ಸಹಕಾರ ಬ್ಯಾಂಕುಗಳ ಅವ್ಯವಸ್ಥೆ, ಭ್ರಷ್ಟಾಚಾರ, ಪಾರದರ್ಶಕತೆ ಇಲ್ಲದಿರುವುದು, ಠೇವಣಿದಾರರ ವಿಶ್ವಾಸ ಕಳೆದುಕೊಂಡಿರುವುದರ ಕುರಿತಂತೆ ‘ವಿಜಯವಾಣಿ’ ಸರಣಿ ವರದಿಗಳನ್ನು ಪ್ರಕಟಿಸುತ್ತಲೇ ಇದೆ. ಭ್ರಷ್ಟಾಚಾರ, ಸ್ವಜನಪಕ್ಷಪಾತದ ಪರಿಣಾಮ ಸಹಕಾರ ತತ್ತ್ವಕ್ಕೆ ಕೊಡಲಿಯೇಟು ಬಿದ್ದಿರುವುದು ದುರದೃಷ್ಟಕರ. ಸರ್ಕಾರಿ ಮಟ್ಟದಲ್ಲಿ ವ್ಯಾಪಕವಾಗಿ ಹಬ್ಬಿಕೊಂಡಿರುವ ಭ್ರಷ್ಟಾಚಾರದ ಪರಿಣಾಮ ಇಲ್ಲಿಯೂ ಕಂಡುಬರುತ್ತಿದೆ. ಭದ್ರತೆ ಇಲ್ಲದೆ ಬೇಕಾಬಿಟ್ಟಿ ಸಾಲ ನೀಡಿಕೆ, ಮರುವಸೂಲಿಯಲ್ಲಿ ನಿರ್ಲಕ್ಷ್ಯ, ಕಮಿಷನ್ ದಂಧೆಗಳಂತಹ ಸರಣಿ ಲೋಪಗಳಿಂದಾಗಿ ರಾಜ್ಯದ ನೂರಾರು ಕೋ-ಆಪರೇಟಿವ್ ಸೊಸೈಟಿಗಳು ದಿವಾಳಿಯಾಗಿವೆ. ಮತ್ತೊಂದೆಡೆ, ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್ಬಿಐ) ವ್ಯಾಪ್ತಿಗೆ ಒಳಪಡುವ 42 ಅರ್ಬನ್ ಕೋ-ಆಪರೇಟಿವ್ ಬ್ಯಾಂಕ್ಗಳೂ ನಷ್ಟದಲ್ಲಿರುವುದನ್ನು ರಾಜ್ಯ ಸರ್ಕಾರವೇ ಬಹಿರಂಗಪಡಿಸಿದೆ. ಸರ್ಕಾರ ಇಂತಹ ಬ್ಯಾಂಕ್ಗಳ ಪಟ್ಟಿ ಬಿಡುಗಡೆ ಮಾಡಿದ ಬಳಿಕ ಠೇವಣಿದಾರರಲ್ಲಿ ಆತಂಕ ಶುರುವಾಗಿದೆ. ರಾಜ್ಯದಲ್ಲಿರುವ 284 ಪಟ್ಟಣ ಸಹಕಾರಿ ಬ್ಯಾಂಕ್ಗಳ ಪೈಕಿ 242 ಬ್ಯಾಂಕ್ಗಳು ಲಾಭದಲ್ಲಿದ್ದರೆ, 42 ಬ್ಯಾಂಕ್ಗಳು ನಷ್ಟದಲ್ಲಿವೆ ಎಂಬುದು ಗಮನಾರ್ಹ.
