದಲ್ಲಿ ವಿಳಂಬಿಸದೆ ನಿರ್ಣಯಗಳನ್ನು ತೆಗೆದುಕೊಳ್ಳಬೇಕಾಗುತ್ತದೆ. ಅಧಿಕಾರಶಾಹಿಯ ವಿಳಂಬನೀತಿಯಿಂದಾಗಿ ಆಗುವ ಪರಿಣಾಮಗಳೇನು ಎಂಬುದು ನಮಗೆ ಗೊತ್ತಿಲ್ಲದ ವಿಷಯವೇನಲ್ಲ. ಅದೇ ಸಂದರ್ಭದಲ್ಲಿ, ಕರೊನಾ ಲಸಿಕೆ ಅನ್ವೇಷಣೆಯ ಪ್ರಯತ್ನಗಳು ಸಾಗಿದ್ದು, ಭಾರತದಲ್ಲಿಯೂ ಇದು ಯಶಸ್ವಿಯಾಗುವ ಸಂಕೇತಗಳು ದೊರಕುತ್ತಿವೆ. ಹಾಗಂತ, ಇದೆಲ್ಲ ಮಾಮೂಲು ಎಂದು ಕರೊನಾ ಕುರಿತು ನಿರ್ಲಕ್ಷ್ಯ ಸಲ್ಲದು. ಆರೋಗ್ಯಕರ ಆಹಾರ-ವಿಹಾರ ಪದ್ಧತಿ, ವ್ಯಕ್ತಿಗತ ಅಂತರ, ಮಾಸ್ಕ್ ಧರಿಸುವುದು ಮುಂತಾದ ಕ್ರಮಗಳು ನಮ್ಮ ಜೀವನಶೈಲಿಯ ಭಾಗವಾಗಬೇಕಿದೆ. ಕರೊನಾ ವಿರುದ್ಧದ ಹೋರಾಟವೆಂಬುದು ಒಂದು ಸಾಮೂಹಿಕ ಪ್ರಯತ್ನ ಎಂಬುದನ್ನು ನಾವು ಮರೆಯ ಬಾರದು. ಇಲ್ಲಿ ಸರ್ಕಾರ ಮತ್ತು ಸಮಾಜ ಎರಡರ ಪಾತ್ರವೂ ಮುಖ್ಯವಾದುದು.
