ಸಮಾಜದ ಸ್ವಾಸ್ಥ್ಯ ರಕ್ಷಣೆಗೆ ಮತ್ತು ಆದರ್ಶಪೂರ್ಣ ವ್ಯವಸ್ಥೆ ರೂಪುಗೊಳ್ಳಲು ಅಲ್ಲಿ ಮಹಿಳೆಗೆ ಸೂಕ್ತ ಸುರಕ್ಷೆ, ಭರವಸೆ ಮೂಡಿಸುವಂಥ ವಾತಾವರಣ ಅತ್ಯಗತ್ಯ. ಇದನ್ನು ಕೇಂದ್ರ, ರಾಜ್ಯ ಸರ್ಕಾರಗಳು ಕೂಡ ಅರ್ಥಮಾಡಿಕೊಂಡಿವೆ. ಹಾಗಾಗಿಯೇ, ಮಹಿಳಾ ಸುರಕ್ಷತೆಯನ್ನು ಗಮನದಲ್ಲಿ ಇರಿಸಿಕೊಂಡು ಹಲವು ಕಾನೂನು, ನಿಯಮಗಳು ರೂಪುಗೊಂಡಿವೆ. ದೆಹಲಿಯ ನಿರ್ಭಯಾ ಪ್ರಕರಣವಂತೂ ರಾಷ್ಟ್ರಾದ್ಯಂತ ಜಾಗೃತಿಯ ಆಂದೋಲನವನ್ನೇ ಸೃಷ್ಟಿಸಿತು ಮತ್ತು ಕಾನೂನನ್ನು ಮತ್ತಷ್ಟು ಬಿಗಿಯಾಗಿಸಲು ಕಾರಣವಾಯಿತು. ಇಂಥ ಕ್ರಮಗಳು ಮಹಿಳೆಯರಲ್ಲಿ ಭರವಸೆ ಮೂಡಿಸಲು ನೆರವಾದವು ಎಂಬುದರಲ್ಲಿ ಅನುಮಾನವಿಲ್ಲ. ಯಾವುದೇ ಕಾನೂನು, ನಿಯಮವಾಗಲಿ ಅದನ್ನು ಸೂಕ್ತ, ಸಮರ್ಪಕವಾಗಿ ಅನುಷ್ಠಾನಕ್ಕೆ ತಂದರೆ, ಅದರಿಂದ ಸಮಾಜಕ್ಕೆ ಒಳಿತಾಗುವ ಜತೆಗೆ, ಸಮಸ್ಯೆಗಳಿಗೆ ಪರಿಣಾಮಕಾರಿ ಮದ್ದೆರೆಯಲು ಸಾಧ್ಯ. ಆದರೆ, ಒಳ್ಳೆಯ ಉದ್ದೇಶದಿಂದ ರೂಪಿತವಾದ ಕಾನೂನುಗಳು ಅಥವಾ ವ್ಯವಸ್ಥೆಯ ಇತರ ನಿಯಮಗಳನ್ನು ದುರುಪಯೋಗ ಪಡಿಸಿಕೊಂಡಲ್ಲಿ, ಅದರಿಂದ ಸಮುದಾಯಕ್ಕೆ ದೊಡ್ಡ ಹಾನಿ ಒದಗಬಲ್ಲದು ಎಂಬ ವಾಸ್ತವವನ್ನು ಅರ್ಥಮಾಡಿಕೊಳ್ಳಬೇಕು.
