ಪಾಕ್ನಲ್ಲಿ ನೆಲೆಸಿರುವ ಲಷ್ಕರ್-ಎ-ತೊಯ್ಬಾ , ಹಿಜ್ಬುಲ್ ಮುಜಾಹಿದ್ದೀನ್, ಜೈಷ್-ಎ-ಮೊಹಮ್ಮದ್ ಸಂಘಟನೆಗಳ ಛಾಯಾ ಸಂಘಟನೆಗಳನ್ನು ಹಿಂಸೆ ಹರಡಲು ಬಳಸುತ್ತಿದ್ದು, ಅದಕ್ಕೆ ಪಾಕ್ ಸರ್ಕಾರ ತೆರೆಮರೆಯಲ್ಲಿದ್ದುಕೊಂಡೇ ಸಹಕಾರ ನೀಡುತ್ತಿದೆ ಎಂಬ ಸಂಗತಿಯನ್ನು ಬೇಹುಗಾರಿಕಾ ದಳದ ಅಧಿಕಾರಿಗಳು ಬಹಿರಂಗ ಪಡಿಸಿದ್ದಾರೆ. ಐಎಸ್ಐನ ಟೂಲ್ಕಿಟ್ನ್ನು ಗಮನಿಸಿದರೆ, ಅದರ ವಿಧ್ವಂಸಕ, ಕರಾಳ ಉದ್ದೇಶಗಳು, ಉಗ್ರ ಸಂಘಟನೆಗಳನ್ನು ಬೆಂಬಲಿಸುವ ನೀತಿಗಳು ಸ್ಪಷ್ಟಗೊಳ್ಳುತ್ತವೆ. ವಲಸೆ ಕಾರ್ವಿುಕರನ್ನು ಗುರಿಯಾಗಿಸುವ ಮೂಲಕ ಉಗ್ರರು ‘ಅಶಾಂತ ಕಾಶ್ಮೀರ’ ಸೃಷ್ಟಿಸಲು ಹವಣಿಸುತ್ತಿರುವುದು ಸ್ಪಷ್ಟ. ಭಾರತ ಈ ಎಲ್ಲ ಬೆಳವಣಿಗೆಗಳನ್ನು ಗಂಭೀರವಾಗಿಯೇ ಪರಿಗಣಿಸಿದೆ. ಭಯೋತ್ಪಾದಕರ ಹಲವು ಬಗೆಯ ಷಡ್ಯಂತ್ರಗಳನ್ನು ವಿಫಲಗೊಳಿಸಿರುವ ನಮ್ಮ ಭದ್ರತಾ ಪಡೆಗಳು ಈ ಹೊಸ ಸವಾಲನ್ನೂ ಅಷ್ಟೇ ದಿಟ್ಟತನದಿಂದ ಎದುರಿಸಲಿವೆ ಎಂಬುದರಲ್ಲಿ ಅನುಮಾನವಿಲ್ಲ. ಭೂಸೇನೆಯ ಮುಖ್ಯಸ್ಥ ಜನರಲ್ ಎಂ.ಎಂ.ನರಾವಣೆ ಮಂಗಳವಾರ ಜಮ್ಮು- ಕಾಶ್ಮೀರದ ಗಡಿ ನಿಯಂತ್ರಣ ರೇಖೆಯ (ಎಲ್ಒಸಿ) ಹಲವು ಮುಂಚೂಣಿ ನೆಲೆಗಳಿಗೆ ಭೇಟಿ ನೀಡಿ, ಸ್ಥಳೀಯ ಪರಿಸ್ಥಿತಿ, ಒಳನುಸುಳುವಿಕೆ ತಡೆಯಲು ಕೈಗೊಂಡಿರುವ ಕ್ರಮಗಳನ್ನು ಪರಿಶೀಲಿಸಿದ್ದಾರೆ. ಕೇಂದ್ರ ಗೃಹ ಸಚಿವ ಅಮಿತ್ ಷಾ ಅ.23 ಮತ್ತು 24ರಂದು ಕಾಶ್ಮೀರಕ್ಕೆ ಭೇಟಿ ನೀಡಿ, ಪರಿಸ್ಥಿತಿ ಅವಲೋಕಿಸಲಿದ್ದಾರೆ. ಗಡಿಯಲ್ಲಿ ಉಗ್ರರ ಒಳನುಸುಳುವಿಕೆಯನ್ನು ಗಣನೀಯವಾಗಿ ತಡೆದಿದ್ದ ಭದ್ರತಾ ಪಡೆಗಳು ಎನ್ಕೌಂಟರ್ನಲ್ಲಿ ಹಲವು ಉಗ್ರರನ್ನು ಇಲ್ಲವಾಗಿಸಿದರು. ಈ ಹೊಸ ಸವಾಲನ್ನು ಎದುರಿಸಲು ಮತ್ತಷ್ಟು ಶಕ್ತಿಶಾಲಿಯಾದ ಕಾರ್ಯತಂತ್ರ ಹೆಣೆಯಬೇಕಿದೆ. ರಾಜತಾಂತ್ರಿಕ ಮಟ್ಟದಲ್ಲಿ ಪಾಕಿಸ್ತಾನದ ಮುಖವಾಡವನ್ನು ಕಿತ್ತೊಗೆಯಲು ಇದು ಸಕಾಲ.
