ಕೇಂದ್ರ ಗೃಹ ವ್ಯವಹಾರಗಳ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಕೆ.ವಿ.ಪ್ರತಾಪ್ ನೇತೃತ್ವದ ಮೂರು ಪ್ರತ್ಯೇಕ ತಂಡ ಮಂಗಳವಾರ ಕೊಡಗು, ಬೆಳಗಾವಿ, ಧಾರವಾಡ, ಗದಗ, ಬಾಗಲಕೋಟೆ ಜಿಲ್ಲೆಗಳಿಗೆ ಭೇಟಿ ನೀಡಿ, ಅಧ್ಯಯನ ನಡೆಸಿವೆ. ಬುಧವಾರ ಮಧ್ಯಾಹ್ನ ಈ ಅಧಿಕಾರಿಗಳು ರಾಜ್ಯ ಕಂದಾಯ ಸಚಿವರು ಹಾಗೂ ಇಲಾಖೆಯ ಅಧಿಕಾರಿಗಳೊಂದಿಗೆ ಮತ್ತೊಂದು ಸುತ್ತಿನ ಚರ್ಚೆ ನಡೆಸಲಿದ್ದಾರೆ. ನಷ್ಟದ ತೀವ್ರತೆ ಅರಿಯಲು, ವಾಸ್ತವವನ್ನು ಮನಗಾಣಲು ಈ ಎಲ್ಲ ಪ್ರಕ್ರಿಯೆಗಳು ಅವಶ್ಯವೇ. ಆದರೆ, ಇಂಥ ಅಧ್ಯಯನಗಳು ಕಾಟಾಚಾರಕ್ಕೆ ಸೀಮಿತವಾಗಿ ಉಳಿಯಬಾರದು. ಏಕೆಂದರೆ, ಇವು ಮಾನವೀಯ ಸಂಕಟದ ದುರಂತಗಳು. ಹೋದ ವರ್ಷದ ಪ್ರವಾಹದ ಬೆನ್ನಲ್ಲೇ ಈ ವರ್ಷ ನೆರೆ ಅಪ್ಪಳಿಸಿರುವುದು ಗಾಯದ ಮೇಲೆ ಬರೆ ಎಳೆದಂತಾಗಿದೆ. ಕೈಗೆ ಬರಬೇಕಿದ್ದ ಬೆಳೆಗಳು ನೀರು ಪಾಲಾಗಿವೆ. ರೈತರು ದಿಕ್ಕೇ ತೋಚದಂತಾಗಿದ್ದಾರೆ. ಆಸ್ತಿಪಾಸ್ತಿ ಕಳೆದುಕೊಂಡು ಬಡವರು ಮುಂದೇನು ಎಂದು ದಾರಿ ಕಾಣದೆ ಹತಾಶರಾಗಿದ್ದಾರೆ. ಇಂಥ ಪರಿಸ್ಥಿತಿಯಲ್ಲಿ ನಷ್ಟಕ್ಕೆ ಒಳಗಾದವರಿಗೆ, ನೊಂದವರಿಗೆ ಸರಿಯಾದ ನೆರವು ಸಿಗುವಂತೆ ಮಾಡುವುದು ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳ ಕರ್ತವ್ಯ.
