ರಾಜ್ಯದಲ್ಲಿ ಓಡಾಡುವ ಖಾಸಗಿ ಬಸ್ ಹಾಗೂ ಐಷಾರಾಮಿ ಕಾರುಗಳ ಪೈಕಿ ಶೇ. 40ರಷ್ಟು ವಾಹನಗಳು ಹೊರರಾಜ್ಯಗಳಲ್ಲಿ ನೋಂದಣಿಯಾಗುತ್ತಿರುವ ಅಂಶವು ಗಂಭೀರ ಸಂಗತಿಯಾಗಿದೆ. ಕರ್ನಾಟಕದಲ್ಲಿ ತೆರಿಗೆ ಪ್ರಮಾಣ ಸಾಕಷ್ಟು ಜಾಸ್ತಿ ಇರುವುದರಿಂದ ವಾಹನ ಮಾಲಿಕರು ಬೇರೆ ರಾಜ್ಯಗಳಲ್ಲಿ ನೋಂದಣಿಗೆ ಮುಂದಾಗುತ್ತಿದ್ದಾರೆ. ರಾಜ್ಯದಲ್ಲಿ ಒಂದು ಬಸ್ಗೆ 5 ಲಕ್ಷ ರೂಪಾಯಿ ರಸ್ತೆ ತೆರಿಗೆ ಪಾವತಿಸಬೇಕಾಗಿದ್ದರೆ, ಪುದುಚೇರಿಯಂತಹ ರಾಜ್ಯಗಳಲ್ಲಿ 1.5 ಲಕ್ಷ ರೂಪಾಯಿಯಲ್ಲೇ ಈ ಕೆಲಸ ಮುಗಿದುಹೋಗುತ್ತದೆ. ರಾಜ್ಯದಲ್ಲಿ 10 ಲಕ್ಷ ರೂಪಾಯಿ ತೆರಿಗೆ ಪಾವತಿಸಬೇಕಾದ ಐಷಾರಾಮಿ ಕಾರುಗಳಿಗೆ ಕೆಲ ರಾಜ್ಯಗಳಲ್ಲಿ 2 ಲಕ್ಷ ರೂಪಾಯಿ ಮಾತ್ರ ಸಾಕಾಗುತ್ತದೆ. ಹೀಗಾಗಿ, ವಾಹನ ಮಾಲೀಕರು ಲಕ್ಷಾಂತರ ರೂಪಾಯಿ ತೆರಿಗೆ ಉಳಿಸಲು ಅನ್ಯ ರಾಜ್ಯಗಳಲ್ಲಿ ನೋಂದಣಿಗೆ ಮುಂದಾಗುತ್ತಿರುವುದರಿಂದ ರಾಜ್ಯದ ಖಜಾನೆಗೆ ಬಹುದೊಡ್ಡ ನಷ್ಟವಾಗುತ್ತಿದೆ. ಕರ್ನಾಟಕ ಸರ್ಕಾರವು ಈಗಲಾದರೂ ಎಚ್ಚೆತ್ತುಕೊಂಡು, ಸೂಕ್ತ ರೀತಿಯಲ್ಲಿ ವಾಹನ ತೆರಿಗೆ ಸುಧಾರಣೆಗಳನ್ನು ಜಾರಿಗೊಳಿಸುವ ತರುವ ಮೂಲಕ ತನಗಾಗುವ ನಷ್ಟವನ್ನು ತಪ್ಪಿಸುವುದು ಅಗತ್ಯವಿದೆ. ಈ ಮೂಲಕ ರಾಜ್ಯದ ವಾಹನ ಸವಾರರಿಗೆ ತೆರಿಗೆ ಭಾರವನ್ನೂ ಇಳಿಸುವ ಮೂಲಕ ಜನಸ್ನೇಹಿಯಾಗಲು ಅವಕಾಶವಿದೆ.
