ಐಟಿಬಿಟಿ ನಗರವಾಗಿ ಗುರುತಿಸಿಕೊಂಡಿರುವ, ಅವಕಾಶಗಳ ಆಗರವಾಗಿರುವ ಬೆಂಗಳೂರಿಗೆ ನಿತ್ಯವೂ ಸಾವಿರಾರು ಜನರು ಬರುತ್ತಿರುತ್ತಾರೆ. ಹೀಗಾಗಿ ಬಂದವರೆಲ್ಲರ ಮೇಲೂ ಪೊಲೀಸರು ನಿಗಾ ಇಡುವುದು ಸಾಧ್ಯವಾಗುವುದಿಲ್ಲ. ಕೋಟಿಗಿಂತ ಹೆಚ್ಚಿಗೆಯಿರುವ ಜನರ ನಡುವೆ ಯಾವುದೋ ವೇಷದಲ್ಲಿ ಯಾವುದೋ ಕೆಲಸ ಮಾಡುತ್ತ ಇದ್ದುಬಿಡಬಹುದು. ಪೊಲೀಸರಿಗೆ ಶಂಕಿತರ ಬಗ್ಗೆ ಮಾಹಿತಿ ಬಂದರೆ ಮಾತ್ರ ಅವರು ನಿಗಾ ಇರಿಸಿ, ಮುಂದಿನ ಕ್ರಮ ಕೈಗೊಳ್ಳಬಹುದು. ಹೀಗಾಗಿ ಎಲ್ಲ ಸಂದರ್ಭದಲ್ಲೂ ಪೊಲೀಸ್ ವೈಫಲ್ಯ ಎಂದು ಷರಾ ಬರೆಯಲು ಸಾಧ್ಯವಿಲ್ಲವಾದರೂ, ಗುಪ್ತಚರ ದಳವನ್ನು ಕ್ರಿಯಾಶೀಲವಾಗಿಟ್ಟು, ಪೊಲೀಸ್ ಇಲಾಖೆ ಹದ್ದುಗಣ್ಣಿಟ್ಟಿರಬೇಕು ಎಂಬುದರಲ್ಲಿ ಎರಡು ಮಾತಿಲ್ಲ. ಅಲ್ಲದೆ, ಪದೇಪದೆ ಇಂಥ ಘಟನೆಗಳು ಜರುಗುತ್ತಿದ್ದರೆ ಅದು ಪೊಲೀಸ್ ಇಲಾಖೆಗೆ ಮುಜುಗರ ತರುವ ಸಂಗತಿ ಹಾಗೂ ಜನರಲ್ಲಿ ನಗರದ ಸುರಕ್ಷೆ ಬಗ್ಗೆ ಆತಂಕ ಉಂಟಾಗುತ್ತದೆ. ಇದು ಬೇರೆ ಬೇರೆ ರೀತಿಯಲ್ಲಿ ಪರಿಣಾಮ ಬೀರುತ್ತದೆ. ಬೆಂಗಳೂರಿನಂಥ ನಗರದಲ್ಲಿ ಅಕ್ಕಪಕ್ಕದ ಮನೆಯಲ್ಲಿರುವವರ ಒಡನಾಟವೂ ಇರದಷ್ಟು ವ್ಯಸ್ತವಾಗಿ ಜೀವನ ನಡೆಯುತ್ತಿರುತ್ತದೆ. ಇದು ಸಹ ಅಪರಾಧ ಕೃತ್ಯವೆಸಗುವವರಿಗೆ ಅನುಕೂಲಕರವಾಗಿ ಪರಿಣಮಿಸುತ್ತದೆ. ಬಾಡಿಗೆ ಮನೆ ನೀಡುವಾಗ ಅನುಸರಿಸಬೇಕಾದ ನಿಯಮಗಳ ಬಗ್ಗೆ ಪೊಲೀಸ್ ಇಲಾಖೆ ಮಾರ್ಗಸೂಚಿ ಹೊರಡಿಸಿದ್ದು, ಅದನ್ನು ಅನುಸರಿಸುವ ಜವಾಬ್ದಾರಿ ಜನರ ಮೇಲಿದೆ. ಶಾಂತಿಸುವ್ಯವಸ್ಥೆ ಕಾಪಾಡುವಲ್ಲಿ ಸಮಾಜ ಮತ್ತು ಸರ್ಕಾರಗಳ ಸಮನ್ವಯದ ಕಾರ್ಯ ತಕ್ಕಮಟ್ಟಿಗೆ ಪ್ರಯೋಜನಕಾರಿಯಾಗಬಲ್ಲದು.
