ಅಂದರೆ, ಚೀನಾಗೆ ಭಾರತದ ರಫ್ತು ಕಡಿಮೆ ಇದ್ದು, ಅಗಾಧ ಪ್ರಮಾಣದ ಆಮದನ್ನು ನಾವು ಆ ದೇಶದಿಂದ ಮಾಡಿಕೊಳ್ಳುತ್ತೇವೆ ಎಂದರ್ಥ. ಅಮೆರಿಕದ ನಂತರ ಅತಿಹೆಚ್ಚು ವ್ಯಾಪಾರ ವಹಿವಾಟನ್ನು ಭಾರತ ಹೊಂದಿರುವುದೇ ಚೀನಾದೊಂದಿಗೆ. ಹೀಗಿದ್ದರೂ ಚೀನಾವನ್ನು ಭಾರತ ವಿಶ್ವಾಸಾರ್ಹ ದೇಶವಾಗಿ ಪರಿಗಣಿಸುವುದಿಲ್ಲ. 1962ರಲ್ಲಿ ಚೀನಾ ಏಕಾಏಕಿ ಭಾರತದ ಮೇಲೆ ಆಕ್ರಮಣ ನಡೆಸಿ ಯುದ್ಧ ಕೈಗೊಂಡಿತು. ಜಿನ್ಪಿಂಗ್ ಆಡಳಿತಾವಧಿಯಲ್ಲೇ ಡೊಕ್ಲಾಮ್ ಗಡಿಯಲ್ಲಿ ಉದ್ವಿಗ್ನ ಪರಿಸ್ಥಿತಿ ತಲೆದೋರಿ ಪರಸ್ಪರ ಸೈನಿಕರ ನಡುವೆ ಘರ್ಷಣೆಗೂ ಕಾರಣವಾಯಿತು. ಕೆಲ ದಿನಗಳ ಹಿಂದೆಯಷ್ಟೇ ಎಲ್ಇಟಿ ಉಗ್ರನನ್ನು ಜಾಗತಿಕ ಭಯೋತ್ಪಾದಕ ಎಂದು ಘೋಷಿಸುವ ಭಾರತದ ಪ್ರಸ್ತಾವಕ್ಕೆ ವಿಶ್ವಸಂಸ್ಥೆಯಲ್ಲಿ ಚೀನಾ ಮತ್ತೆ ವಿರೋಧ ವ್ಯಕ್ತಪಡಿಸಿತು. ಈಗ ಜಿನ್ಪಿಂಗ್ ಸೆಂಟ್ರಲ್ ಮಿಲಿಟರಿ ಕಮಿಷನ್ ಮುಖ್ಯಸ್ಥರಾಗಿಯೂ ಮರುನೇಮಕಗೊಂಡಿದ್ದಾರೆ. ಹೀಗಾಗಿ, ಇಂತಹ ಮಿಲಿಟರಿ ಸಂಘರ್ಷದ ಸಾಧ್ಯತೆಗಳನ್ನು ತಳ್ಳಿಹಾಕಲಾಗದು. ರಾಜಕೀಯವಾಗಿ, ಭೌಗೋಳಿಕವಾಗಿ ಚೀನಾ ಯಾವಾಗಲೂ ಭಾರತಕ್ಕೆ ಮಗ್ಗುಲಮುಳ್ಳು. ಆ ಎಚ್ಚರದಲ್ಲೇ ಭಾರತದ ನೀತಿಗಳು ರೂಪುಗೊಳ್ಳಬೇಕಾದುದು ಅನಿವಾರ್ಯ.
