ಅಭ್ಯರ್ಥಿಗಳು ಎಷ್ಟನೇ ಬಾರಿ ಪರೀಕ್ಷೆ ಬರೆಯುತ್ತಿದ್ದಾರೆ ಎಂಬಂಥ ದಾಖಲಾತಿ ಇಟ್ಟು ಪರಿಶೀಲಿಸಲು ಕೂಡ ಯುಪಿಎಸ್ಸಿಗೆ ಈ ಒಟಿಎಸ್ ವ್ಯವಸ್ಥೆ ಅನುಕೂಲ ಒದಗಿಸುತ್ತದೆ. ಕರ್ನಾಟಕ ಲೋಕಸೇವಾ ಆಯೋಗವು (ಕೆಪಿಎಸ್ಸಿ) ಕೆಎಎಸ್, ಕೆಪಿಎಸ್ ಮುಂತಾದ ಪ್ರೊಬೆಷನರಿ ಗೆಜೆಟೆಡ್ ಹುದ್ದೆಗಳ ನೇಮಕಾತಿ ಪರೀಕ್ಷೆಯನ್ನು ಯುಪಿಎಸ್ಸಿ ಮಾದರಿಯಲ್ಲಿ (ಪ್ರಿಲಿಮನರಿ ಪರೀಕ್ಷೆ, ನಂತರ ಮೇನ್ಸ್ ಪರೀಕ್ಷೆ ಹಾಗೂ ಕೊನೆಯಲ್ಲಿ ಸಂದರ್ಶನ ಆಧಾರಿತವಾಗಿ ನೇಮಕಾತಿ) ಮೊದಲ ಬಾರಿಗೆ 1998ರಲ್ಲಿ ನಡೆಸಿತ್ತು. ಒಟಿಎಸ್ ಮಾದರಿಯ ಸೌಲಭ್ಯವನ್ನು ಕೆಪಿಎಸ್ಸಿ ಸಹ ಅಳವಡಿಸಿಕೊಂಡರೆ ರಾಜ್ಯದ ಉದ್ಯೋಗಾಕಾಂಕ್ಷಿಗಳಿಗೆ ಅನುಕೂಲವಾಗುತ್ತದೆ. ಮಾಹಿತಿ ತಂತ್ರಜ್ಞಾನದ ನೆರವು ಪಡೆದುಕೊಂಡು, ವ್ಯವಸ್ಥೆಯನ್ನು ಮೇಲ್ದರ್ಜೆಗೇರಿಸುವ, ಆ ಮೂಲಕ ಪ್ರಕ್ರಿಯೆಯನ್ನು ಸರಳೀಕರಿಸಿ ಜನರಿಗೆ ಅನುಕೂಲವುಂಟುಮಾಡುವ ಪದ್ಧತಿ ನಿರಂತರವಾಗಿ ನಡೆಯುತ್ತಿರಬೇಕು.
