ಅಮೆರಿಕ ಸೇನೆಗೆ ಸಹಕರಿಸಿದವರನ್ನು ಕಂಡುಹಿಡಿಯುವ ಸಲುವಾಗಿ ತಾಲಿಬಾನಿಗಳು ಮನೆಮನೆಗೆ ಹೋಗಿ ಶೋಧ ನಡೆಸುತ್ತಿದ್ದಾರೆ ಎಂದು ವರದಿಗಳು ತಿಳಿಸುತ್ತವೆ. ಅವರ ಈ ನಡೆಯ ಉದ್ದೇಶ ಸೇಡು ತೀರಿಸಿಕೊಳ್ಳುವುದು ಎಂಬುದನ್ನು ಬಿಡಿಸಿ ಹೇಳಬೇಕಿಲ್ಲ. ಆದರೆ ಅವರ ಸೇಡು ಯಾವ ಬಗೆಯಲ್ಲಿರುತ್ತದೆ ಎಂಬುದು ಮಾತ್ರ ಆತಂಕದ ಸಂಗತಿ. ಜತೆಗೆ, ಕಂದಹಾರ್ ಮತ್ತು ಹೀರತ್ನಲ್ಲಿರುವ ಭಾರತೀಯ ದೂತಾವಾಸ ಕಚೇರಿಗಳಲ್ಲಿ ಸಹ ತಾಲಿಬಾನಿಗಳು ಹುಡುಕಾಟ ನಡೆಸಿದ್ದು, ಅಲ್ಲಿ ನಿಲ್ಲಿಸಲಾಗಿದ್ದ ವಾಹನಗಳನ್ನು ಒಯ್ದಿದ್ದಾರೆ. ಅಲ್ಲಿನ ಅಧಿಕಾರಿ-ಸಿಬ್ಬಂದಿಯನ್ನು ಭಾರತ ಸರ್ಕಾರ ಮುಂಚಿತವಾಗಿಯೇ ಕರೆಸಿ ಕೊಂಡಿದ್ದರಿಂದ, ಸಂಭಾವ್ಯ ಅನಾಹುತ ತಪ್ಪಿದೆ ಎಂದು ಹೇಳಬಹುದು. ಅಲ್ಲದೆ, ಪತ್ರಕರ್ತರನ್ನು ಸಹ ತಾಲಿಬಾನಿಗಳು ಗುರಿಮಾಡುತ್ತಿದ್ದಾರೆ. ತಮಗೆ ವಿರುದ್ಧವಾದ ಸುದ್ದಿಗಳು ಹೊರಜಗತ್ತಿನಲ್ಲಿ ಪ್ರಸಾರವಾಗಬಾರದು; ಅಫ್ಘನ್ನ ಸರಿಯಾದ ಚಿತ್ರಣ ಸಿಗಬಾರದು ಎಂಬುದು ಅವರ ಉದ್ದೇಶ ಇರಬಹುದು. ಅಲ್ಲಿ ನಡೆಯುತ್ತಿರುವ ಬೆಳವಣಿಗೆಗಳನ್ನು ಕಂಡು ಬೇರೆ ಬೇರೆ ದೇಶಗಳು ತಮ್ಮ ಮೇಲೆ ಏನೆಲ್ಲ ಪರಿಣಾಮ ಆಗಬಹುದು ಎಂದು ಲೆಕ್ಕಾಚಾರ ಹಾಕುತ್ತಿವೆ. ಅಮೆರಿಕ ಸೇನೆ ಅಫ್ಘಾನಿಸ್ತಾನದಿಂದ ವಾಪಸಾದ ನಂತರದಲ್ಲಿ, ಅಲ್ಲಿ ಬೇರೆ ದೇಶಗಳ ನಿಯಂತ್ರಣ ತಪ್ಪಿದಂತಾಗಿದೆ. ನಿಕಟಪೂರ್ವ ಅಧ್ಯಕ್ಷ ಅಶ್ರಫ್ ಘನಿ ಅವರಂತೂ ತಾಲಿಬಾನಿಗಳ ಅಬ್ಬರ ಶುರುವಾಗುವುದರೊಳಗೇ ದೇಶ ಬಿಟ್ಟು ತೆರಳಿಬಿಟ್ಟಿದ್ದಾರೆ. ಅಲ್ಲಿನ ಸೇನೆ ಸಮರಕ್ಕೆ ಮೊದಲೇ ಸೋಲೊಪ್ಪಿದೆ. ಹೀಗಾಗಿ ತಾಲಿಬಾನಿಗಳನ್ನು ಹಿಡಿಯುವವರಿಲ್ಲವಾಗಿದೆ.
