ವಿವಿಧ ತಾಂತ್ರಿಕ ನೆಪಗಳೊಡ್ಡಿ ದಶಕಗಳಿಂದ ನನೆಗುದಿಗೆ ಬಿದ್ದಿರುವ ಸಮಸ್ಯೆಗೆ ಶಾಶ್ವತ ಪರಿಹಾರ ಒದಗಿಸಿ ಕೌಟುಂಬಿಕ ನೆಮ್ಮದಿ ಹಾಗೂ ಹಳ್ಳಿಗಳಲ್ಲಿ ಸಾಮರಸ್ಯ ಕಾಪಾಡಿಕೊಳ್ಳಲು ನೆರವಾಗಲಿದೆ. ಸಾಗುವಳಿ ಜಮೀನಿನ ಮಾಲೀಕರು ನಿಧನರಾದ ಬಳಿಕ ವಾರಸುದಾರರಿಗೆ ಜಮೀನಿನ ಮಾಲೀಕತ್ವ ನೀಡುವುದೇ ಪೌತಿ ಖಾತೆ. ಸಕಾಲಕ್ಕೆ ಈ ಕ್ರಮಗಳಾಗದೆ ಕೌಟುಂಬಿಕ ಬಿರುಕು, ಕೆಲವೊಮ್ಮೆ ಇಡೀ ಹಳ್ಳಿಯಲ್ಲಿ ಅಶಾಂತಿಗೆ ಕಾರಣವಾದ ಘಟನೆಗಳು ನಡೆದಿವೆ. ಮೃತರ ಹೆಸರಿನಲ್ಲಿಯೇ ಜಮೀನಿನ ಮಾಲೀಕತ್ವ ಮುಂದುವರಿದರೆ, ಬೆಳೆ ಸಾಲ, ಜಮೀನಿನ ಅಭಿವೃದ್ಧಿ, ಹೊಸ ಪ್ರಯತ್ನಗಳಿಗೆ ಬೇಕಾದ ಸಹಾಯ ಪಡೆಯಲು ಅಡಚಣೆಯಾಗುತ್ತದೆ. ಕೇಂದ್ರ ಸರ್ಕಾರದ ಕಿಸಾನ್ ಸಮ್ಮಾನ್ ನಿಧಿ ಸೇರಿ ಅನೇಕ ಸರ್ಕಾರಿ ಯೋಜನೆಗಳ ಪ್ರಯೋಜನ ಪಡೆದುಕೊಳ್ಳುವುದಕ್ಕೆ ಬರೆ ಬೀಳುತ್ತದೆ. ಪ್ರಕೃತಿ ವಿಕೋಪಗಳಿಂದ ಅನುಭವಿಸಿದ ಬೆಳೆ ನಷ್ಟಕ್ಕೂ ಪರಿಹಾರ ಪಡೆಯಲು ಪರದಾಡಬೇಕಾಗುತ್ತದೆ. ಕೃಷಿ ಸಾಲಕ್ಕಾಗಿ ಬ್ಯಾಂಕ್ ಕೇಳುವ ದಾಖಲೆ ನೀಡಲಾಗದೆ ಸಾವಿರಾರು ರೈತರು ದುಬಾರಿ ಬಡ್ಡಿ ದರದ ಖಾಸಗಿ ಸಾಲಕ್ಕೆ ಮೊರೆಹೋಗುವ ಪರಿಸ್ಥಿತಿಗಳು ಕೂಡ ತಲೆದೋರುತ್ತವೆ. ಸಕಾಲಕ್ಕೆ ಪೌತಿ ಖಾತೆ ಅರ್ಜಿ ಇತ್ಯರ್ಥವಾದರೆ ಮಾಲೀಕತ್ವ ನಿಚ್ಚಳವಾಗಿ ಈ ಸಮಸ್ಯೆಗಳು ನಿವಾರಣೆಯಾಗುತ್ತವೆ. ಬಹುಮುಖ್ಯವಾಗಿ ಕೃಷಿಕರ ಆರ್ಥಿಕ ಪರಿಸ್ಥಿತಿ ಸುಧಾರಿಸುತ್ತದೆ. ಬಹುಕಾಲದ ಪೌತಿ ಖಾತೆ ಕನಸನ್ನು ಆಂದೋಲನದ ಮೂಲಕ ಸರ್ಕಾರ ನನಸು ಮಾಡುವತ್ತ ಹೆಜ್ಜೆಯಿಟ್ಟಿರುವುದು ಗ್ರಾಮೀಣ ಜನರಿಗೆ ವರದಾನವಾಗಲಿದೆ.
