ನಿಧಾನವಾಗಿ ಹಲವು ರಂಗಗಳು ಚೇತರಿಕೆ ಕಾಣುತ್ತಿದ್ದು, ಹೊಸ ಆರ್ಥಿಕ ವರ್ಷದಲ್ಲಿ ಜಿಡಿಪಿ ಏರಿಕೆ ಕಾಣುವ ಭರವಸೆ ಮೂಡಿದೆ. ಅಲ್ಲದೆ, ಭಾರತದ ಫಾರ್ವಸಿಟಿಕಲ್ ವಲಯವು ಮುಂದಿನ ಹತ್ತು ವರ್ಷಗಳಲ್ಲಿ ಮೂರು ಪಟ್ಟು ಬೆಳವಣಿಗೆ ದಾಖಲಿಸಲಿದೆ. ಕೋವಿಡ್-19 ಅವಕಾಶ ಮತ್ತು ಸವಾಲುಗಳನ್ನು ಮುಂದಿಡುವ ಮೂಲಕ ಭಾರತ ‘ವಿಶ್ವದ ಫಾರ್ಮಸಿ’ ಆಗಿ ಹೊರಹೊಮ್ಮಿದೆ. 2030ಕ್ಕೆ ದೇಶದ ಫಾರ್ವ ವಲಯದ ಮೌಲ್ಯವು 120ರಿಂದ 130 ಬಿಲಿಯನ್ ಡಾಲರ್ ಮುಟ್ಟುವ ಅಂದಾಜಿದೆ. ಕೃಷಿ ವಲಯದ ಬೆಳವಣಿಗೆಯೂ ಆಶಾವಾದ ಮೂಡಿಸಿದೆ. ಈ ಬಾರಿಯ ಬಜೆಟ್ನಲ್ಲಿ ಕೃಷಿ ಸಾಲ ವಿತರಣೆ ಗುರಿಯನ್ನು 19 ಲಕ್ಷ ಕೋಟಿ ರೂಪಾಯಿಗೆ ಹೆಚ್ಚಿಸುವ ಸಾಧ್ಯತೆ ಇದೆ. 2020ರ ಬಜೆಟ್ನಲ್ಲಿ ಇದು 15 ಲಕ್ಷ ಕೋಟಿ ರೂಪಾಯಿಯಷ್ಟಿತ್ತು. ಮುಖ್ಯವಾಗಿ, ಕಳವಳ ಮೂಡಿಸಿರುವ ಮತ್ತೊಂದು ಸಂಗತಿ ಎಂದರೆ ಉದ್ಯೋಗ ನಷ್ಟ. ಕರೊನಾ ಲಾಕ್ಡೌನ್ ಪರಿಣಾಮ ನಿರುದ್ಯೋಗ ಪ್ರಮಾಣ ಹೆಚ್ಚುತ್ತಿದೆ. ಹಲವು ವಲಯಗಳಲ್ಲಿ ಉದ್ಯೋಗ ಕಡಿತ ಸಾಮಾನ್ಯ ಎಂಬಂತಾಗಿದೆ. ಈ ಸಮಸ್ಯೆ ಬಗೆಹರಿಸಲು ನಿರ್ಮಲಾ ಸೀತಾರಾಮನ್ ಯಾವ ಸೂತ್ರ ಮುಂದಿರಿಸಲಿದ್ದಾರೆ ಎಂಬುದನ್ನು ಕಾದು ನೊಡಬೇಕು. ಕೇಂದ್ರ ಸರ್ಕಾರ 2025ರ ಹೊತ್ತಿಗೆ 4 ಕೋಟಿ, 2030ರ ಹೊತ್ತಿಗೆ 8 ಕೋಟಿ ಉದ್ಯೋಗಸೃಷ್ಟಿಯ ಗುರಿ ಹೊಂದಿದೆ ಎಂಬುದು ಗಮನಾರ್ಹ. ಎಲ್ಲ ರಂಗಗಳ ಮೂಲಸೌಕರ್ಯ ವೃದ್ಧಿಯತ್ತಲೂ ಗಮನ ಕೇಂದ್ರೀಕರಿಸಬೇಕಿದೆ. ಹೀಗೆ ಹಲವು ನಿರೀಕ್ಷೆ, ಸವಾಲುಗಳಿಗೆ ಬಜೆಟ್ ಹೇಗೆ ಸ್ಪಂದಿಸಲಿದೆ ಎಂಬುದು ಕುತೂಹಲಕರ. ಒಟ್ಟಾರೆ, ಅವಕಾಶಗಳನ್ನು ಸಮರ್ಥವಾಗಿ ಬಳಸಿಕೊಂಡು ಎಲ್ಲ ವಲಯಗಳಿಗೆ ಚೈತನ್ಯ ತುಂಬುವುದು, ಆರ್ಥಿಕತೆ ಮತ್ತೆ ಏರುಗತಿಗೆ ತರುವುದು ಅವಶ್ಯ.
