ಇದೀಗ ಕೇಂದ್ರ ಸರ್ಕಾರವು ಹಳೆಯ ಕಾರುಗಳ ಮಾರಾಟಕ್ಕೆ ಹೊಸ ನಿಯಮಗಳನ್ನು ಜಾರಿಗೆ ತರಲಿದೆ. ವಾಹನ ಮರುಮಾರಾಟ ನಿಯಂತ್ರಣ ಹಾಗೂ ಗ್ರಾಹಕರ ಹಿತರಕ್ಷಣೆ ಇದರ ಉದ್ದೇಶ ಎಂದು ಸರ್ಕಾರ ಹೇಳಿದ್ದು, ಇಂಥದೊಂದು ನಿಯಂತ್ರಣ ಕ್ರಮ ಅಗತ್ಯವಾಗಿತ್ತೆನ್ನಬಹುದು. ಅದರಲ್ಲೂ ಈಗ ಆನ್ಲೈನ್ ಮಾರಾಟ ಹೆಚ್ಚಿರುವ ಹಿನ್ನೆಲೆಯಲ್ಲಿ ಗ್ರಾಹಕ ಸುರಕ್ಷತಾ ಕ್ರಮಗಳು ಅನಿವಾರ್ಯ. ನೂತನ ನಿಯಮ ಜಾರಿಯಾದ ನಂತರದಲ್ಲಿ, ಆನ್ಲೈನ್ ಮತ್ತು ಆಫ್ಲೈನ್ ಮಧ್ಯವರ್ತಿಗಳು ತಾವು ಮಾರಾಟ ಮಾಡಲು ಉದ್ದೇಶಿಸಿರುವ ಯಾವುದೇ ವಾಹನಗಳ ಬಗ್ಗೆ ಅಧಿಕಾರಿಗಳಿಗೆ ತಿಳಿಸಬೇಕಾಗುತ್ತದೆ ಮತ್ತು ಸಂಸ್ಥೆಯ ಹೆಸರನ್ನು ರಾಜ್ಯ ಸಾರಿಗೆ ಇಲಾಖೆಯಲ್ಲಿ ನೋಂದಾಯಿಸಿಕೊಳ್ಳಬೇಕಾಗುತ್ತದೆ. ನಂತರವೇ ಮರು ಮಾರಾಟಗಾರನಿಗೆ ಅಗತ್ಯ ಲೈಸೆನ್ಸ್ ನೀಡಲಾಗುತ್ತದೆ. ವಾಹನ ಮಾರಾಟದ ನಂತರದಲ್ಲಿ ಯಾವುದೇ ಅನಪೇಕ್ಷಿತ ಘಟನೆ ನಡೆದಲ್ಲಿ ಅದಕ್ಕೆ ಡೀಲರ್ನನ್ನು ಮಾತ್ರವೇ ಹೊಣೆಯಾಗಿಸುವ ಅಂಶವೂ ಹೊಸ ನಿಯಮದಲ್ಲಿದೆ. ಹಳೆಯ ವಾಹನ ಮಾರಾಟ ವ್ಯಾಪಕವಾಗಿ ವಿಸ್ತರಿಸಿದ್ದರೂ, ಅನೇಕ ತೊಡಕುಗಳು ಸಹ ಇವೆ. ಮಾರಾಟದ ನಂತರದಲ್ಲಿ ಹೊಸ ಮಾಲೀಕನ ಹೆಸರಿಗೆ ದಾಖಲೆ ವರ್ಗಾವಣೆಯಾಗದಿರುವುದು, ನಕಲಿ ದಾಖಲೆ ಸೃಷ್ಟಿಸಿ ಗ್ರಾಹಕರನ್ನು ವಂಚಿಸುವುದು ಮುಂತಾದ ರಗಳೆಗಳಿವೆ.
