ನಮ್ಮಲ್ಲಿ ಕುಟುಂಬ ವ್ಯವಸ್ಥೆ ಇನ್ನೂ ಗಟ್ಟಿಯಾಗಿಯೇ ಇದೆಯಾದರೂ, ಕಾಲದ ಪ್ರಭಾವಕ್ಕೋ ಅಥವಾ ಅನಿವಾರ್ಯತೆಗೋ ಅಥವಾ ನೈತಿಕ ಸಂದಿಗ್ಧಗಳಿಗೋ ಸಿಲುಕಿ ಆಗೀಗ ಕೆಲ ಅಪಸವ್ಯಗಳೂ, ಸಮಸ್ಯೆಗಳೂ ಉಂಟಾಗುವುದುಂಟು. ಅದರಲ್ಲೂ ವೃತ್ತಿ ಮತ್ತು ಇತರ ಕಾರಣಗಳಿಗಾಗಿ ವಿಭಕ್ತ ಕುಟುಂಬಗಳು ಹೆಚ್ಚುತ್ತಿರುವ ಮತ್ತು ನಗರೀಕರಣ ತಂದೊಡ್ಡಿದ ಸನ್ನಿವೇಶಗಳಿಂದಾಗಿಯೂ ಕೆಲ ರಗಳೆಗಳು ಎದುರಾಗುವುದುಂಟು. ವೃದ್ಧರನ್ನು ಮನೆಯಲ್ಲಿ ನೋಡಿಕೊಳ್ಳಲು ಆಗದೆ ಅಥವಾ ಕುಟುಂಬ ಸದಸ್ಯರ ನಡುವಿನ ಭಿನ್ನಾಭಿಪ್ರಾಯಗಳಿಂದಾಗಿ ಹಿರಿಯರನ್ನು ವೃದ್ಧಾಶ್ರಮಗಳಿಗೆ ಸೇರಿಸುವುದು, ತಂದೆ ಮತ್ತು ತಾಯಿ ಇಬ್ಬರೂ ದುಡಿಯುವ ಅನಿವಾರ್ಯತೆಯಿಂದ ಮಕ್ಕಳ ಮೇಲೆ ಸೂಕ್ತ ಗಮನ ನೀಡಲಾಗದೆ ಅದರಿಂದಾಗಿ ಸಮಸ್ಯೆಗಳು ಉದ್ಭವಿಸುವುದು...ಹೀಗೆ ಆಧುನಿಕ ಕಾಲದ ಸಮಸ್ಯೆಗಳು ಭಿನ್ನ ಭಿನ್ನ. ಕುಟುಂಬ ಎಂದಮೇಲೆ ಒಂದು ಹಂತಕ್ಕೆ ಅಭಿಪ್ರಾಯಭೇದ ಅಥವಾ ಮುನಿಸು ಸಹಜವಾದರೂ ಅದು ಮಾನಸಿಕ ಅಂತರಕ್ಕೆ ಕಾರಣವಾಗಬಾರದು. ನಮ್ಮ ಕೌಟುಂಬಿಕ ವ್ಯವಸ್ಥೆಯ ಬೇರುಗಳು ಶಿಥಿಲವಾಗಲು ಬಿಡಬಾರದು. ಕುಟುಂಬ, ಸಮಾಜ, ಸರ್ಕಾರ ಹೀಗೆ ಎಲ್ಲರ ಜವಾಬ್ದಾರಿಯೂ ಇದರಲ್ಲಿದೆ.
