ಭಯೋತ್ಪಾದಕ ಸಂಘಟನೆಗಳು ಮತ್ತು ಅದರ ನಾಯಕರು ಇತ್ತೀಚಿನ ದಿನಗಳಲ್ಲಿ ಹತಾಶರಾಗಿದ್ದಾರೆ ಎಂಬುದರಲ್ಲಿ ಅನುಮಾನವೇ ಇಲ್ಲ. ಕೆಲ ವರ್ಷಗಳ ಹಿಂದೆ ತಮ್ಮ ಕರಾಳ ಜಾಲವನ್ನು ವಿಸ್ತರಿಸಿಕೊಂಡಿದ್ದ ಈ ಸಂಘಟನೆಗಳು ಹಿಂಸೆ, ರಕ್ತಪಾತ, ಅಶಾಂತಿ ಮೂಲಕ ಸದಾ ಆತಂಕದ ವಾತಾವರಣ ಸೃಷ್ಟಿಸಲು ಯತ್ನಿಸುತ್ತಿದ್ದವು. 2008ರಲ್ಲಿ ಮುಂಬೈಯಲ್ಲಿ ಬಹಿರಂಗವಾಗಿ ಎರಗಿ ಬಂದ ಉಗ್ರರು, ಪೈಶಾಚಿಕ ಕೃತ್ಯದಿಂದ ಬೆಚ್ಚಿಬೀಳಿಸಿದ್ದರು. ಭಾರತ ಹಲವು ದಶಕಗಳಿಂದಲೂ ‘ಭಯೋತ್ಪಾದನೆ ವಿರುದ್ಧ ಸಮರ’ವನ್ನು ಕೈಗೊಂಡಿದೆಯಾದರೂ, ಅದು ತೀವ್ರ ಪರಿಣಾಮಕಾರಿಯಾಗಿದ್ದು ಇತ್ತೀಚಿನ ವರ್ಷಗಳಲ್ಲಿ. ಭಯೋತ್ಪಾದನೆ ವಿರುದ್ಧ ಒಟ್ಟಾಗಿ ಹೋರಾಡಬೇಕು ಎಂದು ಜಾಗತಿಕ ವೇದಿಕೆಗಳಲ್ಲಿ ಬಲವಾಗಿ ದನಿ ಎತ್ತಿದ ಭಾರತ, ಉಗ್ರ ಸಂಘಟನೆಗಳಿಗೆ ಹಣಕಾಸಿನ ಮೂಲ, ಶಸ್ತ್ರಾಸ್ತ್ರ ಮೂಲಗಳನ್ನು ಕತ್ತರಿಸಲು ಕ್ರಮ ಕೈಗೊಂಡಿತು. ಅದರಲ್ಲೂ, ಜಮ್ಮು-ಕಾಶ್ಮೀರಕ್ಕೆ ನೀಡಿದ್ದ ವಿಶೇಷ ಸ್ಥಾನಮಾನವನ್ನು 2019ರ ಆಗಸ್ಟ್ನಲ್ಲಿ ರದ್ದುಪಡಿಸಿ, ಆ ರಾಜ್ಯವನ್ನು ಎರಡು ಕೇಂದ್ರಾಡಳಿತ ಪ್ರದೇಶವನ್ನಾಗಿ ಮಾಡಿದ ಬಳಿಕ ಪರಿಸ್ಥಿತಿಯೇ ಬದಲಾಯಿತು. ಭಯೋತ್ಪಾದಕರ ಅಡಗುದಾಣಗಳನ್ನು ಹುಡುಕಿ ನಾಶಗೊಳಿಸಲಾಯಿತು. ಸ್ಥಳೀಯ ಉಗ್ರರ ವಿರುದ್ಧ ಮತ್ತು ಅವರಿಗೆ ಸಹಕರಿಸುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಯಿತು. ಅಲ್ಲದೆ, ಭದ್ರತಾಪಡೆಗಳ ಬಿಗಿ ಕ್ರಮದಿಂದಾಗಿ ಕಾಶ್ಮೀರ ಕಣಿವೆಯಲ್ಲಿ ಉಗ್ರರ ಒಳನುಸುಳುವಿಕೆಗೆ ಕಡಿವಾಣ ಬಿದ್ದಿದೆ. ಎನ್ಕೌಂಟರ್ಗಳಲ್ಲಿ ಭಯೋತ್ಪಾದಕ ಸಂಘಟನೆಗಳ ಹಲವು ಕಮಾಂಡರ್ಗಳು ಹತರಾಗಿದ್ದಾರೆ. ಮಾದಕದ್ರವ್ಯ ಕಳ್ಳಸಾಗಾಣಿಕೆ, ನಕಲಿ ನೋಟು ಚಲಾವಣೆಯ ದಂಧೆಗೂ ಕಡಿವಾಣ ಬಿದ್ದಿದೆ.
