ಚೀನಾದ ಇಂಥ ನಯವಂಚಕತನದಿಂದಾಗಿಯೇ ಭಾರತ ಕೂಡ ಈಗ ತನ್ನ ಗಡಿನೀತಿಗಳಲ್ಲಿ ಬದಲಾವಣೆ ಮಾಡಿಕೊಂಡಿದ್ದು, ಅಗತ್ಯಬಿದ್ದಾಗ ತಿರುಗೇಟು ನೀಡಲು ಸಹ ಸಜ್ಜಾಗಿದೆ. ತಾವೇ ಒಪ್ಪಿಕೊಂಡ ನೈತಿಕತೆಯ ಗೆರೆಯನ್ನು ಮೀರುವವರಿಗೆ ಕಠಿಣ ಭಾಷೆಯಲ್ಲಿ ಉತ್ತರ ನೀಡಬೇಕಾದುದು ಅನಿವಾರ್ಯ. ಈ ಹಿನ್ನೆಲೆಯಲ್ಲಿ, ಗಡಿಯಲ್ಲಿರುವ ಸೈನಿಕರು ಶಸ್ತ್ರಾಸ್ತ್ರ ಹೊಂದಿರಬಾರದು ಎಂಬ ನಿಯಮಕ್ಕೆ ಸ್ವಲ್ಪ ಬದಲಾವಣೆ ಮಾಡಿಕೊಂಡಿರುವ ಭಾರತ, ಅಸಾಧಾರಣ ಸನ್ನಿವೇಶಗಳಲ್ಲಿ ಶಸ್ತ್ರ ಬಳಕೆಗೆ ಕಮಾಂಡರ್ ಮಟ್ಟದ ಅಧಿಕಾರಿಗಳು ನಿರ್ಣಯ ಕೈಗೊಳ್ಳಬಹುದು ಮತ್ತು ತುರ್ತಸ್ಥಿತಿಯಲ್ಲಿ ಆಯಾ ಸಂದರ್ಭಕ್ಕೆ ಹೊಂದಿಕೊಂಡು ತಕ್ಷಣವೇ ನಿರ್ಧಾರ ತೆಗೆದುಕೊಳ್ಳಬಹುದು ಎಂದು ಅವಕಾಶ ನೀಡಿದೆ. ಚೀನಾದ ಇಂಥ ಬೆನ್ನಿಗೆ ಇರಿಯುವ ನಡೆ ಹೊಸದೇನಲ್ಲ. 1962ರಲ್ಲಿಯೂ ನಯವಾಗಿ ಮಾತಾಡುತ್ತಲೇ ಭಾರತದ ಮೇಲೆ ಆಕ್ರಮಣವೆಸಗಿತು. ಹೀಗಾಗಿ ಭಾರತ ಕೂಡ ಈಗ ಚೀನಾ ಜತೆ ಬಿಗಿಯಾಗಿಯೇ ವ್ಯವಹರಿಸುತ್ತಿದ್ದು, ಪ್ರಸ್ತುತ ಸನ್ನಿವೇಶದಲ್ಲಿ ಅದು ಅನಿವಾರ್ಯ ಕೂಡ. ಆ ದೇಶದ ಇಂಥ ನೀತಿನಿಲುವುಗಳಿಂದಾಗಿ ಭಾರತದ ಜನರಲ್ಲಿಯೂ ಆಕ್ರೋಶ ಮಡುಗಟ್ಟಿದ್ದು, ಚೀನೀ ವಸ್ತುಗಳ ಬಹಿಷ್ಕಾರದ ಆಂದೋಲನದ ರೂಪದಲ್ಲಿ ಅದು ಹೊರಹೊಮ್ಮುತ್ತಿದೆ. ಈ ಕ್ರಮ ಎಷ್ಟು ಪ್ರಯೋಜನಕಾರಿಯಾದೀತು, ಚೀನಾವನ್ನು ಎಷ್ಟರಮಟ್ಟಿಗೆ ಬಗ್ಗಿಸೀತು ಎಂಬುದೆಲ್ಲ ಕ್ರಮೇಣ ಗೊತ್ತಾಗಬೇಕಾದ ಸಂಗತಿಯಾದರೂ, ಹೀಗೆ ಏಕ ಉದ್ದೇಶಕ್ಕೆ ಜನರು ಒಗ್ಗಟ್ಟು ತೋರುವುದನ್ನು ನಿರ್ಲಕ್ಷಿಸುವಂತಿಲ್ಲ.
