ಇನ್ನೊಂದೆಡೆ, ದೇಶದಲ್ಲಿ ಚುನಾವಣಾ ಸುಧಾರಣೆಗಳ ಕುರಿತೂ ಚರ್ಚೆ ನಡೆಯುತ್ತಿದೆ. ಈ ನಿಟ್ಟಿನಲ್ಲಿ ಪ್ರಜಾಪ್ರಾತಿನಿಧ್ಯ ಕಾಯ್ದೆಗೆ ಕೆಲ ಬದಲಾವಣೆಗಳನ್ನೂ ತರಲಾಗಿದೆ. ಗಂಭೀರ ಅಪರಾಧ ಪ್ರಕರಣಗಳಲ್ಲಿ ಜನಪ್ರತಿನಿಧಿಗಳು ಎರಡು ಅಥವಾ ಅದಕ್ಕಿಂತ ಹೆಚ್ಚು ಅವಧಿಗೆ ಜೈಲುಶಿಕ್ಷೆಗೆ ಗುರಿಯಾದರೆ, ಸ್ಥಾನದಿಂದ ಅನರ್ಹರಾಗುವ ನಿಯಮ ಜಾರಿಯಲ್ಲಿದೆ. ಇನ್ನಷ್ಟು ಸುಧಾರಣೆಯಾಗಬೇಕೆಂಬ ಆಗ್ರಹ ಇದ್ದೇ ಇದೆ. ಇದೇನೇ ಇದ್ದರೂ, ವ್ಯವಸ್ಥೆಯ ಶುದ್ಧೀಕರಣದಲ್ಲಿ ರಾಜಕೀಯ ಪಕ್ಷಗಳ ಪಾತ್ರ ಪ್ರಮುಖವಾದುದು. ಅಪರಾಧಿಕ ಹಿನ್ನೆಲೆಯವರು, ರಾಜಕೀಯವನ್ನು ವ್ಯವಹಾರವನ್ನಾಗಿಸಿಕೊಳ್ಳಲು ಬರುವವರು ಇಂಥವರಿಗೆ ಸ್ಪರ್ಧೆಗೆ ಅವಕಾಶವೇ ಸಿಗದಿದ್ದರೆ ಅಷ್ಟರಮಟ್ಟಿಗೆ ಅನುಕೂಲವಾಗುತ್ತದೆ. ರಾಜಕೀಯ ರಂಗದ ಇಮೇಜ್ ಬದಲಾಯಿಸುವ ನಿಟ್ಟಿನಲ್ಲಿ ಮತ್ತು ಆಡಳಿತಕ್ಕೆ ಹೊಸತನ ತರುವ ದಿಸೆಯಲ್ಲಿ ಬೇರೆ ಬೇರೆ ರಂಗಗಳವರು ಇಲ್ಲಿಗೆ ಬರಬೇಕೆಂಬ ವಾದ ಕೇಳಿಬರುತ್ತಲೇ ಇದೆ. ಹೀಗೆ ಬಂದ ಕೆಲವರು ಸಾಮರ್ಥ್ಯವನ್ನು ಪ್ರದರ್ಶಿಸಿದ ನಿದರ್ಶನಗಳೂ ಸಾಕಷ್ಟಿವೆ. ಹಾಗಿದ್ದರೂ, ರಾಜಕೀಯ ರಂಗ ಎಂದರೆ ಹಿಂಜರಿಕೆ ತೋರುವ ವಾತಾವರಣ ಈಗಲೂ ಇದೆ. ಈ ಮನೋಭಾವ ಬದಲಾದರೆ ಇನ್ನಷ್ಟು ಸುಧಾರಣೆ ಕಾಣಬಹುದು. ಇದು ಆಗಬೇಕು ಎಂದಾದಲ್ಲಿ, ಪಕ್ಷಗಳು ಸದಸ್ಯತ್ವ ನೀಡುವ ಹಂತದಲ್ಲಿಯೇ ಅವರ ಬಗ್ಗೆ ಜರಡಿ ಹಿಡಿಯಬೇಕು. ಹಾಗೇ, ಟಿಕೆಟ್ ನೀಡುವಾಗ ಶುದ್ಧಹಸ್ತರು, ಕಳಕಳಿಯುಳ್ಳವರು, ಸಮಾಜಸೇವಾಸಕ್ತರನ್ನು ಹುಡುಕಿ ನೀಡಬೇಕು. ಏನಕೇನ ಪ್ರಕಾರೇಣ ಗೆಲುವೇ ಮುಖ್ಯ ಎಂಬ ಸನ್ನಿವೇಶ ಇರುವ ಇಂದಿನ ದಿನಮಾನದಲ್ಲಿ ಪಕ್ಷಗಳು ಕೆಲವಷ್ಟಾದರೂ ನೀತಿಸಂಹಿತೆ ಪಾಲಿಸಬೇಕು ಎಂಬುದು ಜನರ ನಿರೀಕ್ಷೆ. ಹಾಗಿಲ್ಲವಾದಲ್ಲಿ ವ್ಯವಸ್ಥೆಯ ಬಗ್ಗೆ ಜನರ ಭ್ರಮನಿರಸನ ಹೆಚ್ಚುತ್ತಲೇ ಹೋಗುತ್ತದೆ.
