ಹೀಗಾಗಿ, ನಕಲಿ ಪಡಿತರ ಚೀಟಿಗಳು ಈಗ ನಾಪತ್ತೆಯಾಗಿವೆ. ಹೀಗಿದ್ದರೂ ಕಳ್ಳವ್ಯವಹಾರವು ಬೇರೆ ಬೇರೆ ಮಾರ್ಗಗಳ ಮೂಲಕ ಮುಂದುವರಿದಿದೆ. ಇದರಲ್ಲಿ ಪ್ರಮುಖವಾದುದು, ಫಲಾನುಭವಿಗಳಿಂದಲೇ ಆಹಾರ ಧಾನ್ಯವನ್ನು ಖರೀದಿಸಿ ಮುಕ್ತ ಮಾರುಕಟ್ಟೆಯಲ್ಲಿ ಮಾರುವುದು. ಉದಾಹರಣೆಗೆ ಪಡಿತರ ಅಕ್ಕಿಯನ್ನು 8-10 ರೂಪಾಯಿಗಳಿಗೆ ಫಲಾನುಭವಿಗಳಿಂದ ಖರೀದಿಸಿ, ನಂತರ ಗುಣಮಟ್ಟದ ಅಕ್ಕಿಯಂತೆ ಕಾಣುವ ರೀತಿಯಲ್ಲಿ ಪಾಲಿಶ್ ಮಾಡಿ ಮಾರಾಟ ಮಾಡಲಾಗುತ್ತದೆ. ಆಯಾ ಪ್ರದೇಶಗಳಲ್ಲಿ ಫಲಾನುಭವಿಗಳು ಬಳಸುವಂತಹ ಧಾನ್ಯಗಳನ್ನೇ ಒದಗಿಸುವ ಮೂಲಕ ಹಾಗೂ ಫಲಾನುಭವಿಗಳಿಗೆ ಧಾನ್ಯಗಳ ಆಯ್ಕೆಗೆ ಅವಕಾಶ ಕಲ್ಪಿಸುವುದರಿಂದ ಇಂತಹ ದಂಧೆಗೆ ಕಡಿವಾಣ ಹಾಕಲು ಸಾಧ್ಯವಿದೆ. ಪಡಿತರ ಚೀಟಿ ಪಡೆಯಲು ನಿಗದಿಪಡಿಸಲಾಗಿರುವ ಮಾನದಂಡಗಳ ಅನುಷ್ಠಾನ ಸರಿಯಾಗಿ ಆಗದಿರುವುದರಿಂದ ಪಡಿತರ ಚೀಟಿ ಫಲಾನುಭವಿಗಳ ಸಂಖ್ಯೆ ಆಪಾರ ಪ್ರಮಾಣದಲ್ಲಿ ಹೆಚ್ಚಾಗಿದೆ.
