ಲೋಕಸಭೆ ಕಾರ್ಯಾಲಯವು ಅಸಂಸದೀಯ ಪದಗಳಿಗೆ ಸಂಬಂಧಿಸಿದಂತೆ ರೂಪಿಸಿರುವ ಕಿರುಹೊತ್ತಗೆಗೆ ವಿರೋಧ ಪಕ್ಷಗಳಿಂದ ಪ್ರತಿರೋಧ ವ್ಯಕ್ತವಾಗಿದೆ. ಸೋಮವಾರ ಸಂಸತ್ತಿನ ಮುಂಗಾರು ಅಧಿವೇಶನ ಆರಂಭವಾಗಲಿರುವ ಹಿನ್ನೆಲೆಯಲ್ಲಿ ಈ ಪಟ್ಟಿಯನ್ನು ಬಿಡುಗಡೆ ಮಾಡಲಾಗಿದೆ. ನರೇಂದ್ರ ಮೋದಿ ನೇತೃತ್ವದ ಸರ್ಕಾರದ ವಾಸ್ತವಗಳನ್ನು ವಿವರಿಸಲು ಬಳಸಲಾಗುವ ಪದಗಳನ್ನು ಅಸಂಸದೀಯ ಪದಗಳ ನಿರ್ಬಂಧ ಪಟ್ಟಿಗೆ ಸೇರಿಸಲಾಗಿದೆ ಎಂಬುದು ವಿರೋಧ ಪಕ್ಷಗಳ ತಕರಾರು. ಅಸತ್ಯ, ಭ್ರಷ್ಟತೆ, ನಾಚಿಕೆಗೇಡು, ವಂಚನೆ, ದುರುಪಯೋಗ, ಭ್ರಷ್ಟ, ಆಷಾಢಭೂತಿತನ, ಅದಕ್ಷ ಮುಂತಾದ ಪದಗಳನ್ನು ಕೂಡ ನಿರ್ಬಂಧಿಸಲಾಗಿದ್ದು, ಇದು ಪ್ರಜಾಪ್ರಭುತ್ವವಿರೋಧಿ ಕ್ರಮ ಎಂದು ಕಾಂಗ್ರೆಸ್ ನಾಯಕರು ಟೀಕಿಸಿದ್ದಾರೆ. ಯಾವುದೇ ಪದವನ್ನು ನಿಷೇಧಿಸಲಾಗಿಲ್ಲ. ಕಡತದಿಂದ ಅಭಿವ್ಯಕ್ತಿಗಳನ್ನು ಸಂದರ್ಭಾನುಸಾರ ಕಿತ್ತು ಹಾಕಲಾಗುವುದು ಎಂದು ಲೋಕಸಭೆ ಸ್ಪೀಕರ್ ಓಂ ಬಿರ್ಲಾ ಅವರು ಸ್ಪಷ್ಟೀಕರಣ ಕೊಟ್ಟಿದ್ದಾರೆ. ಸದನದ ಕಾರ್ಯಕಲಾಪಗಳಲ್ಲಿ ಪಾಲ್ಗೊಳ್ಳುವುದು, ಚರ್ಚೆಗಳಲ್ಲಿ ಭಾಗಿಯಾಗುವುದು, ಪ್ರಶ್ನೆಗಳನ್ನು ಕೇಳುವುದು ಸಂಸತ್ ಸದಸ್ಯರ ಹಕ್ಕು ಮತ್ತು ಕರ್ತವ್ಯವೇ ಆಗಿದೆ. ಶಾಸನಗಳನ್ನು ರೂಪಿಸುವ ಸಂಸದರು ಕಲಾಪಗಳಲ್ಲಿ ಯೋಗ್ಯ ರೀತಿಯಲ್ಲಿ ಮಾತನಾಡುವುದು ಅಪೇಕ್ಷಣೀಯ. ಸಂಸದರಿರಲಿ ಅಥವಾ ಶಾಸಕರಿರಲಿ ಅಥವಾ ಬೇರೆ ಜನಪ್ರತಿನಿಧಿಗಳಿರಲಿ, ಹೇಗೆ ಮಾತನಾಡಬೇಕು ಎಂಬ ಅರಿವು, ವಿವೇಚನೆಯನ್ನು ಹೊಂದಿರಬೇಕಾಗುತ್ತದೆ. ಇದನ್ನು ಯಾರೂ ಬಾಹ್ಯವಾಗಿ ತುಂಬಬೇಕು ಎಂದಿಲ್ಲ. ಸದನದ ಕಲಾಪಗಳಲ್ಲಿ ಹೇಗೆ ಮಾತನಾಡಬೇಕು, ಯಾವ ರೀತಿ ವರ್ತಿಸಬೇಕು ಎಂಬುದಕ್ಕೆ ಅಟಲ್ ಬಿಹಾರಿ ವಾಜಪೇಯಿ, ಸೋಮನಾಥ ಚಟರ್ಜಿ, ಪ್ರಣಬ್ ಮುಖರ್ಜಿ, ಲಾಲ್ಕೃಷ್ಣ ಆಡ್ವಾಣಿ ಅವರಂತಹ ದಿಗ್ಗಜ ಸಂಸದರ ನಡವಳಿಕೆಗಳು ಮಾದರಿಯಾಗಿವೆ. ಅತ್ಯುತ್ತಮ ಸಂಸದೀಯ ಪಟು ಪ್ರಶಸ್ತಿಯನ್ನು ನೀಡುವ ಪರಂಪರೆಯೂ ನಮ್ಮಲ್ಲಿದೆ.
