ಎಷ್ಟೋ ಬಾರಿ ಸವಾಲುಗಳ ರೂಪದಲ್ಲೇ ಅವಕಾಶಗಳು ಬರುತ್ತವೆ. ದೇಶದ ಆರೋಗ್ಯ ಮೂಲವ್ಯವಸ್ಥೆಯನ್ನು ಸದೃಢ ಮಾಡಲು ಕರೊನಾ ನಿಮಿತ್ತವಾಗಿದೆ ಎಂದು ಭಾವಿಸಿಕೊಂಡು, ಮುಂದಡಿ ಇಡಬೇಕಿದೆ. ದೇಶದ ವೈದ್ಯಕೀಯ ರಂಗ ತುರ್ತು ಪರಿಸ್ಥಿತಿಗಳಿಗೆ ಹೇಗೆ ಸನ್ನದ್ಧವಾಗಬೇಕು ಎಂಬುದಕ್ಕೂ ಈಗಿನ ಸನ್ನಿವೇಶದ ಮೂಲಕ ಪಾಠ ಕಲಿತಂತಾಗಿದೆ. ಜಾಗತಿಕವಾಗಿ ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಮತ್ತು ಗರಿಷ್ಠ ವೇಗದಲ್ಲಿ ಲಸಿಕೆ ನೀಡಿರುವ ದೇಶ ಎಂಬ ಹೆಗ್ಗಳಿಕೆಗೂ ಭಾರತ ಪಾತ್ರವಾಗಿದೆ. ಈವರೆಗೆ 14 ಕೋಟಿಗೂ ಅಧಿಕ ಡೋಸ್ ನೀಡಲಾಗಿದ್ದು, ಮೇ 1ರಿಂದ ಈ ಅಭಿಯಾನ ಮತ್ತಷ್ಟು ತೀವ್ರತೆ ಪಡೆಯಲಿದೆ. ಆದರೆ, ಆಮ್ಲಜನಕ ಹಾಗೂ ಇತರ ವೈದ್ಯಕೀಯ ಸೌಕರ್ಯಗಳ ಕೊರತೆ ಆಗದಂತೆ ನಿಗಾ ವಹಿಸುವುದು ಈಗಿನ ಅಗತ್ಯ. ಅದು ಬರೀ ಕೇಂದ್ರವಲ್ಲ, ರಾಜ್ಯ ಸರ್ಕಾರಗಳ ಜವಾಬ್ದಾರಿಯೂ ಹೌದು. ವೈದ್ಯಕೀಯ ಆಮ್ಲಜನಕದ ಉತ್ಪಾದನೆ ಸೂಕ್ತ ಪ್ರಮಾಣದಲ್ಲಿ ಇದ್ದರೂ, ಅದರ ಪೂರೈಕೆ, ವಿತರಣೆ ವ್ಯವಸ್ಥೆಯಲ್ಲಿ ಹಲವಾರು ಸಮಸ್ಯೆಗಳಿವೆ. ಇವುಗಳನ್ನು ಪರಿಹರಿಸಿಕೊಳ್ಳುವುದು ಆದ್ಯತೆಯಾಗಬೇಕು. ಅಷ್ಟೇ ಅಲ್ಲ, ಔಷಧಗಳ ದಾಸ್ತಾನು, ಮೂಲಸೌಕರ್ಯದ ವಿಷಯದಲ್ಲೂ ನಿರ್ಲಕ್ಷ್ಯ ಮಾಡುವಂತಿಲ್ಲ. ಹಲವು ರಾಜ್ಯಗಳಲ್ಲಿ ‘ಆರೋಗ್ಯ ತುರ್ತು ಪರಸ್ಥಿತಿ’ಯ ಸನ್ನಿವೇಶವಿದ್ದು, ಅದನ್ನು ಪರಿಣಾಮಕಾರಿಯಾಗಿ ಎದುರಿಸಬೇಕಿದೆ. ಆ ನಿಟ್ಟಿನಲ್ಲಿ ಸಾಮೂಹಿಕ ಪ್ರಯತ್ನ ಈಗಿನ ಅಗತ್ಯ.
