‘ಆಳುವುದು ಎಂದರೆ ಜನರ ಸಮಸ್ಯೆಗಳನ್ನು ಅರಿತು ಹೃದಯದಿಂದ ಅದಕ್ಕೆ ಪರಿಹಾರ ಕೊಡುವುದು. ಅನುಷ್ಠಾನ ಮಾಡುವುದು ಆಡಳಿತ’ ಎಂದು ಮುಖ್ಯಮಂತ್ರಿಗಳು ಹೇಳಿರುವುದು ಗಮನಾರ್ಹ. ಕಂದಾಯ ಇಲಾಖೆಯ ಸೇವೆಗಳನ್ನು ಮನೆಬಾಗಿಲಿಗೆ ತಲುಪಿಸುವುದರಿಂದ 50 ಲಕ್ಷಕ್ಕೂ ಹೆಚ್ಚು ಜನರಿಗೆ ಅನುಕೂಲವಾಗಲಿದೆ ಎಂಬುದು ಸರ್ಕಾರದ ಅಂದಾಜು. ಮುಖ್ಯವಾಗಿ, ಜನರು ಪಹಣಿ ಸೇರಿದಂತೆ ಕೃಷಿ ಭೂಮಿ ಸಂಬಂಧಿತ ಇತರ ದಾಖಲಾತಿಗಳಿಗಾಗಿ ಪದೇಪದೆ ಸರ್ಕಾರಿ ಕಚೇರಿಗಳಿಗೆ ಎಡತಾಕುವುದು ತಪು್ಪತ್ತದೆ, ಅಲ್ಲದೆ ಇಂಥ ಕ್ರಮಗಳಿಂದ ವ್ಯವಸ್ಥೆಯ ಮೇಲಿನ ನಂಬಿಕೆ ಹೆಚ್ಚಲು ಸಾಧ್ಯವಾಗುತ್ತದೆ. ಸಾಮಾಜಿಕ ಭದ್ರತಾ ಯೋಜನೆಗಳಡಿಯ ಪಿಂಚಣಿಗಳು ಸರಿಯಾದ ಸಮಯಕ್ಕೆ ಫಲಾನುಭವಿಗಳಿಗೆ ತಲುಪುವುದಿಲ್ಲ ಎಂಬ ದೂರು ಇಂದು-ನಿನ್ನೆಯದೇನಲ್ಲ. ಆದರೆ, ಇದಕ್ಕೆ ಅಂತಿಮ ಪರಿಹಾರ ನೀಡಬೇಕಾದ, ಸಮಸ್ಯೆ ಹೊಗಲಾಡಿಸಿ ವ್ಯವಸ್ಥೆ ಸರಿಪಡಿಸಬೇಕಾದ ಅವಶ್ಯಕತೆ ಇತ್ತು. ಪ್ರಸ್ತುತ ಆ ಪ್ರಯತ್ನಗಳು ನಡೆಯುತ್ತಿರುವುದು ಸ್ವಾಗತಾರ್ಹ. ಆದರೆ, ಇವು ಆರಂಭಶೂರತ್ವಕ್ಕೆ ಸೀಮಿತವಾಗಬಾರದು. ದೀರ್ಘಾವಧಿಯಲ್ಲಿ ಕೂಡ ಈ ಸೌಲಭ್ಯಗಳು, ಸೇವೆಗಳು ಪರಿಣಾಮಕಾರಿಯಾಗಿ ತಲುಪಬೇಕೆ ಹೊರತು ಮತ್ತೆ ಅಪಸವ್ಯಗಳನ್ನು ಒಳಗೊಳ್ಳುವಂತೆ ಆಗಬಾರದು. ಕಂದಾಯ ಇಲಾಖೆಯ ಕಾರ್ಯವೈಖರಿ ಚುರುಕುಗೊಳಿಸಿರುವಂತೆಯೇ ಇತರ ಇಲಾಖೆಗಳ ಜಡತ್ವ ಹೊಗಲಾಡಿಸಿ, ಹೊಸ ಸುಧಾರಣೆಗಳನ್ನು ಅಳವಡಿಸಲು ಮುಂದಾಗಬೇಕು. ಆಗಲೇ ಸಾಮಾಜಿಕ ಭದ್ರತಾ ಯೋಜನೆಗಳು ಸೇರಿದಂತೆ ಇತರ ಕಾರ್ಯಕ್ರಮಗಳು ಯಶಸ್ವಿಯಾಗಿ ಅನುಷ್ಠಾನಗೊಂಡು, ಶ್ರೀಸಾಮಾನ್ಯರ ಸ್ಥಿತಿ ಸುಧಾರಿಸಲು ಸಾಧ್ಯ.
