ಲಾಕ್ಡೌನ್ನಿಂದ ಅತೀವ ಸಂಕಷ್ಟಕ್ಕೆ ಒಳಗಾಗಿದ್ದು ಉದ್ಯಮಗಳು. ಹಾಗಾಗಿ, ಕಿರು, ಸಣ್ಣ, ಮಧ್ಯಮ ಕೈಗಾರಿಕೆ(ಎಂಎಸ್ಎಂಇ)ಗಳಿಗೆ 3 ಲಕ್ಷ ಕೋಟಿ ರೂ. ಸಾಲಸೌಲಭ್ಯ ಸಿಗಲಿದೆ. ಇದರಿಂದ 45 ಲಕ್ಷ ಎಂಎಸ್ಎಂಇಗಳಿಗೆ ಲಾಭವಾಗಲಿದೆ. ನಾಲ್ಕು ವರ್ಷ ಅವಧಿಯ ಈ ಸಾಲಕ್ಕೆ ಮೊದಲ ವರ್ಷ ಬಡ್ಡಿ ಕಟ್ಟಿದರೆ ಸಾಕು. ಅಲ್ಲದೆ, 50 ಸಾವಿರ ಕೋಟಿ ರೂ.ಗಳನ್ನು ಈಕ್ವಿಟಿ ರೂಪದಲ್ಲಿ ಹೂಡಿಕೆ ಮಾಡಲಾಗುತ್ತಿದೆ. ಎಂಎಸ್ಎಂಇ ವ್ಯಾಖ್ಯೆಯನ್ನು ಬದಲಿಸಲಾಗಿದ್ದು, ಹೆಚ್ಚು ಸಂಸ್ಥೆಗಳು ಇದರಡಿ ಬರಲಿವೆ. ಜತೆಗೆ, ಸಾಲಸೌಲಭ್ಯವೂ ಸಿಗಲಿದೆ. 15 ಸಾವಿರ ರೂ.ಗಿಂತ ಕಡಿಮೆ ಸಂಬಳ ಇರುವ ಉದ್ಯೋಗಿಗಳ ಪಿಎಫ್ ಮೊತ್ತವನ್ನು ಸರ್ಕಾರವೇ ಮೂರು ತಿಂಗಳ ಅವಧಿಗೆ ಭರಿಸಲಿದೆ. ಒಟ್ಟು ಹದಿನೈದು ಪ್ರಮುಖ ಘೋಷಣೆಗಳನ್ನು ಮಾಡಿರುವ ಸರ್ಕಾರ, ಎನ್ಬಿಎಫ್ಸಿ, ಎಂಎಫ್ಐ, ರಿಯಲ್ ಎಸ್ಟೇಟ್, ಕಟ್ಟಡ ನಿರ್ಮಾಣ ಕ್ಷೇತ್ರ ಸೇರಿ ಹಲವು ರಂಗಗಳಿಗೆ ವಿನಾಯ್ತಿ ನೀಡಿದೆ. ಬ್ಯಾಂಕಿಂಗೇತರ ಹಣಕಾಸು ಸಂಸ್ಥೆಗಳಿಗೆ (ಎನ್ಬಿಎಫ್ಸಿ) 30 ಸಾವಿರ ಕೋಟಿ ರೂ.ಗಳ ನೆರವು ಸಿಕ್ಕಿದೆ. ಸ್ಥಳೀಯ ಉದ್ಯಮಕ್ಕೆ ಉತ್ತೇಜನ ನೀಡಲು ಗ್ಲೋಬಲ್ ಟೆಂಡರ್ ನಿಯಮದಲ್ಲಿ ಬದಲಾವಣೆ ತರಲಾಗಿದೆ. ಟಿಡಿಎಸ್ ದರಗಳನ್ನು ಶೇಕಡ 25ರಷ್ಟು ಕಡಿಮೆ ಮಾಡಲಾಗಿದೆ. ಕಾಮಗಾರಿಗಳ ಗುತ್ತಿಗೆ ಹಿಡಿದಿರುವ ಸರ್ಕಾರಿ ಏಜೆನ್ಸಿಗಳ ಅವಧಿಯನ್ನು ಯಾವುದೇ ಷರತ್ತಿಲ್ಲದೆ ಆರು ತಿಂಗಳು ವಿಸ್ತರಿಸಲಾಗಿದೆ.
