ಆಂತರಿಕ ಗಲಭೆಗಳು, ಅಡಚಣೆಗಳನ್ನು ನಿಭಾಯಿಸಲು ಸಮರ್ಥವಲ್ಲದ ರಾಜ್ಯ ಸರ್ಕಾರಗಳಿಗೆ ನೆರವು ನೀಡುವ ಉದ್ದೇಶದಿಂದ ಜಾರಿಗೊಳಿಸಲಾಗುವ ಈ ಕಾಯ್ದೆಯು ಸರ್ಕಾರ ಗುರುತಿಸಿರುವ ಪ್ರದೇಶಗಳಲ್ಲಿ ಭಾರತೀಯ ಸೇನೆ, ವಾಯುಪಡೆ ಹಾಗೂ ಕೇಂದ್ರ ಅರೆಸೇನಾ ಪಡೆಗಳಿಗೆ ಕಾನೂನು ಮತ್ತು ಸುವ್ಯವಸ್ಥೆ ಕಾಪಾಡಲು ವಿಶೇಷ ಅಧಿಕಾರ ನೀಡುತ್ತದೆ. ಕಾನೂನು ಮತ್ತು ಸುವ್ಯವಸ್ಥೆಗೆ ವಿರುದ್ಧವಾಗಿ ನಡೆದುಕೊಳ್ಳುವ ಯಾರ ಮೇಲೆಯಾದರೂ ಗುಂಡು ಹಾರಿಸುವ, ವಾರಂಟ್ ಇಲ್ಲದೆ ಬಂಧಿಸುವ, ಯಾವುದೇ ವಾಹನ ತಡೆದು ಪರಿಶೀಲಿಸುವ ರೀತಿಯ ಹಲವು ಅಧಿಕಾರಗಳು ಇದರಲ್ಲಿ ಸೇರಿವೆ. ಕೆಲ ಸಂದರ್ಭದಲ್ಲಿ ಈ ಅಧಿಕಾರ ದುರ್ಬಳಕೆಯಾದ ಪ್ರಕರಣಗಳೂ ಜರುಗಿವೆ. ನಕಲಿ ಎನ್ಕೌಂಟರ್, ಮಾನವ ಹಕ್ಕುಗಳ ಉಲ್ಲಂಘನೆ, ಮಹಿಳೆಯರ ಮೇಲೆ ಲೈಂಗಿಕ ದೌರ್ಜನ್ಯ, ಬಂಧನದಲ್ಲಿದ್ದಾಗ ಚಿತ್ರಹಿಂಸೆ ಆರೋಪಗಳು ಕೇಳಿಬಂದಿವೆ. ಈ ಹಿನ್ನೆಲೆಯಲ್ಲಿಯೇ ಕಾಯ್ದೆ ರದ್ದತಿಗೆ ಆಗ್ರಹಿಸಿ ಮಣಿಪುರದ ಇರೋಮ್ ಶರ್ವಿುಳಾ 16 ವರ್ಷ ಉಪವಾಸ ಸತ್ಯಾಗ್ರಹ ನಡೆಸಿದ್ದು ಜಾಗತಿಕವಾಗಿ ಗಮನಸೆಳೆದಿತ್ತು. ಈಗ ಈಶಾನ್ಯ ರಾಜ್ಯಗಳಲ್ಲಿ ಪರಿಸ್ಥಿತಿ ಸುಧಾರಿಸುತ್ತಿರುವುದರಿಂದ ಹಂತಹಂತವಾಗಿ ಎಚ್ಚರಿಕೆಯಿಂದ ಈ ಕಾಯ್ದೆ ರದ್ದುಪಡಿಸಿ, ಸ್ಥಳೀಯರಲ್ಲಿ ವಿಶ್ವಾಸ ಮೂಡಿಸುವ ಅಗತ್ಯವಿದೆ.
