ಕರೊನಾ ಸೋಂಕಿನ ಪ್ರಸರಣ ತಡೆಯಲು ಹಲವು ವಿಧಾನಗಳಿಗೆ ಮೊರೆ ಹೋಗಲಾಯಿತು. ಆ ಪೈಕಿ ಪ್ರಮುಖ ಅಸ್ತ್ರ ಲಾಕ್ಡೌನ್. ಕೆಲ ತಿಂಗಳುಗಳ ಬಳಿಕ ಹಲವು ಕ್ಷೇತ್ರಗಳ ಚಟುವಟಿಕೆಗಳು ಪುನರಾರಂಭವಾದರೂ, ಸುರಕ್ಷತಾ ಕಾರಣದಿಂದ ಶಾಲೆ-ಕಾಲೇಜುಗಳನ್ನು ತೆರೆದಿರಲಿಲ್ಲ. ಹಾಗಂತ, ಶೈಕ್ಷಣಿಕ ಕಲಿಕೆ ನಿಲ್ಲಿಸಲು ಸಾಧ್ಯವಿರಲಿಲ್ಲ. ಅದಕ್ಕೆ ಪರ್ಯಾಯವಾದದ್ದು ಆನ್ಲೈನ್ ತರಗತಿಗಳು. ನೇರ ತರಗತಿಗಳಂತೆ ಆನ್ಲೈನ್ ತರಗತಿಗಳು ಪರಿಣಾಮಕಾರಿಯಲ್ಲ ಎಂಬುದು ಶಿಕ್ಷಕರಿಗೂ, ವಿದ್ಯಾರ್ಥಿಗಳಿಗೆ ಗೊತ್ತಿದ್ದರೂ; ಅದು ಅನಿವಾರ್ಯ ಕ್ರಮವಾಗಿತ್ತು. ಆದರೆ, ಈ ಬಗೆಯ ತರಗತಿಗಳಿಂದ ಒಂದೊಂದೇ ಸಮಸ್ಯೆಗಳು ಕಾಣಿಸಿಕೊಳ್ಳಲಾರಂಭಿಸಿದವು. ದೀರ್ಘಾವಧಿಯವರೆಗೆ ಲ್ಯಾಪ್ಟಾಪ್ ಅಥವಾ ಮೊಬೈಲ್ ಮುಂದೆ ಕುಳಿತುಕೊಳ್ಳುವುದರಿಂದ ತಲೆನೋವು, ಬೆನ್ನುನೋವು, ಕಣ್ಣುನೋವು ಕಾಣಿಸಿಕೊಳ್ಳಲು ಆರಂಭಿಸಿತಲ್ಲದೆ ಕಲಿಕೆಯಲ್ಲಿ ಅನಾಸಕ್ತಿ, ಕೆಲವರಲ್ಲಿ ಖಿನ್ನತೆಯೂ ಆವರಿಸಿಕೊಂಡಿತು. ಸದ್ಯ, ಶಾಲೆಗಳು ಪುನರಾರಂಭವಾಗಿವೆ ಎಂದು ಸಮಾಧಾನ ಪಡುವ ಹೊತ್ತಿಗೆ ಹೊಸ ಸಮಸ್ಯೆಗಳು ಕಾಣಿಸಿಕೊಂಡಿದ್ದು, ಇವುಗಳ ಪರಿಹಾರದ ನಿಟ್ಟಿನಲ್ಲಿ ಕಾಳಜಿ ತೋರಬೇಕಿದೆ.
