ಜನಿಸಿದಂದಿನಿಂದಲೂ ಭಾರತದ್ವೇಷವನ್ನು ಸರ್ಕಾರಿನೀತಿಯಾಗಿಯೇ ಮೈಗೂಡಿಸಿಕೊಂಡಿರುವ ಪಾಕಿಸ್ತಾನ, ಭಯೋತ್ಪಾದನೆಗೆ ನಿರಂತರವಾಗಿ ಪ್ರೋತ್ಸಾಹ, ಆಶ್ರಯ ನೀಡುತ್ತಿರುವುದು ಗೊತ್ತಿರುವಂಥದೇ. ಇದೂ ಸಾಲದೆಂಬಂತೆ, ಅಲ್ಲಿನ ಅಲ್ಪಸಂಖ್ಯಾತರ ಮೇಲೆ ದೌರ್ಜನ್ಯ ಅವ್ಯಾಹತವಾಗಿ ನಡೆಯುತ್ತಿದೆ. ಹೀಗಾಗಿ, ದೇಶ ವಿಭಜನೆ ಆದ ಸಂದರ್ಭಕ್ಕೂ ಈಗಿನದಕ್ಕೂ ಅಲ್ಪಸಂಖ್ಯಾತರ ಪ್ರಮಾಣದಲ್ಲಿ ಭಾರಿ ಇಳಿಕೆಯಾಗಿದೆ. ಹಿಂದೆ ಜನಸಂಖ್ಯೆಯ ಶೇ.15ಕ್ಕೂ ಹೆಚ್ಚಿದ್ದ ಈ ಸಮುದಾಯದ ಸಂಖ್ಯೆ ಈಗ 3.6ಕ್ಕೆ ಕುಸಿದಿದೆ. ಪಾಕ್ನ ಜನಸಂಖ್ಯೆ 20 ಕೋಟಿಗಿಂತ ಹೆಚ್ಚಿಗೆಯಿದೆ. ಅಂದರೆ ಅಲ್ಪಸಂಖ್ಯಾತರ ಪರಿಸ್ಥಿತಿಯನ್ನು ಸುಲಭದಲ್ಲಿ ಊಹಿಸಬಹುದು. ಈ ನಡುವೆ, ಅಲ್ಪಸಂಖ್ಯಾತ ಸಮುದಾಯಕ್ಕೆ ಸೇರಿದ ಅಪ್ರಾಪ್ತ ಬಾಲಕಿಯರು ಮತ್ತು ಯುವತಿಯರನ್ನು ಅಪಹರಿಸಿ ಬಲವಂತವಾಗಿ ಇಸ್ಲಾಮ್ಗೆ ಮತಾಂತರ ಮಾಡುವ ಕೆಲಸವೂ ಎಗ್ಗಿಲ್ಲದೆ ನಡೆಯುತ್ತಿರುವುದು ಮತ್ತೊಂದು ಕಳವಳಕಾರಿ ಸಂಗತಿ. ಹಿಂದಿನಿಂದಲೂ ಇಂಥದು ನಡೆಯುತ್ತಿದ್ದರೂ ಈಗಂತೂ ಪ್ರತಿ ವರ್ಷ ಏನಿಲ್ಲೆಂದರೂ ಒಂದು ಸಾವಿರ ಮತಾಂತರಗಳು ನಡೆಯುತ್ತವೆ ಎಂದು ಮಾನವ ಹಕ್ಕುಗಳ ಸಂಘಟನೆಗಳು ಹೇಳಿವೆ.
