ಈ ಎಲ್ಲ ಬೆಳವಣಿಗೆಗಳ ಬೆನ್ನಲ್ಲೇ ಭಾರತ ಚೀನಾಕ್ಕೆ ತಕ್ಕ ಏದುರೇಟು ನೀಡುತ್ತಿದ್ದು, ಭಾರತದಿಂದ ಅದು ಇಂಥ ಕ್ರಮಗಳನ್ನೇ ನಿರೀಕ್ಷಿಸಿರಲಿಲ್ಲ. ದೋಕ್ಲಾಂ ಬಿಕ್ಕಟ್ಟಿನ ಸಮಯದಲ್ಲಿ ರಾಜತಾಂತ್ರಿಕ ಗೆಲುವು ದಾಖಲಿಸಿದ್ದ ಭಾರತ, ಈ ಬಾರಿ ಆರ್ಥಿಕ, ವಾಣಿಜ್ಯ ರಂಗದಲ್ಲಿ ಸೂಕ್ತ ಉತ್ತರ ನೀಡಿದೆ. ಚೀನಾದ 59 ಆಪ್ಗಳನ್ನು ನಿಷೇಧಿಸುವ ಮೂಲಕ ಉದ್ವಿಗ್ನತೆ ಮತ್ತು ವ್ಯಾಪಾರಸಂಬಂಧ ಒಟ್ಟೊಟ್ಟಿಗೆ ಸಾಗಲು ಸಾಧ್ಯವಿಲ್ಲ ಎಂಬ ಸ್ಪಷ್ಟ ಸಂದೇಶವನ್ನು ರವಾನಿಸಿದೆ. ಇದರ ಬೆನ್ನಲ್ಲೇ, ದೂರಸಂಪರ್ಕ ಜಾಲಗಳನ್ನು 5ಜಿಗೆ ಉನ್ನತೀಕರಿಸಲು ಚೀನಾದ ಉಪಕರಣಗಳನ್ನು ಬಳಸದಿರಲು ಸರ್ಕಾರ ನಿರ್ಧರಿಸಿರುವುದು ಮಹತ್ವದ ಹೆಜ್ಜೆಯೇ ಸರಿ. ಭಾರತದ ಡಿಜಿಟಲ್ ದಾಳಿಗೆ ತಬ್ಬಿಬ್ಬಾಗಿರುವ ಚೀನಾ, ಹತಾಶೆಯ ಹೇಳಿಕೆಗಳನ್ನು ನೀಡುತ್ತಿದೆ. ಭಾರತವು ಚೀನಾದ ಉತ್ಪನ್ನಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ಆಮದು ಮಾಡಿಕೊಳ್ಳುತ್ತಿರುವುದು ನಿಜವಾದರೂ, ಸ್ವಾವಲಂಬನೆಗೂ ಒತ್ತು ಕೊಡುತ್ತಿದೆ. ಅಲ್ಲದೆ, ದೇಶದಲ್ಲಿ ಜನರೂ ಸ್ವಯಂಪ್ರೇರಿತರಾಗಿ ಚೀನಾ ಉತ್ಪನ್ನಗಳ ನಿಷೇಧಕ್ಕೆ ಮುಂದಾಗಿದ್ದಾರೆ. ಅದಕ್ಕೆ ಪರ್ಯಾಯವಾಗಿ ಭಾರತೀಯ ಉತ್ಪನ್ನಗಳೇ ಸಿದ್ಧಗೊಂಡು, ಮಾರುಕಟ್ಟೆ ಪ್ರವೇಶಿಸುತ್ತಿರುವುದು ಆಶಾದಾಯಕ ಬೆಳವಣಿಗೆ. ಅಮೆರಿಕದೊಂದಿಗೆ ಈಗಾಗಲೇ ತೀವ್ರ ಪ್ರಮಾಣದ ವಾಣಿಜ್ಯ ಸಮರ ಹೊಂದಿರುವ ಚೀನಾ ಪ್ರಸಕ್ತ ತನ್ನದೇ ತಪು್ಪ ಮತ್ತು ಅಹಂಕಾರದ ನೀತಿಗಳಿಂದ ಭಾರತೀಯ ಮಾರುಕಟ್ಟೆಯಲ್ಲಿ ಹಿನ್ನಡೆ ಸಾಧಿಸುತ್ತಿದೆ.
