ಹಳೆಯ ಘಟನೆಗಳನ್ನೊಮ್ಮೆ ನೋಡುವುದಾದರೆ ಮುಖ್ಯಮಂತ್ರಿ, ಸಚಿವರ ಕುಟುಂಬದವರು ಆಡಳಿತದಲ್ಲಿ ಹಸ್ತಕ್ಷೇಪ ನಡೆಸಿರುವುದಕ್ಕೆ ನೂರೆಂಟು ಉದಾಹರಣೆಗಳು ಸಿಗಬಹುದು. ಅಧಿಕಾರದಲ್ಲಿ ಇರುವವರನ್ನು ಮುತ್ತಿಕೊಂಡು, ಅವರ ಸುತ್ತ ಹಿಂಡು ಕಟ್ಟುವುದು, ಲಾಭ ಮಾಡಿಕೊಳ್ಳುವ ಪರಂಪರೆ ಅನೂಚಾನವಾಗಿ ನಡೆದುಕೊಂಡು ಬಂದಿದೆ. ಹಾಲಿ ಆಡಳಿತದಲ್ಲಿರುವವರು ಹಿಂದಿನ ಸರ್ಕಾರದ ಅವಧಿಯಲ್ಲಿ ವಿವಿಧ ವಿಷಯಗಳಿಗೆ ಸಂಬಂಧಿಸಿದಂತೆ ಅಡಿಗಡಿಗೆ ಆರೋಪಿಸುತ್ತಲೇ ಬಂದಿದ್ದರು. ದಾಖಲೆ ಬಿಡುಗಡೆ ಮಾಡಿ ಜನರ ಗಮನ ಸೆಳೆದಿದ್ದರು, ಚುನಾವಣಾ ವಿಷಯವನ್ನಾಗಿಯೂ ಮಾಡಿಕೊಂಡಿದ್ದರು. ಇದೀಗ ಚಕ್ರ ಒಂದು ಸುತ್ತು ಪೂರ್ಣಗೊಂಡಿದೆ, ಆರೋಪ ಮಾಡಿದವರ ಬುಡಕ್ಕೆ ಅದೇ ರೀತಿಯ ಆರೋಪ ಬಂದು ನಿಂತಿದೆ.
