ಮೂರರಿಂದ ಎಂಟು ವರ್ಷದ ಮಕ್ಕಳ ಅಡಿಪಾಯ ಹಂತದ ಶಿಕ್ಷಣಕ್ಕಾಗಿ ರಾಷ್ಟ್ರೀಯ ಪಠ್ಯಕ್ರಮ ಚೌಕಟ್ಟಿಗೆ (ಎನ್ಸಿಎಫ್) ಕೇಂದ್ರ ಶಿಕ್ಷಣ ಸಚಿವ ಧಮೇಂದ್ರ ಪ್ರಧಾನ್ ಚಾಲನೆ ನೀಡಿದ್ದಾರೆ. ‘ನೂತನ ಶಿಕ್ಷಣ ನೀತಿ -2020’ ಅನುಷ್ಠಾನಕ್ಕೆ ಎನ್ಸಿಎಫ್ ಪ್ರಮುಖ ಹೆಜ್ಜೆಯಾಗಿದ್ದು, ಹೊಸ ಪಠ್ಯಕ್ರಮವು ಮಕ್ಕಳ ಸಮಗ್ರ ಅಭಿವೃದ್ಧಿ ಮತ್ತು ಕೌಶಲಕ್ಕೆ ಒತ್ತು ನೀಡಲು ಉದ್ದೇಶಿಸಿದೆ. ಮಗುವಿನ ಜೀವನದ ಮೊದಲ 8 ವರ್ಷಗಳಲ್ಲಿ ಮಿದುಳಿನ ಬೆಳವಣಿಗೆಯು ಅತ್ಯಂತ ವೇಗವಾಗಿರುವುದರಿಂದ ಇದಕ್ಕನುಗುಣವಾಗಿ ಎನ್ಸಿಎಫ್ನಲ್ಲಿ ಮಕ್ಕಳ ಶಿಕ್ಷಣಕ್ಕಾಗಿ ‘ಪಂಚಕೋಶ’ ಪರಿಕಲ್ಪನೆ ಮುಂದಿಡಲಾಗಿದೆ. ದೈಹಿಕ ಬೆಳವಣಿಗೆ (ಶಾರೀರಿಕ ವಿಕಾಸ), ಜೀವ ಶಕ್ತಿಯ ಅಭಿವೃದ್ಧಿ (ಪ್ರಾಣಿಕ ವಿಕಾಸ), ಭಾವನಾತ್ಮಕ ಮತ್ತು ಮಾನಸಿಕ ಅಭಿವೃದ್ಧಿ (ಮಾನಸಿಕ ವಿಕಾಸ), ಬೌದ್ಧಿಕ ಬೆಳವಣಿಗೆ (ಬೌದ್ಧಿಕ ವಿಕಾಸ್), ಆಧ್ಯಾತ್ಮಿಕ ಬೆಳವಣಿಗೆ (ಚೈತ್ರಿಕ ವಿಕಾಸ)- ಈ ಪಂಚಕೋಶಗಳ ಆಧಾರದಡಿ ಮಕ್ಕಳನ್ನು ತಯಾರು ಮಾಡಲು ಉದ್ದೇಶಿಸಲಾಗಿದೆ. ಶಿಕ್ಷಣ ಕ್ಷೇತ್ರದಲ್ಲಿ ಪ್ರಸ್ತುತವಾಗಿ ಅಂಕಗಳನ್ನೇ ಪ್ರಮುಖ ಮಾನದಂಡವಾಗಿ ಪರಿಗಣಿಸಲಾಗಿದ್ದು, ಹೊಸ ನೀತಿಯು ವಿಶಾಲ ಹಾಗೂ ಮುಕ್ತ ದೃಷ್ಟಿಕೋನದ ಕಲಿಕೆಗೆ ಒತ್ತು ನೀಡಲು ಮುಂದಾಗಿರುವುದು ಗಮನಾರ್ಹ.
