ಆದರೆ, ಮುಕ್ತತೆಯ ಹೆಸರಲ್ಲಿ ಸ್ವನಿಯಂತ್ರಣದ ಚೌಕಟ್ಟನ್ನು ಮೀರಿದಾಗ, ಸ್ವಾತಂತ್ರ್ಯ ಎಂಬುದು ಸ್ವೇಚ್ಛಾಚಾರವಾಗಿ ಮಾರ್ಪಟ್ಟಾಗ ಸಮಸ್ಯೆಗಳು ಭೀಕರ ರೂಪ ತಳೆದು ಸಮಾಜದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತವೆ. ಹಾಗಾಗಬಾರದು. ಆ ನಿಟ್ಟಿನಲ್ಲಿ ನಿಯಂತ್ರಣದ ಒಂದು ವ್ಯವಸ್ಥೆ ರೂಪುಗೊಳ್ಳುತ್ತಿರುವುದು ಉತ್ತಮ ಬೆಳವಣಿಗೆ. ಆದರೆ, ಇದರಿಂದ ಡಿಜಿಟಲ್ ಮಾಧ್ಯಮದ ಸ್ವಾತಂತ್ರ್ಯಕ್ಕೆ ಧಕ್ಕೆ ಬರಲಿದೆಯೇ, ಎಲ್ಲವೂ ಸರ್ಕಾರದ ನಿರ್ದೇಶನದಂತೆ ನಡೆಯಲಿದೆಯೇ ಎಂಬ ಅನುಮಾನದ ದನಿಯೂ ಸಣ್ಣದಾಗಿ ಕೇಳಿಬರುತ್ತಿದೆ. ಹಾಗಾಗಿ, ಮುಂದಿನ ದಿನಗಳಲ್ಲಿ ಸರ್ಕಾರ ಸೂಕ್ತ ನಿಯಮಾವಳಿಗಳನ್ನು ರೂಪಿಸಲಿ ಮತ್ತು ಅವು ಡಿಜಿಟಲ್ ಮಾಧ್ಯಮಕ್ಕೆ ಅಧಿಕೃತತೆ ತಂದುಕೊಂಡಲಿ. ಸುದ್ದಿ ವೆಬ್ಸೈಟ್ಗಳು ವಿಶ್ವಾಸಾರ್ಹವಾಗಿ ಕಾರ್ಯನಿರ್ವಹಿಸುತ್ತ, ನೈಜ ಮಾಹಿತಿಯ ಅಧಿಕೃತ ದನಿಗಳಾಗಲಿ. ಒಟ್ಟಾರೆ, ಮಾಹಿತಿ ಮತ್ತು ತಂತ್ರಜ್ಞಾನ ಜನರ ಜೀವನಕ್ಕೆ ವಿಶ್ವಾಸ ತುಂಬಬೇಕೆ ಹೊರತು, ಅನಗತ್ಯ ಗೊಂದಲ, ವಿವಾದಗಳನ್ನಲ್ಲ ಎಂಬ ವಿವೇಚನೆ ಬೆಳೆಯಲಿ.
