ರೌಡಿಶೀಟರ್ ಕಾರ್ಯಕ್ರಮದಲ್ಲಿ ಬಿಜೆಪಿ ನಾಯಕರು ಭಾಗಿಯಾದ ವಿಚಾರಕ್ಕೆ ಸಂಬಂಧಿಸಿದಂತೆ ಕಾಂಗ್ರೆಸ್ ನಾಯಕರು, ಬಿಜೆಪಿಯು ರೌಡಿ ಮೋರ್ಚಾ ತೆರೆಯಲಿ ಎಂದು ಲೇವಡಿ ಮಾಡಿದ್ದರೆ; ಇದಕ್ಕೆ ತಿರುಗೇಟು ನೀಡಿರುವ ಬಿಜೆಪಿಯು, ‘ಭೂಗತ ಪಾತಕಿಗಳ ಗರಡಿಯಲ್ಲಿ ಬೆಳೆದ ಡಿ.ಕೆ. ಶಿವಕುಮಾರ ಕಾಂಗ್ರೆಸ್ ಅಧ್ಯಕ್ಷರಾಗಿದ್ದಾರೆ. ಕೊಲೆ ಆರೋಪಿ ವಿನಯ್ ಕುಲಕರ್ಣಿ ಕಾಂಗ್ರೆಸ್ ನಾಯಕರಾಗಿದ್ದಾರೆ. ಗೂಂಡಾಗಿರಿಯ ನಲಪಾಡ್ ರಾಜ್ಯ ಯುವ ಕಾಂಗ್ರೆಸ್ ಅಧ್ಯಕ್ಷ’ ಎಂದು ಟ್ವೀಟ್ ಮಾಡಿದೆ. ಇಲ್ಲಿ ಗಮನಿಸಬೇಕಾದ ಸಂಗತಿಯೆಂದರೆ, ತಮ್ಮ ವಿರುದ್ಧದ ಆರೋಪಗಳಿಗೆ ಯೋಗ್ಯ ರೀತಿಯಲ್ಲಿ ಸ್ಪಷ್ಟನೆ, ಸಮರ್ಥನೆ ನೀಡುವ ಬದಲಾಗಿ, ಇನ್ನೊಬ್ಬರ ಹುಳುಕನ್ನು ಎತ್ತಿ ತೋರಿಸುತ್ತಿರುವುದು. ಒಂದು ಪಕ್ಷದ ನಾಯಕರೊಬ್ಬರು ಇನ್ನೊಂದು ಪಕ್ಷದ ನಾಯಕರ ಕುರಿತು, 75 ವರ್ಷಗಳಾಗಿರುವುದಿಂದ ರಾಜಕೀಯ ನಿವೃತ್ತಿ ಪಡೆಯಲಿ ಎಂದು ಹೇಳುತ್ತಾರೆ. ಆದರೆ, ತಮ್ಮ ಪಕ್ಷದಲ್ಲಿಯೂ 75 ವರ್ಷ ಮೀರಿರುವ ನಾಯಕರು ಸಾಕಷ್ಟು ಮಂದಿ ಇದ್ದಾರೆ ಎಂಬ ಸಂಗತಿಯು ಅವರಿಗೆ ಗೊತ್ತಲ್ಲವೆಂದೇನಲ್ಲ. ಘನತೆ, ಗಾಂಭೀರ್ಯ, ತೂಕವಿಲ್ಲದೆ ಪರಸ್ಪರ ಕೆಸರೆರಚಾಟ, ವಾಗ್ದಾಳಿಯಲ್ಲಿ ತೊಡಗಿರುವುದಕ್ಕೆ ಇವೊಂದಿಷ್ಟು ಸದ್ಯದ ಉದಾಹರಣೆಗಳು ಮಾತ್ರ. ನಾಲಿಗೆಯ ಮೇಲೆ ಹಿಡಿತ ಇಲ್ಲದ ಇಂತಹ ಮಾತುಗಳಿಗೆ ಕೊರತೆಯೇನೂ ಇಲ್ಲ.
